ইৰাণৰ বিৰুদ্ধে যুদ্ধংদেহী স্থিতি গ্ৰহণ কৰা আমেৰিকা যুক্তৰাষ্ট্ৰৰ ৰাষ্ট্ৰপতি ডনাল্ড ট্ৰাম্পৰ সামৰিক ক্ষমতাত আনুষ্ঠানিকভাৱে লেকাম লগালে আমেৰিকান কংগ্ৰেছে। বুধবাৰে হাউছ অৱ ৰিপ্ৰেজেণ্টেটিভছে ২১৫-২০৮ ভোটৰ ব্যৱধানত ৰাষ্ট্ৰপতিগৰাকীৰ যুদ্ধৰ ক্ষমতা হ্ৰাস কৰাৰ উদ্দেশ্যে এক ঐতিহাসিক প্ৰস্তাৱ গৃহীত কৰে। বিগত তিনি মাহ ধৰি চলি থকা সংঘাতৰ ক্ষেত্ৰত প্ৰশাসনৰ পৰিচালনাক প্ৰথমবাৰৰ বাবে কঠোৰ সমালোচনা কৰি এই প্ৰস্তাৱ গৃহীত কৰা হৈছে।
ডেম’ক্ৰেট দলৰ এই প্ৰস্তাৱত ৱাৰেন ডেভিদছন, ব্ৰায়ান ফিটজপেট্ৰিক, টম বাৰেট আৰু থমাছ মেছি নামৰ চাৰিগৰাকী ৰিপাব্লিকান সদস্যয়ো সমৰ্থন আগবঢ়ায়। ইয়াৰ উপৰি পূৰ্বতে বিৰোধিতা কৰা ডেম’ক্ৰেট সদস্য জেৰেড গ’ল্ডেনেও এইবাৰ সমৰ্থন কৰে। এই প্ৰস্তাৱ অনুসৰি, আনুষ্ঠানিক যুদ্ধ ঘোষণা বা শক্তি প্ৰয়োগৰ আইনী অনুমোদন অবিহনে ৰাষ্ট্ৰপতি ট্ৰাম্পে ইৰাণৰ চৰকাৰ বা সামৰিক বাহিনীৰ বিৰুদ্ধে আমেৰিকাৰ সশস্ত্ৰ বাহিনী ব্যৱহাৰ কৰিব নোৱাৰিব। এই প্ৰস্তাৱটো বৰ্তমান উচ্চ সদন ‘চিনেট’লৈ প্ৰেৰণ কৰা হ’ব, আৰু চিনেটে অনুমোদন জনালেও ইয়াৰ কোনো আইনী বাধ্যবাধকতা নাথাকিব তথা ৰাষ্ট্ৰপতিৰ ভেটো প্ৰয়োগৰো সুবিধা নাথাকিব।
যোৱা ২৮ ফেব্ৰুৱাৰীত আমেৰিকা আৰু ইজৰাইলে ইৰাণৰ ওপৰত আক্ৰমণ চলোৱাৰ পিছৰে পৰা এই যুদ্ধৰ আৰম্ভণি হৈছিল। ইয়াৰ প্ৰত্যুত্তৰত ইৰাণে উপসাগৰীয় অঞ্চলত থকা ইজৰাইল আৰু আমেৰিকাৰ মিত্ৰদেশসমূহত আক্ৰমণ চলোৱাৰ লগতে সামুদ্ৰিক বাণিজ্যৰ অন্যতম পথ হৰমুজ প্ৰণালী বন্ধ কৰি দিছিল। এপ্ৰিল মাহত আমেৰিকাই ইৰাণৰ উপকূললৈ যাতায়াত কৰা জাহাজৰ ওপৰত অৱৰোধ আৰোপ কৰিছিল আৰু ৮ এপ্ৰিলত দুয়োপক্ষৰ মাজত এক প্ৰাথমিক যুদ্ধবিৰতি চুক্তি সম্পন্ন হৈছিল। এই চুক্তিৰ পিছতো শেহতীয়াকৈ আমেৰিকাই পুনৰ ইৰাণত আক্ৰমণ চলায় আৰু ইৰাণেও আমেৰিকাৰ মিত্ৰদেশ কুৱেইটত আক্ৰমণ সংঘটিত কৰে। ইৰাণ যুদ্ধ আৰম্ভ হোৱাৰ পৰা সদনত ডেম’ক্ৰেট নেতৃত্বাধীন এনে প্ৰস্তাৱৰ ওপৰত অনুষ্ঠিত হোৱা এয়া আছিল চতুৰ্থটো ভোটদান, যাৰ পূৰ্বৰ আটাইকেইটা প্ৰয়াস ব্যৰ্থ হৈছিল।
ভোটদানৰ অন্তত হাউছ ফৰেইন এফেয়াৰ্ছৰ জ্যেষ্ঠ ডেম’ক্ৰেট সদস্য গ্ৰেগৰী মিকছে কয় যে কংগ্ৰেছে আজি সংবিধান মানি চলিছে আৰু এই যুদ্ধৰ অন্ত পেলাবলৈ ডেম’ক্ৰেট তথা ৰিপাব্লিকান উভয় দলেই একমত প্ৰকাশ কৰিছে। ইন্ধনৰ মূল্যবৃদ্ধি আৰু জনসাধাৰণৰ বিৰোধিতাৰ প্ৰতি লক্ষ্য ৰাখি এই প্ৰস্তাৱটোৱে প্ৰশাসনৰ ওপৰত চাপ সৃষ্টি কৰিব বুলি ধাৰণা কৰা হৈছে। আনহাতে, ভোটদানৰ পূৰ্বে অধ্যক্ষ মাইক জনছনে এই প্ৰস্তাৱৰ বিৰোধিতা কৰি কয় যে বৰ্তমানৰ পৰিস্থিতিত প্ৰশাসন আৰু মুখ্য সেনাধ্যক্ষৰ পৰা আলোচনাৰ ক্ষমতা কাঢ়ি নিয়াটো অতি বিপদজনক বিষয় হ’ব পাৰে। হোৱাইট হাউছৰ এগৰাকী বিষয়াই ভোটদান প্ৰক্ৰিয়াটোক গুৰুত্বহীন বুলি দাবী কৰি কয় যে ছগৰাকী ৰিপাব্লিকান সদস্যৰ অনুপস্থিতিৰ বাবেহে ই গৃহীত হৈছে। বিষয়াগৰাকীয়ে লগতে স্পষ্ট কৰে যে ৰাষ্ট্ৰপতি ট্ৰাম্পে মুখ্য সেনাধ্যক্ষ হিচাপে নিজৰ সাংবিধানিক ক্ষমতা প্ৰয়োগ কৰি দেশৰ ৰাষ্ট্ৰীয় নিৰাপত্তা সুনিশ্চিত কৰাৰ কাম অব্যাহত ৰাখিব।
ইপিনে, বুধবাৰে হোৱাইট হাউছত সাংবাদিকৰ আগত ৰাষ্ট্ৰপতি ডনাল্ড ট্ৰাম্পে কয় যে যুদ্ধৰ অন্ত পেলাবৰ বাবে চলি থকা আলোচনা অতি সুচাৰুৰূপে আগবাঢ়িছে আৰু চলিত সপ্তাহান্ততে ই চূড়ান্ত ৰূপ পোৱাৰ সম্ভাৱনা আছে। শেহতীয়া আক্ৰমণৰ কথা স্বীকাৰ কৰি তেওঁ কয় যে তেওঁৰ প্ৰশাসনে অতি সোনকালে এক চুক্তিৰ জৰিয়তে এই সংঘাতৰ অৱসান ঘটোৱাৰ আশা কৰিছে আৰু দুয়োপক্ষ চুক্তিত স্বাক্ষৰ কৰাৰ দিশে দ্ৰুতগতিৰে অগ্ৰসৰ হৈছে।
