স্বাধীনতাৰ ৭৪ বছৰৰ পাছতো দেশৰ পৰা নিৰ্মূল হোৱা নাই বৰ্ণ বৈষম্যৰ পৰিৱেশ। এতিয়াও দেশৰ প্ৰায় অঞ্চলৰেই জনসাধাৰণক গ্ৰাস কৰি আছে তথাকথিত উচ্চ-নিম্ন বৰ্ণ,জাতিৰ বৈষম্যগত মানসিকতাই।
যি সময়ত দেশৰ শাসনাধিষ্ঠ বিজেপি চৰকাৰ তথা বিজেপি দলৰ আদৰ্শগত সংস্থা আৰএছএছে হিন্দুত্বৰ নামত দেশৰ হিন্দু সকলৰ একতা আৰু হিন্দু ৰাষ্ট্ৰ গঠনৰ মত পোষণ কৰি আহিছে, সেই সময়তে হিন্দু সকলৰ মাজতে দেখিবলৈ পোৱা গৈছে জাতিগত বৈষম্যৰ মনোভাৱ।
তামিলনাডুৰ তিৰুনেলভেলি জিলাৰ কম্বনেৰী পঞ্চায়তৰ অন্তৰ্গত বলসাই গাঁৱত দেখিবলৈ পোৱা গৈছে জাতিগত বৈষম্যৰ ঘটনা।
স্থানীয় নিকায় নিৰ্বাচনৰ ভোটকেন্দ্ৰ অনুসূচিত জাতিৰ লোকে বাস কৰা এলেকাত থকাৰ বাবেই বলসাই গাঁৱৰ উচ্চ জাতিৰ লোকে বৰ্জন কৰিছে নিৰ্বাচন।
কদয়ানল্লুৰ খণ্ড উন্নয়ন বিষয়া কণ্ঠস্বামীয়ে এই সম্পৰ্কে কয়, “ নিৰ্বাচন অনুষ্ঠিত কৰিবলৈ সুবিধা হোৱাৰ প্ৰতি লক্ষ্য ৰাখি পূৰ্বৰ ভোটকেন্দ্ৰৰ পৰা এই স্থানলৈ ভোটকেন্দ্ৰ স্থানান্তৰ কৰা হৈছিল। চৰকাৰী আদি দ্ৰাবিড় কল্যান হাইস্কুলত নতুনকৈ গঠন কৰা ভোটকেন্দ্ৰটো পূৰ্বৰ ভোটকেন্দ্ৰৰ তুলনাত মাত্ৰ ২০০ মিটাৰ দূৰত্বত অৱস্থিত। বলসাই গাঁৱত উচ্চ জাতিৰ হিন্দু,অনুসূচিত জাতি আৰু মুছলমান সম্প্ৰদায়ৰ লোকে বসবাস কৰে। ইয়াৰে কেৱল উচ্চ জাতিৰ হিন্দু সকলেহে ভোটকেন্দ্ৰ স্থানান্তৰৰ বিৰোধিতা কৰিছে। এই বিষয়ত অতি সোনকালেই শান্তি আলোচনাৰ ব্যৱস্থা কৰিম।”
আনহাতে উচ্চ জাতিৰ হিন্দু সকলে ভোটকেন্দ্ৰ পুনৰ তেওঁলোকৰ বসতি অঞ্চললৈ ঘূৰাই অনাৰ দাবী তুলিছে। নহ’লে ভোট বৰ্জন কৰাৰ লগতে নিজৰ চৰকাৰী নথিপত্ৰ অধিকাৰী বিষয়াক ঘূৰাই দিয়াৰ হুংকাৰ দিছে। তেওঁলোকে ভোটকেন্দ্ৰ স্থানান্তৰৰ বিষয়টোত নিৰ্বাচনী বিষয়াসকল ৰাজনৈতিক চাপৰ সন্মুখীন হোৱা বুলি সন্দেহ কৰি এই চাপৰ বাবেই খণ্ড উন্নয়ন বিষয়া আৰু জিলা প্ৰশাসনে তেওঁলোকৰ দাবীৰ প্ৰতি সঁহাৰি দিয়া নাই বুলি অভিযোগ কৰিছে।
ইফালে মেলানিলিথানাল্লুৰৰ পত্তদাইকাত্তি পঞ্চায়তৰ ভোটাৰ সকলেও তেওঁলোকৰ অঞ্চলত পঞ্চায়ত কাৰ্যালয় আৰু প্ৰশাসনিক কাৰ্যালয় নথকাৰ অভিযোগত স্থানীয় নিকায় নিৰ্বাচন বৰ্জন কৰিছে।
