বৃহস্পতিবাৰে (১৯ ফেব্ৰুৱাৰী) উত্তৰ প্ৰদেশৰ একাংশ কংগ্ৰেছ নেতাই অভিযোগ উত্থাপন কৰে যে ৰাজ্যৰ বহু ঠাইত অসমৰ মুখ্যমন্ত্ৰী হিমন্ত বিশ্ব শৰ্মাই জনগোষ্ঠীৰ মাজত বিভাজন সৃষ্টিৰ লক্ষ্যৰে সাম্প্ৰদায়িক, অসাংবিধানিক মন্তব্য কৰাৰ বাবেই দাখিল কৰা অভিযোগ আৰক্ষীয়ে গ্ৰহণ কৰা নাই।
মুখ্যমন্ত্ৰী শৰ্মাৰ বিৰুদ্ধে অভিযানৰ নেতৃত্ব দিয়া কংগ্ৰেছৰ ৰাষ্ট্ৰীয় সম্পাদক শ্বাহনৱাজ আলমে কয়, ‘’অসমৰ মুখ্যমন্ত্ৰীগৰাকীৰ ধাৰাবাহিক সাম্প্ৰদায়িক মন্তব্যৰ বাবে আমি কমেও ১০০খন এফআইআৰ পঞ্জীয়ন কৰাৰ অভিযান চলাইছো। এনে মন্তব্য অসাংবিধানিক, ভাৰত গণৰাজ্যৰ মৌলিক ধাৰণা বিৰোধী, বিভাজনকাৰী আৰু দেশত গৃহযুদ্ধ লগোৱাৰ লক্ষ্যৰে চলোৱা হৈছে।‘’
তেওঁ জনায়, ‘’কিন্তু, বহু ঠাইত আৰক্ষীয়ে অভিযোগ পঞ্জীয়ন কৰা নাই। অভিযোগ গ্ৰহণ কৰাটো এফআইআৰ পঞ্জীয়নৰ দিশত এক পদক্ষেপ। ২০টা ঠাইত অভিযোগ গ্ৰহণ কৰা হৈছে; আমি এফআইআৰ পঞ্জীয়ন হোৱাৰ বাবে অপেক্ষা কৰি আছো। অন্যথা আমি আদালতলৈ যাম।’’
কংগ্ৰেছ নেতা আলমে ন্যায়পালিকাক কথিত মন্তব্যত নিজাববীয়া গোচৰ (suo motu) বিবেচনা কৰি অসমৰ মুখ্যমন্ত্ৰীৰ বিৰুদ্ধে ব্যৱস্থা গ্ৰহণ কৰিবলৈ আহ্বান জনায়। কংগ্ৰেছ নেতাগৰাকীয়ে কয় যে শৰ্মাৰ সাম্প্ৰদায়িক মন্তব্য জৰুৰী জনস্বাৰ্থৰ বিষয়, আৰু আদালতৰ দ্বাৰা আইনী ব্যৱস্থা গ্ৰহণ কৰাটো জৰুৰী।
