আদালতত আন এক বিপৰ্যয়ৰ সন্মুখীন হৈছে আমেৰিকাৰ ৰাষ্ট্ৰপতি ড’নাল্ড ট্ৰাম্প। আমেৰিকাৰ প্ৰয়াত ৰাষ্ট্ৰপতি জন এফ কেনেডীৰ সন্মানত দেশৰ ৰাজধানীত থকা এই কলা কেন্দ্ৰটোৰ নামকৰণ কৰা হয়। আমেৰিকাৰ ৰাষ্ট্ৰপতিগৰাকীয়ে নিজৰ নাম যোগ কৰি কেন্দ্ৰটোৰ নাম সলনি কৰে। এই কলা কেন্দ্ৰটোক বৰ্তমান ‘ট্ৰাম্প কেনেডি চেণ্টাৰ’ বুলি কোৱা হয়। আমেৰিকাৰ ফেডাৰেল আদালতে কেন্দ্ৰটোৰ পৰা ট্ৰাম্পৰ নাম আঁতৰোৱাৰ নিৰ্দেশ দিছে।
আদালতৰ মতে, বিখ্যাত কেনেডি চেণ্টাৰ ফৰ দ্য পাৰ্ফৰ্মিং আৰ্টছৰ নাম অবৈধভাৱে ৰাষ্ট্ৰপতি ড’নাল্ড ট্ৰাম্পৰ নামেৰে সলনি কৰা হৈছে। গতিকে ট্ৰাম্পৰ নাম আঁতৰাব লাগিব।
মন কৰিবলগীয়া যে যোৱা বছৰৰ ডিচেম্বৰ মাহত ট্ৰাম্পে জন এফ কেনেডি চেণ্টাৰ ফৰ দ্য পাৰফৰ্মিং আৰ্টছৰ নাম সলনি কৰিছিল। দ্বিতীয় কাৰ্যকালৰ আৰম্ভণিতে তেওঁ নিজকে সংস্থাটোৰ অধ্যক্ষ হিচাপে নিযুক্তি দিয়ে। কেন্দ্ৰটোৰ পৰিচালনা পৰিষদে (যিটো ট্ৰাম্পে নিজৰ মানুহৰ দ্বাৰা বনাইছে) নামটো ‘ট্ৰাম্প কেনেডি চেণ্টাৰ’লৈ সলনি কৰাৰ সপক্ষে ভোটদান কৰে। এই নাম সলনিক লৈও প্ৰশ্ন উত্থাপন হৈছে।
শুকুৰবাৰে আমেৰিকাৰ ফেডাৰেল ন্যায়াধীশ ক্রিষ্টোফাৰ কুপাৰে ৰায় দিয়ে যে ভৱনটোৰ নাম সলনি কৰাৰ ক্ষমতা কেৱল কংগ্ৰেছৰহে আছে। আদালতে কয় যে ব’ৰ্ডে একপক্ষীয়ভাৱে কেনেডি চেণ্টাৰৰ নাম সলনি কৰি ৰাষ্ট্ৰপতি ট্ৰাম্প কৰি নিজৰ আইনী কৰ্তৃত্ব উলংঘা কৰিছে। আদালতে তাৰ পৰা ট্ৰাম্পৰ নামটো আঁতৰাবলৈ ১৪ দিনৰ সময়সীমাও নিৰ্ধাৰণ কৰে। এই ৰায়দানৰ ফলত ভৱনটো মেৰামতিৰ বাবে দুবছৰৰ বাবে বন্ধ কৰাৰ পৰিকল্পনাও বন্ধ কৰি দিয়া হয়।
ইয়াৰ পিছতে ট্ৰাম্পে ছ’চিয়েল মিডিয়াত নিজৰ ক্ষোভ প্ৰকাশ কৰে। তেওঁ ন্যাযাধীশজনক তীব্ৰ সমালোচনা কৰি কেন্দ্ৰটোক “মৃতপ্ৰায়” বুলিও অভিহিত কৰে। কেন্দ্ৰটোৰ পৰা নিজকে আঁতৰাই নিয়াৰ কথাও ঘোষণা কৰে ট্ৰাম্পে।
পোষ্টটোত ট্ৰাম্পে লিখিছে, “আমি তেওঁলোকৰ সৈতে কাম কৰি এই ব্যৰ্থ প্ৰতিষ্ঠানটো কংগ্ৰেছলৈ ঘূৰাই দিম যাতে তেওঁলোকে ইয়াৰ বাবে কি কৰিব সেইটো সিদ্ধান্ত ল’ব পাৰে।” একে সময়তে আমেৰিকাৰ ৰাষ্ট্ৰপতিগৰাকীয়ে কয় যে যেতিয়ালৈকে তেওঁ কাম কৰিবলৈ স্বাধীন, তেতিয়ালৈকে “নেভাৰ নেভাৰ লেণ্ড”ৰ দিশত হতাশাজনক যাত্ৰা অব্যাহত ৰখাৰ তেওঁৰ কোনো আগ্ৰহ নাই।
