আমেৰিকাৰ পৰা বিতাড়িত অবৈধ অনুপ্ৰৱেশকাৰী কঢ়িয়াই অনা তৃতীয়খন বিমান ভাৰতত উপস্থিত হৈছে। দেওবাৰে নিশা প্ৰায় ১০ মান বজাত পঞ্জাৱৰ অমৃতসৰত শতাধিক অবৈধ অনুপ্ৰৱেশকাৰীক লৈ এখন আমেৰিকান বিমান অৱতৰণ কৰে।
ড’নাল্ড ট্ৰাম্প আমেৰিকাৰ ৰাষ্ট্ৰপতি হোৱাৰ পিছত সেই দেশৰ পৰা অবৈধ অনুপ্ৰৱেশকাৰীক নিজৰ দেশলৈ বিতাড়িত কৰিবলৈ আৰম্ভ কৰে। ড’নাল্ড ট্ৰাম্প প্ৰশাসনে শনিবাৰে দ্বিতীয় পৰ্যায়ত ১১৬ জন অবৈধ অনুপ্ৰৱেশকাৰীক ভাৰতলৈ বিতাড়িত কৰে। এইবাৰ আৰু ১১২ জন অবৈধ অনুপ্ৰৱেশকাৰীৰ সৈতে অমৃতসৰত অৱতৰণ কৰে আমেৰিকাৰ বায়ুসেনাৰ চি-১৭ গ্ল’বমাষ্টাৰ বিমান।
বাতৰি অনুসৰি, এই ১১২ জন অবৈধ অনুপ্ৰৱেশকাৰীৰ অধিকাংশই হাৰিয়ানাৰ বাসিন্দা। হাৰিয়ানাৰ ৪৪জন, গুজৰাটৰ ৩৩জন আৰু পঞ্জাৱৰ ৩১জন লোক এই তালিকাত আছে। ইয়াৰ বাহিৰেও উত্তৰ প্ৰদেশৰ দুজন বাসিন্দা, এজন উত্তৰাখণ্ড আৰু এজন হিমাচল প্ৰদেশৰ।
পূৰ্বৰ দুটা পৰ্যায়ত বিতাড়িত হোৱা অবৈধ অনুপ্ৰৱেশকাৰীৰ অধিকাংশই আছিল পঞ্জাৱৰ বাসিন্দা। এইবাৰৰ তালিকাত পঞ্জাৱৰ পৰাও যথেষ্ট সংখ্যক অবৈধ অনুপ্ৰৱেশকাৰীৰ নাম সন্নিবিষ্ট কৰা হৈছে। অৱশ্যে হাৰিয়ানা আৰু গুজৰাটৰ বাসিন্দাৰ সংখ্যা আৰু অধিক।
আমেৰিকাৰ পৰা অবৈধ অনুপ্ৰৱেশকাৰীক কঢ়িয়াই অনা বিমান কিয় পঞ্জাৱত অৱতৰণ কৰা হৈছে বুলি প্ৰশ্ন উত্থাপন কৰিছে পঞ্জাৱৰ মুখ্যমন্ত্ৰী তথা আম আদমি পাৰ্টিৰ নেতা ভাগৱত মানে।
তেওঁৰ প্ৰশ্ন হ’ল, “আমেৰিকাৰ পৰা অবৈধ অনুপ্ৰৱেশকাৰীক কঢ়িয়াই অনা বিমান কেৱল পঞ্জাৱত কিয় অৱতৰণ কৰিছে?” আমেৰিকাৰ বিমান কিয় দেশৰ ৰাজধানী দিল্লীলৈ উৰা মৰা নাই?” মানে দাবী কৰে যে এইটো আচলতে এটা ‘ষড়যন্ত্ৰ’। সমগ্ৰ দেশৰ সন্মুখত পঞ্জাৱ আৰু পাঞ্জাবীক তুচ্ছ-তাচ্ছিল্য কৰাৰ ষড়যন্ত্ৰ ৰচনা কৰা হৈছে বুলি অভিযোগ উত্থাপন কৰে। পঞ্জাৱত বিমান অৱতৰণ কৰি এটা বাৰ্তা প্ৰেৰণ কৰা হৈছে যেন কেৱল পাঞ্জাবীয়েহে অবৈধভাৱে আমেৰিকালৈ যায়।
ট্ৰাম্প দ্বিতীয় বাৰৰ বাবে ক্ষমতালৈ অহাৰ পিছত ৫ ফেব্ৰুৱাৰীত প্ৰথম পৰ্যায়ত অবৈধ অনুপ্ৰৱেশকাৰীক ভাৰতলৈ বিতাড়িত কৰা হৈছিল। সেইদিনা ১০৪ জন অবৈধ অনুপ্ৰৱেশকাৰীক লৈ অমৃতসৰত উপস্থিত হয় এখন আমেৰিকান সামৰিক বিমান। ইয়াৰে অধিকাংশই আছিল পঞ্জাৱ, গুজৰাট, আৰু হাৰিয়ানাৰ বাসিন্দা। শনিবাৰে নিশা দ্বিতীয়খন বিমানত অহা ১১৬ জন লোকৰ ভিতৰত ৬৫ জন আছিল পঞ্জাৱৰ বাসিন্দা।
