পত্নীৰ নিয়মীয়া গালি আৰু শাৰীৰিক আক্ৰমণত অতিষ্ঠ হৈ এজন ব্যক্তিয়ে এজোপা ৮০ ফুট ওখ খেজুৰ গছৰ ওপৰত উঠিয়ে কটাই দিলে সম্পূৰ্ণ এটা মাহ। এই আজৱ ঘটনা ঘটিছে উত্তৰ প্ৰদেশৰ মৌ জিলাৰ কোপাগঞ্জ অঞ্চলত।
জানিব পৰা মতে, ৪২ বৰ্ষীয় ৰাম প্ৰভেশ নামৰ এই ব্যক্তিগৰাকীয়ে যোৱা প্ৰায় ছয় মাহ ধৰি সাংসাৰিক জীৱনত নিতৌ মানসিকভাৱে অত্যাচাৰৰ সন্মুখীন হৈ আহিছিল। নিতৌ বিবাদ হৈছিল পত্নীৰ সৈতে।
প্ৰভেশৰ অভিযোগ মতে তেওঁৰ পত্নীয়ে কেৱল গালি-গালাজতে ক্ষান্ত হোৱা নাছিল, প্ৰায়ে তেওঁক শাৰীৰিকভাৱে প্ৰহাৰো কৰিছিল। পত্নীৰ পত্নীৰপ্ৰভেশ শেষত ইমানেই বিতুষ্ট হৈ পৰে যে চৌহদৰে এজোপা খেজুৰ গছত উঠে আৰু এমাহ ধৰি তাতে বাস কৰে।
এই বৃহদাকায় গছজোপাৰ ওপৰলৈ তেওঁক পৰিয়ালৰ সদস্যসকলে ওলোমাই ৰখা এডাল ৰছীৰ জৰিয়তে খাদ্য তথা পানীৰ যোগান ধৰে আৰু ওপৰলৈ টানি নি এই খাদ্য গ্ৰহণ কৰে প্ৰভেশে।
গাওঁবাসীয়ে জানিবলৈ দিয়া মতে ৰাম প্ৰভেশ নিশা কোনো সময়ত গছৰ পৰা নামি আহি শৌচ-প্ৰস্ৰাৱ কৰাৰ পিছত পুনৰ গছৰ ওপৰলৈ উঠি যায়। তেওঁলোকে ৰাম প্ৰবেশক নামি আহিবলৈ জোৰ দিয়ে যদিও ৰাইজৰ আহ্বান অস্বীকাৰ কৰে প্ৰভেশে।
পপিত উপায়ন্তৰ হৈ গাওঁবাসীয়ে আৰক্ষীক খবৰ দিয়ে। কিন্তু আৰক্ষী উপস্থিত হৈয়ো ৰাম প্ৰভেশক মান্তি কৰাবলৈ অসমৰ্থ হয়। কেইবাবাৰো অনুৰোধ কৰাৰ পিছতো যেতিয়া প্ৰভেশে আৰক্ষীৰ কথা নুশুনে, তেতিয়া তেওঁলোকে তেওঁৰ এটা ভিডিঅ’ বনাই সেই ঠাইৰ পৰা গুচি যায়।
ইফালে গাঁওখনৰ মুৰব্বীয়ে প্ৰভেশৰ এই কাৰ্যৰ ফলত গাওঁবাসীৰ ব্যক্তিগত গোপনীয়তা ভংগ হোৱা বুলি অভিযোগ কৰিছে। তেওঁ অভিযোগ কৰা মতে প্ৰভেশে গছৰ ওপৰৰ পৰা কাষৰ মানুহৰ ঘৰত হৈ থকা কাম চাই থাকে।
গাওঁখনৰ বহুতো মহিলা আহি তেওঁৰ ওচৰত এই বিষয়ে অভিযোগ কৰিছে বুলি গাঁৱৰ মুৰব্বী গৰাকীয়ে জানিবলৈ দিয়ে। এনে অভিযোগৰ পিছতে আৰক্ষীক গবৰ দিয়া হয় যদিও আৰক্ষীও তেওঁক নামি আহিবলৈ সৈমান কৰাত বিফল হয় বুলি তেওঁ লগতে সদৰী কৰে।
