মধ্যপ্ৰাচ্যৰ যুদ্ধৰ মাজতে আমেৰিকাই মঙলবাৰে নিশা কেলিফৰ্ণিয়াৰ উপকূলত এটা ডুমছডে বেলিষ্টিক মিছাইল পৰীক্ষা কৰে। এই ‘মিনিটমেন ৩’ হিৰোচিমাত নিক্ষেপ কৰা পৰমাণু বোমাতকৈ ২০ গুণ বেছি শক্তিশালী। নিশা ১১ বজাত চান্টা বাৰ্বাৰাৰ সমীপৰ ভাণ্ডেনবাৰ্গ মহাকাশ বাহিনী ঘাটিৰ পৰা নিক্ষেপ কৰা হৈছিল এই বেলিষ্টিক মিছাইল।
আনহাতে ইৰাণে স্পষ্টভাৱে সকীয়াই দিছে যে যদি আমেৰিকা আৰু ইজৰাইলে তেওঁলোকৰ বৰ্তমানৰ শাসন ব্যৱস্থাক উফৰাই পেলাবলৈ চেষ্টা কৰে তেন্তে ইজৰাইলৰ পাৰমাণৱিক কেন্দ্ৰসমূহত পোনপোটীয়াকৈ আক্ৰমণ কৰা হ’ব।
আমেৰিকাৰ বায়ুসেনাৰ তথ্য অনুসৰি জিটি ২৫৪ নামেৰে পৰিচিত এই নিৰস্ত্ৰ ৰকেটটোৱে পশ্চিম মধ্য প্ৰশান্ত মহাসাগৰৰ মাৰ্শ্বেল দ্বীপপুঞ্জৰ ওচৰত ইয়াৰ লক্ষ্যত আঘাত কৰে। বায়ুসেনাৰ গ্ল’বেল ষ্ট্ৰাইক কমাণ্ডৰ মতে, এই ক্ষেপণাস্ত্ৰৰ ফলপ্ৰসূতা, প্ৰস্তুতি আৰু নিৰ্ভুলতা পৰীক্ষা কৰিবলৈ নিক্ষেপ কৰা হৈছিল।
ইপিনে, ইৰাণৰ জনসাধাৰণৰ বাবে শাসন ব্যৱস্থা পৰিৱৰ্তনৰ পৰিস্থিতি সৃষ্টি কৰাৰ লক্ষ্যৰে শেহতীয়াকৈ সংঘটিত সামৰিক অভিযান চলোৱাৰ কথা জনায় ইজৰাইলৰ প্ৰধানমন্ত্ৰী বেঞ্জামিন নেতানিয়াহু আৰু আমেৰিকাৰ ৰাষ্ট্ৰপতি ড’নাল্ড ট্ৰাম্পে। তেহৰানে এই বক্তব্যসমূহক নিজৰ আভ্যন্তৰীণ বিষয়ত প্ৰত্যক্ষ হস্তক্ষেপ বুলি গণ্য কৰে।
সূত্ৰ অনুসৰি, আমেৰিকা আৰু ইজৰাইলৰ কৌশল কেৱল সামৰিক ঘাটিতে সীমাবদ্ধ নহয়। ইছলামিক ৰিভল্যুচনেৰী গাৰ্ড কৰ্পছ আৰু আনুষংগিক অৰ্ধসামৰিক সংগঠনৰ উপৰিও আৰক্ষী থানাকো লক্ষ্য কৰি লোৱা হৈছে। তেহৰাণৰ একাংশ আৰক্ষী ঘাটিতো আক্ৰমণৰ খবৰ আহিছে। ইয়াৰ ফলত আভ্যন্তৰীণ নিৰাপত্তা ব্যৱস্থাৰ ওপৰত হেঁচা বাঢ়িছে বুলি ধাৰণা কৰা হৈছে। আৰু সেইবাবেই ডাঙৰ আক্ৰমণৰ হুংকাৰ দিয়া হৈছে।
