লাষ্ট গে’টত ধৰ্ণাত বহিল ৰাভা সংগঠন : চৰকাৰক শীঘ্ৰে দাবীসমূহ পূৰণৰ বাবে আহ্বান
অসমত বসবাস কৰা ৰাভা সকলৰ বিভিন্ন দাবী পূৰণৰ দাবীৰে সোমবাৰে দিচপুৰ লাষ্ট গে’টত ৰাভা সকলৰ দল-সংগঠন সমূহে চৰকাৰৰ বিৰুদ্ধে ধৰ্ণা কাৰ্য্যসূচী ৰূপায়ন কৰে।
প্ৰতিবাদকাৰী সকলে ভাৰতীয় সংবিধানৰ ষষ্ঠ অনুসূচিত ৰাভা হাছং স্বায়ত্ত শাসিত পৰিষদক অন্তৰ্ভুক্তি, অসম ৰাজ্যিক ৰাজধানী প্ৰাধিকাৰী ক্ষেত্ৰ উন্নয়ন আইন (২০১৭)ৰ আওঁতাৰ পৰা ৰাভা হাছং স্বায়ত্ত পৰিষদৰ অন্তৰ্ভুক্ত হৈ থকা ৩৭৬ খন গাঁৱক শীঘ্ৰে কৰ্তন কৰা, বিদ্যালয় সমূহত ৰাভা ভাষাৰ শিক্ষক নিযুক্তি দিয়া আৰু বন অধিকাৰ আইন ২০০৬ প্ৰয়োগৰ ব্যৱস্থা কৰা আদি দাবীৰে চৰকাৰৰ বিৰুদ্ধে ধৰ্ণা কাৰ্য্যসূচী ৰূপায়ন কৰে।
নিখিল ৰাভা ছাত্ৰ সন্থা, নিখিল ৰাভা মহিলা পৰিষদ, ষষ্ঠ অনুসূচী দাবী সমিতি, নিখিল ৰাভা জাতীয় পৰিষদ, নিখিল ৰাভা সাহিত্য সভা আৰু সদৌ ৰাভা কৃষ্টি সন্মিলনৰ উদ্যোগত এই ধৰ্ণা কাৰ্য্যসূচী পালন কৰে।
আনহাতে, প্ৰতিবাদকাৰীসকলে গণতান্ত্ৰিক পদ্ধতিৰে কৰি অহা আন্দোলনৰ প্ৰতি চৰকাৰে গুৰুত্ব নিদিলে ভবিষ্যতে আন্দোলন অধিক তীব্ৰ কৰি তুলিব বুলি হুংকাৰ দিয়ে।