যোগী আদিত্যনাথৰ শাসিত ৰাজ্য উত্তৰ প্ৰদেশত সংঘটিত হৈছে এক চাঞ্চল্যকৰ ঘটনা। আদালতলৈ নিয়াৰ পথত আৰক্ষীয়ে কয়দী নিয়া বাহনতে ফেচবুক লাইভ আহি শত্ৰুক ভাবুকি দিয়ে হত্যাকাণ্ডত অভিযুক্ত এগৰাকী কয়দীয়ে।
ইতিমধ্যে ভাবুকি ভৰা এই ফেচবুক লাইভটো সামাজিক মাধ্যমত ভাইৰেল হৈ পৰিছে।
টনাৰ বিৱৰণীৰ মতে, উত্তৰ প্ৰদেশৰ মহোবা জিলা কাৰাগাৰত বন্দী হৈ থকা কয়দী লোকেন্দ্ৰ যাদৱ ওৰফে কাৰ্টুছ যাদৱক হামিপুৰৰ ফাষ্ট ট্ৰেক আদালতলৈ গোচৰৰ শুনানিৰ বাবে আৰক্ষীৰ কয়দী নিয়া বাহনত নি থকা হৈছিল।
আৰক্ষীৰ বাহনত আদালতলৈ গৈ থকাৰ পথতে কয়দী লোকেন্দ্ৰ যাদৱে ফেচবুকত লাইভ আহি তেওঁৰ প্ৰতিপক্ষক ভাবুকি প্ৰদান কৰে। ঘটনাটো যোৱা ২১ অক্টোবৰত সংঘটিত হোৱা বুলি জানিব পৰা গৈছে।
ভিডিঅ’টো ভাইৰেল হোৱাৰ পাছতে কাৰাগাৰ কৰ্তৃপক্ষই প্ৰতিক্ৰিয়া প্ৰকাশ কৰিছে। মহোবা কাৰাগাৰৰ জেইলাৰ শিৱ মুৰাট সিঙে কয় যে এই কাণ্ড কাৰাগাৰ চৌহদৰ ভিতৰত সংঘটিত হোৱা নাছিল, সেয়ে ইয়াত কাৰাগাৰ কৰ্তৃপক্ষৰ কোনো গাফিলতি নাই।
ইফালে ঘটনাটো সংবাদ মাধ্যমত প্ৰচাৰ হোৱাৰ পাছতে মহোবা আৰক্ষীয়ে প্ৰতিক্ৰিয়া প্ৰকাশ কৰিছে। আৰক্ষীয়ে কয় যে ঘটনা সংঘটিত হোৱাৰ সময়ত আৰক্ষী বাহনখনত উপস্থিত থকা এগৰাকী উপ পৰিদৰ্শক আৰু তিনিগৰাকী কৰ্তব্যৰত আৰক্ষী কনিষ্টবলক নিলম্বন কৰা হৈছে।
ফেচবুক লাইভেৰে প্ৰতিপক্ষক ভাবুকি প্ৰদান কৰাৰ বাবে কাৰ্টুছ যাদৱৰ বিৰুদ্ধে সুকীয়া গোচৰ ৰুজু কৰিব বুলিও আৰক্ষীয়ে প্ৰকাশ কৰিছে। লগতে আৰক্ষীয়ে আৰক্ষী বাহনখনত কয়দী কাৰ্টুছ যাদৱে ক’ৰ পৰা আৰু কেনেকৈ মোবাইল লাভ কৰিলে তাৰো তদন্ত কৰা হ’ব বুলি আৰক্ষীয়ে প্ৰকাশ কৰিছে।
