প্ৰধানমন্ত্ৰী নৰেন্দ্ৰ মোদীয়ে জাকজমকতাৰে দেশবাসীৰ নামত মুকলি কৰা বহুচৰ্চিত বন্দে ভাৰত এক্সপ্ৰেছ নামৰ দ্ৰুত গতিৰ ৰেলখনক বিপদে যেন লগ নেৰা হৈছে। উদ্বোধনৰ পাছৰ পৰাই তিনিবাৰকৈ দুৰ্ঘটনাগ্ৰস্ত হোৱা ৰে’লখন বৃহস্পতিবাৰে পুনৰ যাত্ৰাৰ সময়তে এটা ষাঁড় গৰুক খুন্দিয়াই ক্ষতিগ্ৰস্ত হৈছে।
গান্ধীনগৰ-মুম্বাই পথত চলাচল কৰা দ্ৰুততৰ ৰে’লখনে বৃহস্পতিবাৰে সন্ধিয়া গুজৰাটৰ উদভাদা আৰু ভাপি ষ্টেচনৰ মাজত এটা ষাঁড় গৰুক খুন্দা মাৰে বুলি ৰে’লৱেৰ এগৰাকী বিষয়াই জানিবলৈ দিছে।
তেওঁ লগতে কয় যে এই দুৰ্ঘটনাৰ ফলত ৰে’লখনৰ সন্মুখভাগ কিছু ক্ষতিগ্ৰস্ত হয়। দুমাহ পূর্বে চলাচল আৰম্ভ কৰাৰ পাছত এই পথত কেন্দ্ৰীয় চৰকাৰৰ বিশেষ অভিলাষী ৰে’লখন চতুর্থবাৰৰ এনে দুৰ্ঘটনাত পতিত হৈছে৷
পশ্চিম ৰেলৱেৰ মুখ্য জনসংযোগ বিষয়া সুমিত ঠাকুৰে জানিবলৈ দিয়া মতে, উদভাদা আৰু ভাপিৰ মাজত ৮৭ নং লেভেল ক্ৰছিং গেটৰ সমীপত সন্ধিয়া প্ৰায় ৬.২৩ বজাত সংঘটিত হয় এই ঘটনা।
তেওঁ লগতে ৰে’লখনৰ সন্মুখৰ অংশত কিছু ক্ষতিগ্ৰস্ত হোৱাৰ বিপৰীতে আন কোনো ধৰণৰ বিশেষ সমস্যা হোৱা নাছিল বুলি জানিবলৈ দিয়ে। দুৰ্ঘটনাৰ পাছত কিছু সময় দুৰ্ঘটনাস্থলীত ৰোৱাৰ পিছত সন্ধিয়া ৬.৩৫ বজাত পুনৰ যাত্ৰা আৰম্ভ কৰে ৰে’লখনে।
স্মৰ্তব্য যে এইদৰে বাৰে বাৰে গৰু-ম’হত খুন্দা খোৱাৰ বাবে শেহতীয়াকৈ এনে দুৰ্ঘটনা ৰোধৰ লক্ষ্যৰে বন্দে ভাৰত এক্সপ্ৰেছৰ যাত্ৰাপথৰ চাৰিওফালে থকা সকলো গাঁওৰ মুৰব্বীলৈ এখন পত্ৰ প্ৰেৰণ কৰিছিল ৰে’ল বিভাগে।
ৰে’ল বিভাগে এই পত্ৰ যোগে গাঁওবাসীক পোহনীয়া জন্তুৰ ওপৰত নজৰ ৰাখিবলৈ নিৰ্দেশ দিয়া হৈছিল। যদি তেওঁলোকে এই আদেশ পালন নকৰে, পশুপালকসকলৰ বিৰুদ্ধে শাস্তিমূলক ব্যৱস্থা লোৱা হ’ব বুলিও স্পষ্ট কৰি দিয়া হৈছিল।
উল্লেখ্য যে বন্দে ভাৰত অভিযানৰ অধীনস্থ তৃতীয় যাতায়ত সেৱাৰ ৰূপত যোৱা মাহত প্ৰধানমন্ত্ৰী নৰেন্দ্ৰ মোদীয়ে ৰে’লখনৰ ফ্লেগ অফ কৰিছিল।
উদ্বোধনৰ সময়ত মোদীয়ে গান্ধীনগৰৰ পৰা আহমেদাবাদৰ কালুপুৰ ৰে’ল ষ্টেচনলৈ যাত্ৰাও কৰিছিল।
