উত্তৰ প্ৰদেশৰ আগ্ৰাত সংঘটিত হৈছে এক চাঞ্চল্যকৰ কাণ্ড। দুই কিশোৰে এগৰাকী শিক্ষকৰ ভৰিত গুলীয়াই নিজকে ‘গেংষ্টাৰ’ বুলি পৰিচয় দি ভিডিঅ’ ৰেকৰ্ডিং কৰে।
কেৱল সিমানেই নহয়, ভাইৰেল হৈ পৰা ভিডিঅ’টোত দুই কিশোৰে আনকি শিক্ষকগৰাকীক ৩৯ গুণ অধিক গুলীচালনা কৰাৰো ভাবুকি দিয়ে।
ভাইৰেল ভিডিঅ’টোত চাঞ্চল্যকৰভাৱে দুয়ো কিশোৰে ছমাহৰ পাছত ঘূৰি আহি শিক্ষকজনক পুনৰ গুলীয়াব বুলিও দাবী কৰিছে।
ভিডিঅ’টোত অভিযুক্ত কিশোৰ কেইজনে কয়, “মই ছমাহৰ পিছত উভতি আহিম। মই তেওঁক ৪০ বাৰ গুলীয়াব লাগিব, ৩৯ বাৰ বাকী আছে।”
ইফালে আহত শিক্ষকগৰাকীক সুমিত বুলি চিনাক্ত কৰা হৈছে। ভৰিত গুৰুতৰভাৱে আহত শিক্ষকগৰাকী বৰ্তমান চিকিৎসালয়ত চিকিৎসাধীন হৈ আছে বুলি আৰক্ষীয়ে সদৰী কৰিছে।
বৃহস্পতিবাৰে সংঘটিত হৈছে এই ঘটনা। অভিযুক্ত এই ঘটনাৰ বাবে দুয়ো কিশোৰকে গ্ৰেপ্তাৰ কৰি তেওঁলোকৰ বিৰুদ্ধে গোচৰ ৰুজু কৰা হৈছে বুলিও আৰক্ষীয়ে লগতে জানিবলৈ দিছে।
