শনিবাৰে বিয়লিৰ ভাগত অসম-নাগালেণ্ড সীমান্তৰ সৰুপথাৰৰ অন্তৰ্গত উৰিয়ামঘাটৰ খেৰবাৰী অঞ্চলত শতাধিক নগা দুৰ্বৃত্তই অতৰ্কিতে আক্ৰমণ চলাই বন বিভাগ আৰু চি আৰ পি এফৰ এটা অস্থায়ী নিৰীক্ষণ শিবিৰ সম্পূৰ্ণৰূপে লণ্ড-ভণ্ড কৰাৰ লগতে অগ্নিসংযোগ কৰে। দৈয়াং নৈত চলি থকা অবৈধ শিল খনন ৰোধ কৰাৰ উদ্দেশ্যেৰে অসমৰ বন বিভাগৰ মুখ্য সচিব এম কে যাদৱে উক্ত স্থান পৰিদৰ্শন কৰাৰ পাছতে এই অস্থায়ী শিবিৰটো নিৰ্মাণ কৰা হৈছিল। এই ঘটনাৰ পাছতে সমগ্ৰ সীমান্তৱৰ্তী অঞ্চলটোত এক আতংকময় আৰু চেপা উত্তেজনাই বিৰাজ কৰিছে।
জানিব পৰা মতে, দুৰ্বৃত্তৰ দলটোৱে কেৱল আক্ৰমণ কৰিয়েই ক্ষান্ত নাথাকি শিবিৰটো সম্পূৰ্ণৰূপে জ্বলাই দিয়ে। এই আক্ৰমণৰ সময়ত শিবিৰটোত উপস্থিত থকা শ্ৰমিক আৰু বন বিভাগৰ প্ৰায় সাতগৰাকী কৰ্মচাৰীয়ে কোনোমতে নিজৰ প্ৰাণ বচাই ঘটনাস্থলীৰ পৰা পলায়ন কৰিবলৈ বাধ্য হয়। ৰাজ্যৰ বন বিভাগৰ এক উচ্চপদস্থ বিষয়াই স্থান পৰিদৰ্শন কৰাৰ পাছত স্থাপন কৰা এটা চৰকাৰী শিবিৰ এনেদৰে ধ্বংস কৰা কাৰ্যই এতিয়া প্ৰশাসনৰ সুৰক্ষা ব্যৱস্থাক লৈ ডাঙৰ প্ৰশ্নবোধক চিহ্নৰ সৃষ্টি কৰিছে।
এই অনাকাংক্ষিত ঘটনাৰ পাছতে সদৌ অসম ছাত্ৰ সন্থাই (আছু) তীব্ৰ প্ৰতিক্ৰিয়া আৰু উদ্বেগ প্ৰকাশ কৰিছে। আছুৰ ধনশিৰি মহকুমাৰ সভাপতি বিকাশ বৰাই এই ঘটনাক অতি পৰিতাপৰ বিষয় বুলি অভিহিত কৰে। তেওঁ সংবাদ মাধ্যমৰ আগত মন্তব্য কৰে যে বন বিভাগৰ মুখ্য সচিবগৰাকীয়ে পৰিদৰ্শন কৰাৰ পাছত স্থাপন কৰা এটা শিবিৰ নগা দুষ্কৃতিকাৰীয়ে ভাঙি তচনচ কৰাৰ পাছতো প্ৰশাসনে তেওঁলোকক কৰায়ত্ত কৰিব নোৱৰাটো অতিশয় দুৰ্ভাগ্যজনক। অসমৰ মানচিত্ৰ বা ভূখণ্ডৰ এধানমানি অংশও যাতে নগা দুষ্কৃতিকাৰীৰ দখললৈ যাব নোৱাৰে, তাৰ বাবে কঠোৰ ব্যৱস্থা গ্ৰহণ কৰিবলৈ আছুৱে অসম চৰকাৰক আহ্বান জনাইছে।
ইয়াৰ সমান্তৰালভাৱে ৰাজ্যৰ সীমান্ত উন্নয়ন মন্ত্ৰীগৰাকীৰ ভূমিকাক লৈয়ো আছুৱে ক্ষোভ প্ৰকাশ কৰিছে। আছুৰ নেতাগৰাকীয়ে উল্লেখ কৰে যে গোলাঘাট জিলাৰ বোকাখাত সমষ্টিৰ বিধায়ক হোৱাৰ পিছতো সীমান্ত উন্নয়ন মন্ত্ৰীগৰাকীয়ে সীমান্তৰ ঘটনাসমূহ যিধৰণে তদাৰক বা পৰ্যবেক্ষণ কৰিব লাগিছিল, সেয়া আজিলৈকে পৰিলক্ষিত হোৱা নাই। নিজৰ দায়িত্ব পালনত ব্যৰ্থ হোৱাৰ অভিযোগ তুলি ছাত্ৰ সংগঠনটোৱে মন্ত্ৰীগৰাকীক নৈতিকভাৱে পদত্যাগ কৰিবলৈ অনুৰোধ জনাইছে। লগতে, অসমৰ মাটি সুৰক্ষিত কৰাৰ স্বাৰ্থত চৰকাৰ আৰু বিভাগীয় কৰ্তৃপক্ষক ক্ষীপ্ৰ ব্যৱস্থা গ্ৰহণৰ দাবী জনাইছে।
বৰ্তমান ঘটনাস্থলী আৰু ইয়াৰ দাঁতিকাষৰীয়া অঞ্চলসমূহত প্ৰশাসনে কটকটীয়া নিৰাপত্তা ব্যৱস্থা গঢ়ি তুলিছে আৰু পৰিস্থিতি নিয়ন্ত্ৰণলৈ অনাৰ প্ৰয়াস অব্যাহত ৰাখিছে। আগন্তুক সময়ত যাতে এনে ধৰণৰ হিংসাত্মক ঘটনাৰ পুনৰাবৃত্তি নঘটে আৰু সীমান্তৱৰ্তী ৰাইজৰ নিৰাপত্তা সুনিশ্চিত হয়, তাৰ বাবে স্থানীয় প্ৰশাসনৰ লগতে নিৰাপত্তাৰক্ষীয়ে তীক্ষ্ণ নজৰ ৰাখিছে।
