অৰ্থনীতিবিদ জাঁ ডেৰেজৰ শেহতীয়া এক ভাষ্যই দেশৰ গ্ৰাম্য নিয়োগ ব্যৱস্থাক লৈ ডাঙৰ প্ৰশ্নৰ সৃষ্টি কৰিছে। প্ৰস্তাৱিত ভিবি-জি ৰাম জি নামৰ নতুন আঁচনিখনক লৈ তেওঁ গভীৰ উদ্বেগ প্ৰকাশ কৰি কৈছে যে এই ব্যৱস্থাই শ্ৰমিকসকলৰ অৱস্থা উন্নত কৰাৰ পৰিৱৰ্তে এমজিএনৰেগাৰ জৰিয়তে পোৱা নিয়োগৰ আইনী নিশ্চয়তাক সম্পূৰ্ণৰূপে ধ্বংস কৰি পেলাব। ৰাঁচীত সংবাদ মাধ্যমৰ সৈতে হোৱা কথা-বতৰাত তেওঁ স্পষ্ট কৰি দিয়ে যে এই আঁচনিখন কেৱল নাম সলনি কৰাৰ প্ৰক্ৰিয়া নহয়, বৰঞ্চ ইয়াৰ জৰিয়তে মহাত্মা গান্ধী গ্ৰাম্য নিয়োগ নিশ্চয়তা আইনখনক এক অতি দুৰ্বল আৰু অন্তঃসাৰশূন্য কৰিবলৈ চেষ্টা কৰা হৈছে। ডেৰেজৰ মতে আইনখনত স্পষ্টকৈ কোৱা হৈছে যে পূৰ্বৰ সকলো নিয়ম আৰু নিৰ্দেশনাৰ ঠাইত এই নতুন আঁচনিখন আহিব যিয়ে আচলতে নিয়োগৰ নিশ্চয়তাৰ মূল ধাৰণাটোকেই নোহোৱা কৰি পেলাব।
এই নতুন আঁচনিখনৰ কাৰ্যকৰীকৰণৰ পদ্ধতিৰ ওপৰতো জাঁ ডেৰেজে আঙুলিয়াই দিছে। তেখেতে কয় যে নতুন আঁচনিখন সম্পূৰ্ণৰূপে কেন্দ্ৰীয় চৰকাৰৰ নিয়ন্ত্ৰণত থাকিব আৰু গুৰুত্বপূৰ্ণ সিদ্ধান্তসমূহ কেন্দ্ৰইহে গ্ৰহণ কৰিব। ইয়াৰ ফলত নিয়োগৰ ক্ষেত্ৰত কেন্দ্ৰৰ ওপৰত কোনো আইনী বাধ্যবাধকতা নাথাকিব আৰু সকলো দায়িত্ব ৰাজ্য চৰকাৰসমূহৰ ওপৰত ঠেলি দিয়া হ’ব। বিশেষকৈ নিয়োগৰ নিশ্চয়তা দুৰ্বল কৰিবলৈ ইয়াত এনে এক ব্যৱস্থা অন্তৰ্ভুক্ত কৰা হৈছে য’ত চৰকাৰে মন গ’লেহে নিৰ্দিষ্ট সময় আৰু স্থানত কামৰ ব্যৱস্থা কৰিব। ইয়াৰ অৰ্থ হ’ল শ্ৰমিকে বিচাৰিলেই এতিয়াৰ দৰে কাম নাপাবও পাৰে। লগতে বছৰটোৰ ৬০ দিন পৰ্যন্ত কাম বন্ধ ৰখাৰ বাধ্যতামূলক সময়সীমাৰ ব্যৱস্থাই শ্ৰমিকৰ উপাৰ্জনত ব্যাপক প্ৰভাৱ পেলাব পাৰে বুলি তেওঁ আশংকা প্ৰকাশ কৰিছে।
বিত্তীয় দিশটোৰ ক্ষেত্ৰতো জাঁ ডেৰেজে এক ডাঙৰ বিপদৰ ইংগিত দিছে। এমজিএনৰেগাৰ ৯০ শতাংশ ধন পূৰ্বে কেন্দ্ৰই বহন কৰিছিল যদিও এতিয়া কেন্দ্ৰই ৬০ শতাংশ আৰু ৰাজ্যই ৪০ শতাংশ খৰচ বহন কৰিব লাগিব। ইয়াৰ ফলত ৰাজ্যসমূহৰ ওপৰত আৰ্থিক বোজা বৃদ্ধি পাব আৰু নিৰ্ধাৰিত বাজেটৰ বাহিৰে অতিৰিক্ত সকলো খৰচ ৰাজ্যসমূহে নিজে বহন কৰিব লাগিব। ইয়াৰ বাহিৰেও নতুন আঁচনিখনত অত্যাধিক প্ৰযুক্তি, ডিজিটেল ব্যৱস্থা আৰু কৃত্ৰিম বুদ্ধিমত্তাৰ ব্যৱহাৰৰ ওপৰত গুৰুত্ব দিয়া হৈছে। জাঁ ডেৰেজৰ মতে পূৰ্বৰ অভিজ্ঞতাই কয় যে এনে জটিল প্ৰযুক্তিয়ে নিয়োগৰ সুবিধা দিয়াৰ পৰিৱৰ্তে দৰিদ্ৰ শ্ৰমিকসকলক আঁচনিৰ পৰা বঞ্চিতহে কৰে। ১২৫ দিনৰ কামৰ প্ৰতিশ্ৰুতিক তেওঁ একপ্ৰকাৰ প্ৰতাৰণা বুলি অভিহিত কৰিছে। এই পৰিস্থিতিৰ প্ৰতিবাদ জনাই ঝাৰখণ্ড এমজিনৰেগা ৱাচে অহা ২ ফেব্ৰুৱাৰীত এক বিশাল ৰেলীৰ আহ্বান জনাইছে য’ত হাজাৰ হাজাৰ শ্ৰমিকে অংশগ্ৰহণ কৰাৰ সম্ভাৱনা আছে।
