বিবাহ মণ্ডপৰ পৰাই পলাই গ’ল কইনা!
দেওবাৰে উত্তৰপ্ৰদেশত সংঘটিত হৈছে এই আজৱ ঘটনা।
অৱশ্যে প্ৰেমজনিত অথবা বিবাহৰ অনিচ্ছাৰ বাবে নহয়।
নিৰ্বাচনত বিজয়ী হোৱাৰ খবৰ লাভ কৰিহে মণ্ডপৰ পৰা উধাও হ’ল কইনা।
উত্তৰ প্ৰদেশৰ ৰামপুৰৰ মহম্মদপুৰ জাদিদ গাঁৱত সদ্যসমাপ্ত ক্ষেত্ৰ পঞ্চায়ত নিৰ্বাচনৰ বিজয়লাভ কৰে পুনম শৰ্মা (২৮) এগৰাকী যুৱতীয়ে।
ফলাফলৰ দিনা দেওবাৰে তেওঁৰ বিবাহ।
তেওঁ ধাৰণা কৰিছিল যে তেওঁৰ নিৰ্বাচনত বিজয়ী হোৱাৰ কোনো সম্ভাৱনা নাই।
সেয়ে নিশ্চিন্তভাৱে হাতত মেহেন্দি, শৰীৰত গহণা আৰু লেহেংগা পিন্ধি দৰাক বৰমাল্য পিন্ধা অনুষ্ঠানৰ বাবে অপেক্ষা কৰি আছিল।
কিন্তু বিবাহস্থলীতে তেওঁ গম পায় যে ভোটত তেওঁ জয়ী হৈছে।
মুঠ ৬০১ টা ভোটসহ তেওঁ ৩১টা ভোটৰ ব্যৱধানত বিজয়লাভ কৰিছে।
জয়ী হিচাপে তেওঁ প্ৰমাণপত্ৰ লাভ কৰিব।
তৎক্ষণাৎ তেওঁ পাহৰি গ’ল বিয়াৰ কথা।
বিয়াৰ সাজ পিন্ধিয়েই পুৱা ৯,৩০ বজাত তেওঁ ২০ কিলোমিটাৰ নিলগৰ ভোট গণনা কেন্দ্ৰলৈ ঢাপলি মেলে।
কইনাৰ সাজত নিৰ্বাচনী প্ৰাৰ্থীক দেখা পায় হতচকিত হৈ পৰে গণনা কেন্দ্ৰত উপস্থিত থকা লোকসকল।
পুনমৰ হাতত তুলি দিয়া হয় বিজয়ৰ প্ৰমাণপত্ৰ।
সামাজিক মাধ্যমত ইয়াৰ ফটো ইতিমধ্যে ভাইৰেল হৈ পৰিছে।
এক ৰাষ্ট্ৰীয় সংবাদ মাধ্যমত পুনমে কয় যে নিৰ্বাচনত বিজয়ী হোৱাটো তেওঁৰ বাবে আটাইতকৈ শ্ৰেষ্ঠ বিবাহৰ উপহাৰ।
তেওঁ কয় যে দৰাপক্ষৰ অনুমতিমৰ্মে তেওঁ গণনাকেন্দ্ৰলৈ আহিছে আৰু গাওঁখনৰ সকলো লোক তেওঁৰ এই বিজয়ত সুখী হৈ পৰিছে।
গণনা কেন্দ্ৰৰ পৰা প্ৰমাণপত্ৰসহিতে তেওঁ যেতিয়া বিবাহ মণ্ডপলৈ যায়, তৎক্ষণাত বাকী থকা অনুষ্ঠানসমূহ ৰূপায়ন কৰা হয়।
মহিলা প্ৰাৰ্থীৰ বাবে সুৰক্ষিত থকা পঞ্চায়তটোৰ নিৰ্বাচনত উঠাৰ ক্ষেত্ৰত তেওঁক দেউতাকে অনুপ্ৰেৰণা যোগোৱা বুলি পুনমে ব্যক্ত কৰিছে।
ভৱিষ্যতে পুনমৰ ৰাজনৈতিক যাত্ৰাত স্বামী আৰু স্বামীৰ পৰিয়ালৰ তৰফৰ পৰা সহযোগ প্ৰদান কৰিব বুলি তেওঁ বিশ্বাস কৰে বুলিও ভাষ্য প্ৰদান কৰে।