অৱশেষত সুদীৰ্ঘ ১৬ বছৰৰ পিছত ২০০৬ চনৰ বাৰানসীত সংঘটিত ধাৰাবাহিক বোমা বিস্ফোৰণৰ মূল অভিযুক্ত সন্ত্ৰাসবাদী ৱালিউল্লাহ খানৰ শাস্তিৰ আদেশ ঘোষিত হ’ল। আজি গাজিয়াবাদ জিলা আৰু সত্ৰ আদালতে এই বোমা বিস্ফোৰণৰ মাষ্টাৰমাইণ্ড সন্ত্ৰাসবাদীজনক ফাঁচীৰ আদেশ প্ৰদান কৰে।
ৱালিউল্লাহ ওৰফে টুণ্ডা বৰ্তমান দাসনা কাৰাগাৰত বন্দী হৈ আছে। ৱালিউল্লাহৰ বিৰুদ্ধে ৬ টা গোচৰ পঞ্জীয়ন কৰা হৈছিল। ইয়াৰ ভিতৰত তেওঁ বৰ্তমান পৰ্যন্ত ৪ টা গোচৰত দোষী সাব্যস্ত হৈছে।
উল্লেখ্য যে ২০০৬ চনৰ ৭ মাৰ্চত বাৰানসীৰ সংকট মোচন মন্দিৰ আৰু সেনা নিবাস ৰেল ষ্টেচনত হোৱা বিস্ফোৰণত ২৮ জন নিহত হোৱাৰ লগতে ১০০ ৰো অধিক লোক আহত হৈছিল।
সেই দিনটোত সন্ধিয়া ৬.১৫ বজাত সংকট মোচক মন্দিৰৰ ভিতৰত প্ৰথম বিস্ফোৰণ সংঘটিত হয়। ১৫ মিনিটৰ পিছতে বাৰানসী সেনানিবাস ৰেল ষ্টেচনৰ প্ৰথম শ্ৰেণীৰ বিশ্ৰাম কক্ষৰ বাহিৰত আন এটা বোমা বিস্ফোৰণ হয়।
একেদিনাই এখন আৰক্ষী থানাৰ ৰে’লৱে ক্ৰছিংৰ ৰেলিঙৰ ওচৰত আৰু দশশ্বমেধ ঘাটত বিস্ফোৰক সামগ্ৰী উদ্ধাৰ হয়।
বিস্ফোৰণৰ তদন্ত কৰি থকা বিশেষ টাস্ক ফ’ৰ্চে ২০০৬ চনৰ এপ্ৰিল মাহত ৱালিউল্লাহ এই বিস্ফোৰণৰ মাষ্টাৰমাইণ্ড বুলি দাবী কৰিছিল। লগতে টাস্ক ফ’ৰ্চে ৱালিউল্লাহ বাংলাদেশৰ এটা সন্ত্ৰাসবাদী গোট হৰকত-উল-জেহাদ আল ইছলামীৰ সৈতে জড়িত বুলিও দাবী কৰে।
২০০৬ চনৰ ৫ এপ্ৰিলত আৰক্ষীয়ে এই গোচৰটোৰ সন্দৰ্ভত লক্ষ্ণৌৰ গোচাইনগঞ্জ অঞ্চলৰ পৰা এলাহাবাদৰ ফুলপুৰ গাঁৱৰ বাসিন্দা ৱালিউল্লাহক গ্ৰেপ্তাৰ কৰে।
বাৰানসীৰ অধিবক্তাসকলে ৱালিউল্লাহৰ হৈ গোচৰটোত অংশ ল’বলৈ অস্বীকাৰ কৰিছিল। ইয়াৰ পিছতে উচ্চ ন্যায়ালয়ে গোচৰটো গাজিয়াবাদ জিলা ন্যায়াধীশৰ আদালতলৈ স্থানান্তৰ কৰে।
ৱালিউল্লাহৰ লগতে এই বোমা বিস্ফোৰণৰ গোচৰত আন চাৰিজন অভিযুক্তকো তদন্তকাৰী দলটোৱে চিনাক্ত কৰিছিল। ইয়াৰে তিনিজন ক্ৰমে মুস্তাফিজ, জাকাৰিয়া আৰু ৱাছিৰ পলাতক অৱস্থাত থকাৰ বিপৰীতে মহম্মদ জুবেৰ নামৰ আন এজন অভিযুক্ত আৰক্ষীৰ সৈতে সংঘৰ্ষত নিহত হৈছিল।
