উত্তৰাখণ্ডত মানুহ আৰু বন্যপ্ৰাণীৰ সংঘাত এক ভয়াবহ পৰ্যায়ত উপনীত হৈছে। চলিত জানুৱাৰী মাহৰ প্ৰথম ২০ দিনৰ ভিতৰতে বন্যপ্ৰাণীৰ আক্ৰমণত ৰাজ্যখনত সাতজন লোকৰ মৃত্যু হৈছে। ইয়াৰ ভিতৰত চাৰিজন লোক বাঘৰ আক্ৰমণত নিহত হোৱা বুলি জানিব পৰা গৈছে।
বিগত ছমাহ ধৰি ভালুকৰ আক্ৰমণক লৈ ৰাজ্যবাসী চিন্তিত আছিল যদিও বৰ্তমান বাঘৰ বৰ্ধিত আক্ৰমণে বন বিভাগক স্তম্ভিত কৰি তুলিছে। কালাগড় টাইগাৰ ৰিজাৰ্ভ, ৰামনগৰ আৰু পূব টেৰাই বন সংমণ্ডলতে ঘাইকৈ এই আক্ৰমণসমূহ সংঘটিত হৈছে। আনহাতে, শেহতীয়াকৈ নৈনীতাল বন সংমণ্ডল আৰু পৌৰীৰ বড়া গাঁৱত নাহৰফুটুকীৰ আক্ৰমণত এগৰাকী মহিলাসহ দুজন লোকৰ মৃত্যু হৈছে।
উল্লেখ্য যে, ২০২৫ বৰ্ষত ৰাজ্যখনত বন্যপ্ৰাণীৰ আক্ৰমণত মুঠ ৬৮ জন লোকৰ মৃত্যু হৈছিল আৰু ৪৮৮ জন লোক আহত হৈছিল।
বন বিভাগৰ সূত্ৰ অনুসৰি, শীতকালত ভালুকবোৰ সাধাৰণতে শীতনিদ্ৰাত (hibernation) থাকে বাবে সেইবোৰৰ আক্ৰমণ কমিব বুলি ভবা হৈছিল। কিন্তু ইয়াৰ বিপৰীতে বাঘৰ আক্ৰমণহে অভাৱনীয়ভাৱে বৃদ্ধি পাইছে।
ৰাজ্যখনৰ মুখ্য বন সংৰক্ষক (PCCF) ৰঞ্জন মিশ্ৰই জনাইছে যে, “বৰ্তমান বাঘৰ প্ৰজননৰ সময় (Breeding season), যাৰ বাবে ইহঁত নিজৰ এলেকাৰ প্ৰতি অধিক সচেতন আৰু অধিক আক্ৰমণাত্মক হৈ পৰে।”
বন বিভাগে অৰণ্যৰ কাষৰীয়া অঞ্চলৰ লোকসকলৰ বাবে এক জৰুৰী সতৰ্কবাণী জাৰী কৰিছে। তেওঁলোকে জনাইছে যে প্ৰয়োজন নহ’লে কোনো লোকেই যেন অৰণ্যত প্ৰৱেশ নকৰে। লগতে, জৰুৰী কামত বাহিৰলৈ ওলাই গ’লে সদায় দলবদ্ধভাৱে যাবলৈ আৰু বন্যপ্ৰাণীক নিজৰ উপস্থিতিৰ উমান দিবলৈ হুলস্থূল বা শব্দ কৰি যাবলৈ পৰামৰ্শ দিয়া হৈছে। তদুপৰি, বিপদসংকুল জিলাসমূহত জনসজাগতা অভিযান আৰু সুৰক্ষামূলক ব্যৱস্থা অধিক শক্তিশালী কৰা হ’ব বুলি বন বিভাগে প্ৰতিশ্ৰুতি দিছে।
