আমেৰিকৰ শুল্ক নীতি! ২৭ আগষ্টৰ পৰা কার্যকৰী হ’ব ভাৰতীয় সামগ্ৰীৰ ওপৰত ৫০% শুল্ক

২৭ আগষ্টৰ পৰা (বুধবাৰ) কাৰ্যকৰী হ’ব আমেৰিকাৰ ৰাষ্ট্ৰপতি ড’নাল্ড ট্ৰাম্পৰ প্ৰশাসনে ভাৰতৰ পৰা আমদানি কৰা সামগ্ৰীৰ ওপৰত আৰোপ কৰা অতিৰিক্ত ২৫ শতাংশ শুল্ক। এই শুল্কৰ ফলত ভাৰতীয় সামগ্ৰীৰ ওপৰত মুঠ শুল্ক ৫০ শতাংশলৈ বৃদ্ধি পাব। ৰাছিয়াৰ পৰা তেল ক্ৰয় কৰাৰ বাবে ভাৰতক শাস্তি দিয়াৰ উদ্দেশ্যে ট্ৰম্প প্ৰশাসনে এই সিদ্ধান্ত গ্ৰহণ কৰিছিল, যি ৰাছিয়াৰ অৰ্থনীতিক সহায় কৰা বুলি আমেৰিকাই বিবেচনা কৰিছিল। ট্ৰাম্প প্ৰশাসনে ইতিমধ্যে এই সন্দৰ্ভত খচৰা নিৰ্দেশনা প্ৰকাশ কৰিছে, যাক মঙলবাৰে আনুষ্ঠানিকভাৱে ঘোষণা কৰা হ’ব।

প্ৰকাশিত তথ্য এই নিৰ্দেশনা আমেৰিকাৰ গৃহ নিৰাপত্তা বিভাগ আৰু শুল্ক আৰু সীমা সুৰক্ষা বিভাগৰ যোগেদি প্ৰস্তুত কৰা হৈছে। ৬ আগষ্টত ট্ৰাম্পে জাৰি কৰা কাৰ্যবাহী আদেশৰ ভিত্তিত এই শুল্ক আৰোপ কৰা হৈছে, য’ত ৰাছিয়াৰ সৈতে বাণিজ্য কৰাৰ ফলত সৃষ্টি হোৱা ভাবুকি প্ৰতিহত কৰাৰ কথা উল্লেখ কৰা হৈছে। নিৰ্দেশনাত কোৱা হৈছে যে ভাৰতে ৰাছিয়াৰ পৰা প্ৰত্যক্ষ বা পৰোক্ষভাৱে তেল ক্ৰয় কৰি ৰাছিয়াৰ অৰ্থনীতিক সহায় কৰিছে, যাৰ ফলত এই অতিৰিক্ত শুল্কৰ প্ৰয়োজন হৈছে। এই শুল্ক নিৰ্ধাৰিত সময়ৰ পিছত আমেৰিকাৰ বজাৰত প্ৰৱেশ কৰা বা গুদামৰ পৰা ওলোৱা ভাৰতীয় সামগ্ৰীৰ ওপৰত প্ৰযোজ্য হ’ব। ভাৰতীয় সময় অনুসৰি বুধবাৰে পুৱা ৯:৩১ বজাৰ পৰা এই শুল্ক কাৰ্যকৰী হ’ব।

ভাৰত চৰকাৰে এই শুল্কক প্ৰত্যাহ্বান জনোৱাৰ লগতে লইয়াক মানি লোৱা নাই বুলি স্পষ্টভাবে প্ৰকাশ কৰিছে। প্ৰধানমন্ত্ৰী নৰেন্দ্ৰ মোদীয়ে সোমবাৰে গুজৰাটৰ আহমেদাবাদত এক অনুষ্ঠানত কয় যে, “যিমানেই হেঁচা নাহক কিয়, ইয়াৰ সন্মুখীন হ’বলৈ শক্তি বৃদ্ধি কৰিম। ভাৰতক আত্মনিৰ্ভৰশীল কৰাৰ সংকল্প লৈছিলোঁ আৰু সেই পথত আগবাঢ়িছো।”

জনিব পৰামতে মঙলবাৰে নতুন দিল্লীত এক উচ্চ পৰ্যায়ৰ বৈঠকত এই শুল্কৰ প্ৰভাৱ আৰু ৰপ্তানিকাৰকসকলৰ ওপৰত ইয়াৰ প্ৰভাৱৰ পৰ্যালোচনা কৰা হৈছে। বাণিজ্য বিশেষজ্ঞসকলে কয় যে এই শুল্ক ভাৰতীয় উদ্যোগসমূহক ক্ষতিগ্ৰস্ত কৰিব পাৰে, কিন্তু ভাৰতে আন্তঃৰাষ্ট্ৰীয় বজাৰত বিকল্প বিচাৰি আত্মনিৰ্ভৰতা বৃদ্ধি কৰাৰ দিশত গুৰুত্ব দিছে।