ইজৰাইলৰ এক সমাৱেশত সন্ত্ৰাসবাদী আক্ৰমণৰ পিছত আমেৰিকাৰ ৰাষ্ট্ৰপতি ড’নাল্ড ট্ৰাম্পে ১২খন দেশৰ নাগৰিকক আমেৰিকাত প্ৰৱেশ কৰাত সম্পূৰ্ণ নিষেধাজ্ঞা আৰোপ কৰিছে। বুধবাৰে ৰাষ্ট্ৰীয় নিৰাপত্তাৰ বিষয়ক এক নিৰ্দেশনাত স্বাক্ষৰ কৰে।
আল জাজিৰাৰ মতে, আমেৰিকাত প্ৰৱেশ নিষিদ্ধ কৰা দেশসমূহৰ ভিতৰত আফগানিস্তান, চাড, কংগো, ইকুৱেটৰিয়েল গিনি, ইৰিত্ৰিয়া, হাইটি, ইৰাণ, লিবিয়া, ম্যানমাৰ, ছোমালিয়া, চুডান আৰু য়েমেন। হোয়াইট হাউছে আৰু ৭খন দেশৰ নাগৰিকৰ ওপৰত কঠোৰ ভ্ৰমণ নিষেধাজ্ঞা আৰোপ কৰিছে। অহা সোমবাৰৰ পৰা কাৰ্যকৰী হ’ব ট্ৰাম্পৰ এই নতুন নিৰ্দেশনা।
এই সন্দৰ্ভত এক বিবৃতিত ট্ৰাম্পে কয় যে ৰাষ্ট্ৰীয় নিৰাপত্তা আৰু আমেৰিকাৰ জনসাধাৰণৰ স্বাৰ্থ সুৰক্ষিত কৰাৰ বাবে এই পদক্ষেপ ল’বলগীয়া হৈছে। ট্ৰাম্পে স্পষ্ট কৰি দিছে যে শেহতীয়াকৈ ক’লৰাড’ত ইজৰাইলী সমৰ্থক সমাৱেশত হোৱা আক্ৰমণে তেওঁক কঠিন সিদ্ধান্ত ল’বলৈ বাধ্য কৰাইছে। তেওঁ লগতে দাবী কৰে যে, “এনে কাণ্ডই প্ৰমাণ কৰে যে বৃহৎ সংখ্যক বিদেশীৰ প্ৰৱেশ দেশৰ বাবে কিমান বিপজ্জনক হৈ পৰিছে। ট্ৰাম্পে লগতে কয় যে, ইউৰোপত যি হ’ল, সেয়া আমেৰিকাত হ’বলৈ দিয়া নহ’ব।
কিছুদিন পূৰ্বে ইজৰাইল-পেলেষ্টাইনৰ সংঘাতৰ মাজতে আমেৰিকাৰ ক’লৰাড’ত ইজৰাইলৰ শান্তি সমদলত আক্ৰমণ চলোৱা হৈছিল। দেওবাৰে এফ বি আইয়ে নিশ্চিত কৰে যে বোল্ডাৰ চহৰত সংঘটিত হোৱা যিহুদী বিৰোধী কাণ্ডটো পৰিকল্পিত সন্ত্ৰাসবাদী আক্ৰমণ। এসপ্তাহ পূৰ্বে ৱাশ্বিংটন ডিচিত ইজৰাইলৰ দূতাবাসত এজন যুৱকে এক অনুষ্ঠানৰ সময়ত আক্ৰমণ চলাইছিল। আক্ৰমণকাৰী ইলিয়াছ ৰড্ৰিগেজে দূতাবাসৰ দুজন কৰ্মচাৰীক গুলীয়াই হত্যা কৰে। এনে পৰিস্থিতিত আমেৰিকাই বাৰখন দেশত আৰোপ কৰা নিষেধাজ্ঞা গুৰুত্বপূৰ্ণ।
মন কৰিবলগীয়া যে ২০১৭ চনত প্ৰথম কাৰ্যকালত ট্ৰাম্পে মুছলমান সংখ্যাগৰিষ্ঠ সাতখন দেশৰ নাগৰিকক আমেৰিকাত প্ৰৱেশ নিষিদ্ধ কৰিছিল। এই দেশসমূহৰ ভিতৰত আছিল ইৰাণ, ইৰাক, লিবিয়া, ছোমালিয়া, চুডান, ছিৰিয়া আৰু য়েমেন।
