উৰুগুৱেৰ প্ৰাক্তন ৰাষ্ট্ৰপতি জোচে মুজিকাৰ অন্ত্যেষ্টিক্ৰিয়া সম্পূৰ্ণ হৈছে। তেওঁৰ সৰল জীৱনশৈলীৰ বাবে তেওঁ সমগ্ৰ বিশ্বতে “আটাইতকৈ দৰিদ্ৰ ৰাষ্ট্ৰপতি” হিচাপে পৰিচিত আছিল।
কালি বৃহস্পতিবাৰে দেশজুৰি হাজাৰ হাজাৰ লোকে নিজৰ মৰমৰ ‘পেপে’ৰ অন্ত্যেষ্টিক্ৰিয়াত অংশ লৈ শেষ বিদায় দিয়ে। ব্ৰাজিলৰ ৰাষ্ট্ৰপতি লুইজ ইনাছিও লুলা দা ছিলভাই জোচে মুজিকাৰ অন্ত্যেষ্টিক্ৰিয়াত অংশগ্ৰহণ কৰিবলৈ উৰুগুৱেলৈ আহিছিল।
কৰ্কট ৰোগৰ সৈতে দীৰ্ঘদিনীয়া যুঁজৰ অন্তত যোৱা মঙলবাৰে মৃত্যু হয় জোচে মুজিকাৰ। তেওঁৰ বয়স আছিল ৮৯ বছৰ। এইজন জনপ্ৰিয় নেতাৰ মৃতদেহ তেওঁৰ মৃত্যুৰ পিছত শেষ শ্ৰদ্ধাৰ বাবে দুদিন ৰখা হৈছিল। এই সময়ছোৱাত প্ৰায় এক লাখ লোকে তেওঁক শ্ৰদ্ধাঞ্জলি জনায়।
জোচে মুজিকাৰ কফিনত শ্ৰদ্ধাঞ্জলি জনাবলৈ মানুহৰ দীঘলীয়া শাৰী হৈছিল। সংসদ ভৱনত এক আৱেগিক পৰিৱেশৰ সৃষ্টি হয় । শ্ৰদ্ধাঞ্জলি জনাবলৈ অহা কিছুমান মানুহৰ হাতত ফুল আছিল, আন কিছুমানে কান্ধত তেওঁৰ দলৰ পতাকা মেৰিয়াই লৈছিল।
শ্ৰদ্ধাঞ্জলি জনাবলৈ অহা প’লা মাৰ্টিনেজে কয় যে তেওঁ (জোচে মুজিকাই) আমাক বহু কথা শিকাইছিল কম কথাত সন্তুষ্ট হোৱা, বাহ্যিক আড়ম্বৰৰ বাবে জীয়াই নাথাকিবা।
এই প্ৰাক্তন গেৰিলা যোদ্ধাগৰাকীয়ে ২০১০ চনৰ পৰা ২০১৫ চনলৈকে উৰুগুৱেত ক্ষমতাত আছিল। উৰুগুৱেৰ একনায়কত্ববাদৰ সময়ত ১৯৭৩ চনৰ পৰা ১৯৮৫ চনলৈকে কাৰাগাৰত বন্দী হৈ আছিল জোচে মুজিকা। পৰৱৰ্তী সময়ত নিৰ্বাচনৰ জৰিয়তে বাওঁপন্থীসকলক ক্ষমতালৈ অনাত তেওঁ গুৰুত্বপূৰ্ণ ভূমিকা পালন কৰিছিল।
এবছৰৰ আগতে জোচে মুজিকাৰ খাদ্যনলীত কেন্সাৰ ধৰা পৰিছিল আৰু পিছলৈ এই ৰোগ যকৃতলৈ বিয়পি পৰিছিল।
ৰাষ্ট্ৰপতি হিচাপে তেওঁৰ সৰল জীৱনশৈলী, ভোগবাদ বিৰোধী স্থিতি আৰু সমাজ সংস্কাৰৰ কামে জোচে মুজিকাক লেটিন আমেৰিকাৰ বাহিৰেও সমগ্ৰ বিশ্বতে এজন সুপৰিচিত ৰাজনৈতিক ব্যক্তি কৰি তুলিছিল।
