অহা ১৯ ছেপ্টেম্বৰৰ পৰা ৪ অক্টোবৰলৈ জাপানত অনুষ্ঠিত হ’বলগীয়া এছিয়ান গেমছৰ বাবে ভাৰতীয় ক্ৰিকেট নিয়ন্ত্ৰণ ব’ৰ্ডে শনিবাৰে ভাৰতীয় অলিম্পিক সন্থাৰ ওচৰত ৩০ জনীয়া প্ৰাথমিক ক্ৰিকেট দলৰ তালিকা দাখিল কৰিছে। এই তালিকাত শেহতীয়া টি-টুৱেণ্টি বিশ্বকাপ জয়ী অধিনায়ক সূৰ্যকুমাৰ যাদৱ আৰু তাৰকা বেটছমেন শুভমন গিলক অন্তৰ্ভুক্ত কৰা হোৱা নাই। ইয়াৰ পৰিৱৰ্তে ঘৰুৱা ক্ৰিকেটত চমকপ্ৰদ প্ৰদৰ্শন আগবঢ়োৱা উদীয়মান তাৰকা বৈভৱ সূৰ্যবংশীক প্ৰথমবাৰৰ বাবে ছিনিয়ৰ দলত স্থান দিয়া হৈছে। প্ৰতিযোগিতাখনৰ সময়ছোৱাতে ভাৰতীয় দলে আন এক আন্তঃৰাষ্ট্ৰীয় ভ্ৰমণ কৰিবলগীয়া থকাৰ বাবেই ব’ৰ্ডে দুটা সুকীয়া দল গঠন কৰাৰ প্ৰয়োজনীয়তা আহি পৰিছে সদৰী কৰিছে।
অহা ২৭ ছেপ্টেম্বৰৰ পৰা ১৭ অক্টোবৰলৈ ভাৰতীয় দলে ৱেষ্ট ইণ্ডিজৰ মাটিত তিনিখন এদিনীয় আৰু পাঁচখন টি-টুৱেণ্টি মেচৰ শৃংখলা খেলিব। এছিয়ান গেমছ আৰু ৱেষ্ট ইণ্ডিজ ভ্ৰমণ একে সময়তে হোৱাৰ বাবে ভাৰতে দুটা পৃথক দল গঠন কৰিবলগীয়া হৈছে। ঘোষিত ৩০ জনীয়া প্ৰাথমিক দলটোৰ পৰাই নিৰ্বাচিত একাংশ খেলুৱৈ ৱেষ্ট ইণ্ডিজলৈ যোৱাৰ বিপৰীতে প্ৰায় ১৮ জনীয়া এটা দল এছিয়ান গেমছলৈ যাব। সূৰ্যকুমাৰ যাদৱ আৰু শুভমন গিলৰ দৰে তাৰকাক ৱেষ্ট ইণ্ডিজ শৃংখলাৰ বাবে সংৰক্ষিত কৰি ৰখাৰ সম্ভাৱনা আছে। প্ৰধান প্ৰশিক্ষক গৌতম গম্ভীৰ আৰু নিৰ্বাচক অজিত আগৰকাৰে, শেহতীয়া আইপিএলৰ প্ৰদৰ্শনলৈ চাই ৱেষ্ট ইণ্ডিজত টি-টুৱেণ্টি দলৰ অধিনায়কত্ব শুভমন গিলৰ হাতত অৰ্পণ কৰাৰ কথা বিচাৰ কৰিছে বুলি জনাইছে। ভাৰতীয় ক্ৰিকেটত সাধাৰণতে তিনিওটা ফৰ্মেটতে একেগৰাকী অধিনায়ক ৰখাৰ যি পৰম্পৰা আছে, তাৰ ওপৰত ভিত্তি কৰিয়েই ব’ৰ্ডে শুভমনক এই দায়িত্ব দিব পাৰে।
এছিয়ান গেমছৰ বাবে ঘোষিত এই দলটোক নেতৃত্ব দিয়াৰ দৌৰত আটাইতকৈ আগত আছে অভিজ্ঞ বেটছমেন শ্ৰেয়স আয়াৰ। এই প্ৰতিযোগিতাত সফল হ’লে তেওঁ পুনৰ মূল টি-টুৱেণ্টি দলত নিজৰ স্থান মজবুত কৰিব পাৰিব বুলি আশা কৰা হৈছে। আনহাতে, ভাৰত ‘এ’ দলৰ হৈ উন্নত প্ৰদৰ্শন কৰা যুৱ খেলুৱৈ বৈভৱ সূৰ্যবংশীৰ অন্তৰ্ভুক্তিয়ে সকলোৰে দৃষ্টি আকৰ্ষণ কৰিছে। ক্ৰীড়া বিশেষজ্ঞসকলৰ মতে, ফৰ্মত থকা অৱস্থাতে যুৱ খেলুৱৈগৰাকীক ৰাষ্ট্ৰীয় দলত সুযোগ দিয়াটো ব’ৰ্ডৰ এক ইতিবাচক আৰু দূৰদৰ্শী পদক্ষেপ। ইয়াৰ উপৰিও এই প্ৰাথমিক দলটোত কলকাতা নাইট ৰাইডাৰ্ছৰ চাৰিগৰাকী খেলুৱৈ ক্ৰমে ৰিংকু সিং, হৰ্ষিত ৰাণা, বৰুণ চক্ৰৱৰ্তী আৰু অনুকূল ৰয়ে স্থান লাভ কৰিছে।
ব’ৰ্ডে দাখিল কৰা ঘোষিত ৩০ জনীয়া প্ৰাথমিক দলটোত যশস্বী জয়ছোৱাল, অভিষেক শৰ্মা, বৈভৱ সূৰ্যবংশী, ঈশান কিষান, সঞ্জু ছেমছন, শ্ৰেয়স আয়াৰ, ঋষভ পন্ত, হাৰ্দিক পাণ্ডিয়া, ৰিংকু সিং, তিলক বাৰ্মা, যশপ্ৰীত বুমৰাহ, অক্ষৰ পেটেল, অৰ্শদীপ সিং, কুলদীপ যাদৱ, নীতিশ কুমাৰ ৰেড্ডী, প্ৰসিদ্ধ কৃষ্ণা, বৰুণ চক্ৰৱৰ্তী, অনুকূল ৰয়, আয়ুষ বদোনী, হৰ্ষ ডুবে, ধ্ৰুৱ জুৰেল, খলিল আহমেদ, ঋতুৰাজ গায়কোৱাড়, ৰবি বিষ্ণৈ, শ্বাহবাজ আহমেদ, শিৱম ডুবে, বিপৰাজ নিগম, হৰ্ষিত ৰাণা, যশ ঠাকুৰ আৰু ৱাশ্বিংটন সুন্দৰক অন্তৰ্ভুক্ত কৰা হৈছে।
