ইৰানৰ ইউৰেনিয়াম সমৃদ্ধকৰণ কাৰ্যকলাপৰ বিৰুদ্ধে আপত্তি কৰিছে আমেৰিকা যুক্তৰাষ্ট্ৰই। তেওঁলোকৰ মতে, ইৰানে পৰমাণু অস্ত্ৰ তৈয়াৰ কৰিব পাৰে। ইৰানে যি মাত্ৰাত ইউৰেনিয়াম গোটাইছে কৰিছে, তাৰ পৰা পৰমাণু বোমা তৈয়াৰ কৰিব পৰিব।
উল্লেখ্য যে ২০১৫ চনৰ পৰমাণু চুক্তি অনুসৰি ইউৰেনিয়াম সমৃদ্ধকৰণ ৩.৬৭%ত সীমিত ৰখাৰ সিদ্ধান্ত কৰিছিল, কিন্তু ইৰানে এই পৰিমাণ ৬০%লৈ বৃদ্ধি কৰিছে, যিটো শান্তিপূৰ্ণ শক্তি উৎপাদনৰ বাবে প্ৰয়োজনতকৈ বহু বেছি। এই সন্দৰ্ভত আমেৰিকাই সামৰিক পদক্ষেপৰ ভাবুকি দিছে, কিন্তু ইৰানে দাবী কৰিছে যে কেৱল শান্তিপূৰ্ণ শক্তিৰ বাবে ইউৰেনিয়াম গোটোৱা হৈছে।
এই বৰ্ধিত উত্তেজনাৰ মাজতে জাতিসংঘৰ পৰমাণু নিৰীক্ষক সংস্থা (IAEA)ৰ প্ৰধান ৰাফায়েল গ্ৰছি ২৩-২৪ এপ্ৰিলত ইৰান ভ্ৰমণ কৰিব। ইৰানে IAEAৰ নিৰীক্ষকসকলৰ প্ৰৱেশ সীমিত কৰিছে আৰু নিৰীক্ষণ কেমেৰা বিঘ্নিত কৰিছে, যাৰ ফলত তেওঁলোকৰ কাৰ্যক্ৰমৰ তদাৰক কৰা কঠিন হৈ পৰিছে। গ্ৰছিৰ এই ভ্ৰমণৰ লক্ষ্য হৈছে ইৰানৰ সৈতে সহযোগিতা বৃদ্ধি কৰা আৰু তেওঁলোকৰ পৰমাণু কাৰ্যক্ৰমৰ স্বচ্ছতা নিশ্চিত কৰা।
যদিও যুক্তৰাষ্ট্ৰ আৰু ইৰানৰ মাজত পৰমাণু আলোচনা চলি থকাৰ পাছতো অব্যাহত আছে মতানৈক্য। ইৰানে ইউৰেনিয়াম সংগ্ৰহ বন্ধ কৰিবলৈ অস্বীকাৰ কৰিছে ইয়অৰ পৰিৱৰ্তে আমেৰিকাই কঠোৰ সীমা আৰু নিৰীক্ষণৰ দাবী জনাইছে।
IAEAৰ মতে, ইৰানৰ উচ্চ সমৃদ্ধ ইউৰেনিয়ামৰ মজুত এতিয়া কেইবাটাও পৰমাণু বোমা তৈয়াৰৰ বাবে যথেষ্ট। গ্ৰছিৰ ভ্ৰমণ আৰু আগন্তুক আলোচনাৰ জৰিয়তে এই সমস্যাৰ শান্তিপূৰ্ণ সমাধান বিচাৰি উলিওৱাৰ প্ৰচেষ্টা অব্যাহত আছে।
ইফালে ইৰানে বাৰে বাৰে দাবী কৰিছে যে তেওঁলোকৰ পৰমাণু কাৰ্যক্ৰম কেৱল শক্তি উৎপাদন আৰু শান্তিপূৰ্ণ উদ্দেশ্যৰ বাবে। কিন্তু এই যুক্তি পশ্চিমীয়া দেশসমূহে গ্ৰহণ কৰা নাই। ২০২৫ চনৰ মাৰ্চত ট্ৰাম্পে ইৰানৰ ধৰ্মীয় নেতা আয়াতুল্লাহ আলী খামেনেইলৈ এখন পত্ৰ প্ৰেৰণ কৰি পৰমাণু চুক্তিৰ বাবে দুই মাহৰ সময়সীমা নিৰ্ধাৰণ কৰে আৰু আলোচনা নহ’লে সামৰিক ব্যৱস্থাৰ ভাবুকি প্ৰদান কৰিছিল। প্ৰথমে ইৰানৰ ৰাষ্ট্ৰপতি মাছুদ পেস্কোভৰ চৰকাৰে আলোচনাৰ পৰা আঁতৰি থাকিলেও, আমেৰিকাৰ হেঁচাত এপ্ৰিল মাহৰ আৰম্ভণিতে ওমানত দুয়োপক্ষৰ প্ৰতিনিধিৰ মাজত পৰোক্ষ আলোচনা অনুষ্ঠিত হয়।
