দেশ কঁপাই যোৱা উত্তৰ প্ৰদেশৰ হাথৰাছৰ দলিত তৰুণীৰ গণধৰ্ষণ কাণ্ডৰ বাতৰি সংগ্ৰহ কৰিবলৈ গ্ৰেপ্তাৰ হোৱা কেৰলাৰ সাংবাদিকসহ সাতগৰাকীৰ বিৰুদ্ধে চাৰ্জশ্বীট দাখিল কৰিছে উত্তৰ প্ৰদেশ আৰক্ষীয়ে।
শনিবাৰে উত্তৰ প্ৰদেশ আৰক্ষীয়ে কেৰলাৰ সাংবাদিক ছিদ্দিক কাপ্পানসহ অন্য সাতগৰাকীৰ বিৰুদ্ধে বেআইনী কাৰ্যকলাপ (প্ৰতিৰোধ) আইন (UAPA)ৰ অধীনত প্ৰায় ৫০০০ পৃষ্ঠাৰ চাৰ্জশ্বীট দাখিল কৰিছে।
স্মৰ্তব্য যে বিগত বৰ্ষৰ ১৪ ছেপ্টেম্বৰত উত্তৰ প্ৰদেশৰ হাথৰাছত এগৰাকী দলিত তৰুণীক জঘন্যভাৱে গণধৰ্ষণ কৰি চাৰি ধৰ্ষণকাৰীয়ে শাৰীৰিকভাৱে প্ৰহাৰ কৰাৰ লগতে জিভা কাটি পেলাইছিল। নিৰ্যাতিতা তৰুণীৰ গৰাকী দিল্লীৰ এখন চিকৎসালয়ত চিকিৎসাধীন অৱস্থাত মৃত্যু হৈছিল।
উক্ত দেশ কঁপাই যোৱা জঘন্য গণধৰ্ষণ কাণ্ডটোৰ বাতৰি সংগ্ৰহৰ বাবে তিনিজন সতীৰ্থৰ সৈতে সাংবাদিক ছিদ্দিক কাপ্পান উত্তৰ প্ৰদেশৰ হাথৰাছলৈ গৈছিল আৰু উত্তৰ প্ৰদেশ আৰক্ষীয়ে কাপ্পানসহ অন্য তিনি সতীৰ্থসহ মুঠ সাতজনক গ্ৰেপ্তাৰ কৰিছিল।
উত্তৰ প্ৰদেশ আৰক্ষীয়ে কাপ্পানসহ উক্ত সাতগৰাকীক ‘সন্দেহজনক ব্যক্তি’য়ে সন্ত্ৰাসবাদ কাৰ্যকলাপৰ বাবে উত্তৰ প্ৰদেশত প্ৰৱেশ কৰাৰ অভিযোগত গ্ৰেপ্তাৰ কৰা বুলি প্ৰকাশ কৰিছিল।
কাপ্পানসহ অন্য আটাইকেইজনকে সন্ত্ৰাসবাদী কাৰ্যকলাপৰ বাবে পুঁজি সংগ্ৰহ কৰাৰ অভিযোগত মথুৰা কাৰাগাৰত বন্দী কৰি ৰখা হৈছে।
আৰু সাংবাদিক কাপ্পানসহ এই আটাকেইজন ব্যক্তিৰ বিৰুদ্ধে উত্তৰ প্ৰদেশ আৰক্ষীয়ে ৫০০০ পৃষ্ঠাৰ চাৰ্জশ্বীট দাখিল কৰিছে।
“আমি এতিয়াও চাৰ্জশ্বীটৰ কপি লাভ কৰা নাই। চাৰ্জশ্বীটখন ৫০০০ পৃষ্ঠাৰ হ’ব। আমি অফিচিয়েলি কপিটো লাভ কৰি অধ্যয়ন কৰাৰ পিছত আমি কি কৰিম তাৰ সিদ্ধান্ত ল’ম।” মথুৰা আদালতৰ বাহিৰত আইনজীৱী মধুবন দত্ত চতুৰ্বেদীয়ে কয়।
উল্লেখ্য যে দেশ কঁপোৱা হাথৰাছ গণধৰ্ষণ কাণ্ডটোত স্থানীয় বিজেপি নেতাৰ পুত্ৰ তথা আত্মীয় জড়িত থকাৰ বাবেই উত্তৰ প্ৰদেশ চৰকাৰে সমগ্ৰ ঘটনাটোক অন্য ৰূপ দিবলৈ চেষ্টা কৰা বুলি অভিযোগ উঠিছিল।
আৰক্ষীয়ে সঠিক পদক্ষেপ গ্ৰহণ নকৰা, অভিযুক্তৰ প্ৰতি নৰম হোৱা আৰু তথ্য প্ৰমাণ নষ্ট কৰাৰ লগতে নিৰ্যাতিতাৰ মৃতদেহ পৰিয়ালক গতাই নিদি আৰক্ষীয়ে গোপনে সৎকাৰ কৰাৰ অভিযোগ উঠিছিল।
ইয়াৰ পিছতে দেশজুৰি তুমুল বিতৰ্কৰ সৃষ্টি হোৱাৰ লগতে প্ৰতিবাদৰ ঢৌ উঠে আৰু উত্তৰ প্ৰদেশ আৰক্ষী আৰু চৰকাৰ কঠোৰ সমালোচনাৰ সন্মুখীন হয়।
হাথৰাছৰ নিৰ্যাতিতা পৰিয়ালটোক আৰক্ষীয়ে নিৰাপত্তাৰক্ষী মোতায়েন কৰি অভেদ্য দুৰ্গলৈ ৰূপান্তৰিত কৰি সাংবাদিক আৰু কোনো লোকক সাক্ষাৎ কৰাৰ অনুমতি দিয়া নাছিল।
দেশজুৰি হোৱা প্ৰৱল প্ৰতিবাদ আৰু জনমতত সেও মানি উত্তৰ প্ৰদেশ চৰকাৰে অৱশেষত গোচৰটো চিবিআইক অৰ্পণ কৰিবলৈ বাধ্য হয়।
স্মৰ্তব্য যে দলিত তৰুণীগৰাকীৰ নিৰ্যাতিতা পৰিয়ালটোৰ সাক্ষাৎ কৰি বাতৰি সংগ্ৰহৰ বাবে হাথৰাছলৈ যোৱা কেৰলাস্থিত দৈনিক বাতৰি কাকত এখনৰ সাংবাদিক কাপ্পানসহ অন্য সতীৰ্থসকলক আৰক্ষীয়ে তেতিয়াই গ্ৰেপ্তাৰ কৰি UAPAৰ অধীনত গোচৰ ৰুজু কৰিছিল।
