আমদানী কৰা সামগ্ৰীত বলপূৰ্বক শ্ৰম ব্যৱহাৰ কৰাৰ অভিযোগত আমেৰিকা যুক্তৰাষ্ট্ৰই ভাৰত আৰু চীনকে ধৰি বিশ্বৰ ৬০ খন দেশৰ ওপৰত নতুন কৰ বা মাচুল জাপি দিয়াৰ প্ৰস্তুতি চলাইছে। আমেৰিকাৰ বাণিজ্য প্ৰতিনিধি কাৰ্যালয়ে প্ৰস্তাৱ দিছে যে এই দেশসমূহৰ পৰা আমদানী কৰা সামগ্ৰীৰ ওপৰত ১২.৫ শতাংশ পৰ্যন্ত কৰ আৰোপ কৰা হ‘ব পাৰে। এই পদক্ষেপ ১৯৭৪ চনৰ আমেৰিকাৰ বাণিজ্য আইনৰ ধাৰা ৩০১ ৰ অধীনত লোৱা হৈছে। উল্লেখযোগ্য যে ৰাষ্ট্ৰপতি ডনাল্ড ট্ৰাম্পৰ প্ৰথম কাৰ্যকালত চীনৰ সামগ্ৰীৰ ওপৰতো এই একেখন আইনৰ অধীনতে কৰ আৰোপ কৰা হৈছিল। ধাৰা ৩০১ হৈছে আমেৰিকাৰ এনে এক আইন যাৰ জৰিয়তে তেওঁলোকে অনুচিত ব্যৱসায়িক প্ৰথাৰে আমেৰিকাৰ স্বাৰ্থ বিঘ্নিত কৰা বুলি ভবা দেশসমূহৰ ওপৰত কৰ আৰোপ কৰিব পাৰে।
অৱশ্যে এই প্ৰস্তাৱৰ ওপৰত এতিয়াও পৰ্যালোচনা চলি আছে আৰু কোনো চূড়ান্ত সিদ্ধান্ত গ্ৰহণ কৰা হোৱা নাই। যদি এই নিয়ম কাৰ্যকৰী হয়, তেন্তে ই বিশ্বৰ বাণিজ্যত এক ডাঙৰ প্ৰভাৱ পেলাব। ভাৰত আৰু আমেৰিকাৰ বিষয়াসকলৰ মাজত ২ জুনৰ পৰা ৪ জুনলৈ চলি থকা বাণিজ্যিক আলোচনাৰ মাজতেই এই নতুন কৰৰ প্ৰস্তাৱ পোহৰলৈ আহিছে। আমেৰিকাৰ মতে, যিবোৰ দেশে বলপূৰ্বক শ্ৰমৰ জৰিয়তে উৎপাদিত সামগ্ৰী আংশিক বা সম্পূৰ্ণৰূপে নিষিদ্ধ কৰাৰ ক্ষেত্ৰত কঠোৰ নিয়ম মানি চলা নাই, তেওঁলোকৰ ওপৰত ১০ শতাংশ আৰু যিবোৰ দেশে এনে কোনো নিষেধাজ্ঞা একেবাৰেই আৰোপ কৰা নাই, তেওঁলোকৰ ওপৰত ১২.৫ শতাংশ কৰ জাপি দিয়া হ‘ব।
আমেৰিকাৰ বাণিজ্য প্ৰতিনিধি জেমিছন গ্ৰীৰে কয় যে বলপূৰ্বক শ্ৰমৰ জৰিয়তে উৎপাদিত সামগ্ৰীৰ আমদানীয়ে আমেৰিকাৰ শ্ৰমিকসকলৰ বাবে এক অসম প্ৰতিযোগিতাৰ সৃষ্টি কৰিছে, যিটো কোনো কাৰণতে গ্ৰহণযোগ্য নহয়। প্ৰতিবেদন অনুসৰি, ভাৰত আৰু চীন এনে ৫৪ খন দেশৰ ভিতৰত আছে যিয়ে বলপূৰ্বক শ্ৰম নিষিদ্ধ কৰিবলৈ কোনো আইনী ব্যৱস্থা লোৱা নাই আৰু থকা নিয়মবোৰো সঠিকভাৱে পালন কৰা নাই। আমেৰিকাৰ মতে, এনে সামগ্ৰীবোৰ কম খৰচত বিশ্বৰ বজাৰত প্ৰৱেশ কৰে, যাৰ ফলত শ্ৰমিকৰ অধিকাৰ কঠোৰভাৱে ৰক্ষা কৰা দেশবোৰৰ ব্যৱসায়িক ক্ষতি হয়। চীন দেশ ইতিমধ্যে আমেৰিকাৰ বহুতো ব্যৱসায়িক আৰু শ্ৰম সম্পৰ্কীয় নিৰীক্ষণৰ অধীনত থকাৰ পিছতো এই একেটা তালিকাতে আকৌ অন্তৰ্ভুক্ত হৈছে।
ভাৰত আৰু চীনৰ উপৰিও এই তালিকাত ইউৰোপীয় ইউনিয়ন, জাপান, দক্ষিণ কোৰিয়া, ব্ৰিটেইন, ভিয়েটনাম, বাংলাদেশ, থাইলেণ্ড, কানাডা আৰু মেক্সিকোৰ দৰে দেশো অন্তৰ্ভুক্ত আছে। ইয়াৰে কানাডা, মেক্সিকো, পাকিস্তান, ইণ্ডোনেছিয়া, ইকুৱেডৰ আৰু ইউৰোপীয় ইউনিয়নৰ দৰে ছখন দেশত আইনী নিষেধাজ্ঞা আছে যদিও সেয়া কাৰ্যকৰী কৰাত তেওঁলোক ব্যৰ্থ হৈছে বুলি কোৱা হৈছে। বৰ্তমান এই সমগ্ৰ বিষয়টো প্ৰাৰম্ভিক পৰ্যায়ত আছে আৰু ইয়াক চূড়ান্ত ৰূপ দিয়াৰ আগতে আৰু অধিক আলোচনা কৰা হ‘ব। লগতে বস্ত্ৰ আৰু সাজ-পাৰ আমদানীৰ বাবে এক সুকীয়া ব্যৱস্থাৰ প্ৰস্তাৱ দিয়া হৈছে যদিও ইয়াৰ সবিশেষ এতিয়াও প্ৰকাশ কৰা নাই। যদি এই প্ৰস্তাৱসমূহ গৃহীত হয়, তেন্তে ই ভাৰত আৰু চীনকে ধৰি সমগ্ৰ এছিয়াৰ ৰপ্তানিকাৰকসকলৰ বাবে এক ডাঙৰ প্ৰত্যাহ্বান হৈ পৰিব।
