ধন ঘটাৰ বাবে সাধাৰণতে কোনো ব্যক্তিয়ে চুৰি আৰু ডকাইতিৰ পথত ভৰি দিয়ে। নিৰাপত্তাৰ সংশয় থাকিলেও ধন উপাৰ্জনৰ বাবেই এনে বে-আইনী কাৰ্য বাচি লয় বহু লোকে। কিন্তু ফ্ল’ৰিডাৰ এগৰাকী লোকৰ ডকাইতিৰ আঁৰৰ কাৰণ শুনি চকু কপালত উঠিল আৰক্ষীৰ। ডকাইতিৰ উদ্দেশ্য শুনিলে হতভম্ব হ’ব আপুনিও।
দুটাকৈ ডকাইতিৰে চৰ্চালৈ অহা ফ্ল’ৰিডাৰ এই ব্যক্তিগৰাকীৰ নাম নিকোলাছ জাপাটাৰ-লামাড্ৰিড। ৪৫ বৰ্ষীয় লামাড্ৰিডে শেহতীয়াকৈ অৰলেণ্ডোৰ টি ডি বেংক আৰু চাৰ্কল কে গেছ ষ্টেচনত দুদিনৰ ব্যৱধানত দুটাকৈ ডকাইতি কাণ্ড সংঘটিত কৰিছে।
আৰক্ষীয়ে ডকাইতিৰ গোচৰত লামাড্ৰিড জড়িত থকাৰ প্ৰমাণ লাভ কৰাৰ লগে লগে তেওঁক গ্ৰেপ্তাৰ কৰে। ডকাইতিৰ সন্দৰ্ভত আৰক্ষীয়ে লামাড্ৰিডেক জেৰা কৰাৰ পাছতে তেওঁৰ পৰা ডকাইতিৰ উদ্দেশ্য শুনি আচৰিত হৈ পৰে।
লামাড্ৰিডে আৰক্ষীক দিয়া ভাষ্য মতে দৈনন্দিন জীৱনত বিৰক্ত হৈয়ে এই ডকাইতি দুটা কৰিছিল। দুয়োটা ডকাইতিতে লামাড্ৰিডে “পুলিচ” বুলি লিখা এটা ক’লা টুপী আৰু এযোৰ ছানগ্লাছ পৰিধান কৰি গৈছিল।
আৰক্ষীয়ে জানিবলৈ দিয়া মতে যোৱা ৫ ডিচেম্বৰৰ পুৱা প্ৰায় ৯:৩০ বজাত লামাড্ৰিডেই টিডি বেংকত প্ৰথমটো ডকাইতি চলায়। ইয়াৰ দুদিন পিছত অৰ্থাৎ ৭ ডিচেম্বৰত প্ৰায় ৭ বজাত চাৰ্কল কেত দ্বিতীয়টো ডকাইতি কৰে লামাড্ৰিডে।
আৰক্ষীৰ মতে, ডকাইতিৰ সময়ত লামাড্ৰিডে নিজৰ হাত পেন্টৰ জেপত ভৰাই ৰাখিছিল। ইয়াৰ পৰা লামাড্ৰিডেৰ হাতত কোনো অস্ত্ৰ থকা বুলি আৰক্ষীয়ে সন্দেহ কৰে।
ডকাইতিৰ প্ৰায় দুই মিনিটৰ পাছত যেতিয়া আৰক্ষী সেই স্থানত উপস্থিত হয়, তেতিয়া লামাড্ৰিডে ডকাইতিৰ হোৱা ধন আৰু হাতত এটা চিগাৰেট লৈ দোকানৰ বাহিৰত থিয় হৈ আছিল বুলি আৰক্ষীয়ে লগতে উল্লেখ কৰে।
আৰক্ষীয়ে লগে লগে লামাড্ৰিডেক গ্ৰেপ্তাৰ কৰাৰ পিছত তেওঁ অৰলেণ্ডো আৰক্ষী বিভাগক ডকাইতিৰ সম্পূৰ্ণ স্বীকাৰোক্তি দিয়ে আৰু তেওঁ বিৰক্ত হোৱাৰ বাবেই এই অপৰাধ সংঘটিত কৰিছে বুলি জানিবলৈ দিয়ে।
বিৰক্তিৰ অৱসান ঘটোৱাৰ এনে আজৱ কায়দা অনুসৰণ কৰি লামাড্ৰিড এতিয়া সমগ্ৰ বিশ্বতে চৰ্চিত হৈ পৰিছে।
