অসমৰ বাওঁ ৰাজনীতিৰ এটা স্তম্ভস্বৰূপ দ্ৰুপদ বৰগোহাঁইৰ আজি পুৱা ৬ বজাত মৃত্যু হয়। ডিব্ৰুগড়ৰ আদিত্য নাৰ্ছিং হ’মত দীৰ্ঘ দিনৰ পৰা চিকিৎসাধীন হৈ থকা বৰ্ষীয়ান ৰাজনীতিবিদজনৰ বয়স ৭৮ বছৰ হৈছিল। জন্ম হৈছিল ১৯৪১ চনৰ ৭ নৱেম্বৰত। দেউতাকৰ নাম মানিক চন্দ্ৰ বৰগোহাঁই আৰু মাকৰ নাম ৰূপেশ্বৰী বৰগোহাঁই।
বৰগোহাঁইৰ মৃতদেহ এতিয়াও চিকিৎসালয়ৰ পৰা নাজিৰাৰ ঘৰলৈ অনা হোৱা নাই।
এজন সৎ ৰাজনীতিবিদ বুলি গোটেই অসমতে সুনাম থকা বৰগোহাঁই ১৯৯৮ চনৰ পৰা ২০০৪চনলৈ ৰাজ্যসভাৰ সাংসদ আছিল। তাৰোপৰি ২০০৬ চনত নাজিৰা বিধানসভা সমষ্টিৰ পৰা চি পি আইৰ বিধায়ক হিচাপে নিৰ্বাচিত হৈছিল।
তেওঁ ভাৰতৰ কমিউনিষ্ট পাৰ্টিৰ অসম শাখাৰ সম্পাদকো আছিল। সৰ্ব ভাৰতীয় কিষাণ সভাৰ অসম প্ৰদেশ পৰিষদৰ তেওঁ সভাপতিৰ দায়িত্বও বহন কৰিছিল। ইয়াৰোপৰি নুমলীগড় শোধনাগাৰৰ দাবীত হোৱা আন্দোলনত সন্মুখৰ পৰা নেতৃত্ব দিছিল চি পি আইৰ নেতাজনে।
অসমৰ এজন সাংসদ হিচাপে সংসদত আৰু বিধায়ক হিচাপে বিধানসভাত তেওঁ আছিল বাওঁ দলবিলাকৰ এই পৰ্য্যন্ত অন্তিমজন প্ৰতিনিধি। ২০০৬-২০১১ সময়ছোৱাত দ্ৰুপদ বৰগোহাঁই নাজিৰাৰ পৰা আৰু ৰঙিয়াৰ পৰা অনন্ত ডেকাই অসম বিধানসভাত বাওঁ ৰাজনীতিক প্ৰতিনিধিত্ব কৰিছিল।
বৰগোহাঁইৰ মৃত্যুত নাজিৰা আৰু শিৱসাগৰত গভীৰ শোকৰ ছাঁ পৰিছে। শিৱসাগৰৰ সমাজ জীৱনৰ সৈতে বৰগোহাঁইৰ ওতপ্ৰোত সম্পৰ্ক আছিল। সাংসদ হৈ থকা সময়ছোৱাত বিভিন্ন সামাজিক অনুষ্ঠানলৈ তেওঁ সাংসদ পুঁজিৰ অংশ আগ বঢ়োৱাৰ লগতে সম্পূৰ্ণ স্বচ্ছভাৱে পুঁজিৰ ব্যৱহাৰ কৰা বাবে বৰগোহাঁয়ে অঞ্চলটোৰ ৰাইজৰ মাজত এক শ্ৰদ্ধাৰ ভাব আদায় কৰিব পাৰিছিল।
জানিব পৰা মতে, ৰাজনীতিবিদগৰাকীৰ মৃতদেহ শিৱসাগৰৰ দলীয় কাৰ্যালয়লৈ অনা হ’ব, য’ত তেওঁক দলীয়ভাৱে শেষ শ্ৰদ্ধা জনোৱা হ’ব।
