বৰদিনৰ ঠিক আগদিনা নলবাৰী জিলাত ধৰ্মীয় সম্প্ৰীতিক লৈ উত্তেজনাৰ সৃষ্টি হয়। নলবাৰী জিলাৰ পানীগাঁও অঞ্চলৰ ছেইণ্ট মেৰীছ ইংৰাজী বিদ্যালয়ত বৰদিনৰ আয়োজন লণ্ডভণ্ড কৰি বিপদত পৰিছে বিশ্ব হিন্দু পৰিষদ আৰু বজৰংগ দলৰ একাংশ নেতা কৰ্মী।
অভিযোগ অনুসৰি তেওঁলোকে বিদ্যালয় চৌহদত প্ৰৱেশ কৰি বৰদিনৰ সাজ-সজ্জা বিনষ্ট কৰাৰ লগতে কিছু সামগ্ৰীত জুই লগাই দিয়ে। এই ঘটনাই অঞ্চলটোত চাঞ্চল্যৰ সৃষ্টি কৰে।
বেলশৰ থানাত দাখিল কৰা লিখিত অভিযোগত বিদ্যালয়খনৰ অধ্যক্ষ ফাদাৰ বাইজু চেবাষ্টিয়ানে কয় যে ২৪ ডিচেম্বৰৰ নিশা প্ৰায় ২:৩০ বজাত একাংশ অচিনাক্ত ব্যক্তিয়ে অবৈধভাৱে বিদ্যালয় চৌহদত প্ৰৱেশ কৰে। বৰদিনৰ বাবে প্ৰস্তুত কৰা বাহিৰৰ সাজ-সজ্জা, ষ্ট্ৰিং লাইট, টাব গছ আৰু অন্যান্য সামগ্ৰী ভাঙি ছিঙি লণ্ডভণ্ড কৰে। অভিযোগ অনুসৰি, সামগ্ৰীবোৰ লণ্ডভণ্ড কৰাৰ লগতে কিছু সামগ্ৰীত জুই লগাই দিয়াত বিদ্যালয়খনৰ সা-সম্পত্তিৰ যথেষ্ট ক্ষতিসাধন হয়।
আৰক্ষী সূত্ৰই জনোৱা মতে, অভিযোগ লাভ কৰাৰ পিছত ভাৰতীয় দণ্ডবিধিৰ (আই পি চি), ২০২৩ৰ ৩২৯(৩), ৩২৬(এফ), ১৮৯(২), ৩৫১(২), ৩২৪(৩), ৩২৪(৪) আৰু ৬১(২) ধাৰাত বেলশৰ থানাত গোচৰ ৰুজু কৰা হৈছে। উপ-পৰিদৰ্শক চানক্য দাসক এই কাণ্ডৰ তদন্তৰ দায়িত্ব অৰ্পণ কৰা হৈছে। আৰক্ষীয়ে ক্ষিপ্ৰতাৰে তদন্ত আৰম্ভ কৰি সাক্ষীৰ বক্তব্য সংগ্ৰহ কৰে।
তদন্তৰ ভিত্তিত চাৰিজন লোকক গ্ৰেপ্তাৰ কৰা হৈছে। আটক কৰা কেইজন হ’ল বিশ্ব হিন্দু পৰিষদৰ জিলা সম্পাদক ভাস্কৰ ডেকা (৩৪); ভিএইচপিৰ উপ-সভাপতি মানস জ্যোতি পাটগিৰি (৩২), ভি এইচ পিৰ উপ-সচিব বিজু দত্ত (৩৪) আৰু বজৰং দলৰ জিলা আহ্বায়ক নয়ন তালুকদাৰ (৩৭)। আটাইকেইজন নলবাৰী জিলাৰ বাসিন্দা। আৰক্ষীয়ে জনোৱা মতে, ধৃতসকলক আদালতত হাজিৰ কৰা হৈছে আৰু প্ৰয়োজন হ’লে তেওঁলোকক অধিক সোধা-পোছাৰ বাবে জিম্মাত ৰখা হ’ব।
স্থানীয় সূত্ৰ আৰু প্ৰত্যক্ষদৰ্শীয়ে দাবী কৰা মতে, বৰদিনৰ পূৰ্বে একাংশ শ্ৰমিকে বিদ্যালয় চৌহদত প্ৰৱেশ কৰি “জয় শ্ৰী ৰাম”, “জয় হিন্দু ৰাষ্ট্ৰ” আৰু “ভাৰত মাতা কি জয়” আদি শ্লোগান দি সাজ-সজ্জা ভাঙি পেলায়। প্ৰত্যক্ষদৰ্শীয়ে জনোৱা মতে, বজৰং দলৰ একাংশ সদস্যই প্ৰথমে বিদ্যালয়ত প্ৰৱেশ কৰে। এই ঘটনাই বিদ্যালয় কৰ্তৃপক্ষ আৰু অভিভাৱকৰ মাজত আতংক বিয়পাই দিয়ে।
ঘটনাৰ পিছতে প্ৰশাসনে তৎপৰতাৰে ব্যৱস্থা গ্ৰহণ কৰে। পৰিস্থিতি যাতে নিয়ন্ত্ৰণৰ বাহিৰলৈ নাযায় তাৰ বাবে অঞ্চলটোত অতিৰিক্ত আৰক্ষী মোতায়েন কৰা হয়। জিলা প্ৰশাসনৰ এগৰাকী বিষয়াই কয় যে আইন-শৃংখলা বজাই ৰখাটোৱেই সৰ্বোচ্চ অগ্ৰাধিকাৰ আৰু ধৰ্মীয় উৎসৱ বা শিক্ষানুষ্ঠানৰ নিৰাপত্তা বিঘ্নিত হ’ব দিব নোৱাৰিব।
এই ঘটনাক লৈ সমাজৰ বিভিন্ন শ্ৰেণীৰ পৰা উদ্বেগ প্ৰকাশ কৰা হৈছে। বহুতে অনুভৱ কৰে যে ধৰ্মীয় উৎসৱৰ আশে-পাশে এনেধৰণৰ ভাঙি-ছিঙি কেৱল আইন উলংঘা কৰাই নহয়, সামাজিক সম্প্ৰীতিৰ বাবেও ক্ষতিকাৰক। বিশেষজ্ঞসকলৰ মতে অসমৰ দৰে বহুধৰ্মীয় আৰু বহুসংস্কৃতিৰ ৰাজ্যত শান্তিপূৰ্ণ সহাৱস্থান বজাই ৰাখিবলৈ প্ৰশাসনকে ধৰি সমাজৰ সকলো খণ্ডই দায়িত্বশীল ভূমিকা পালন কৰিব লাগিব।
আৰক্ষীৰ দাবী, তদন্তত নিৰপেক্ষতা বজাই ৰাখি আইন অনুসৰি দোষীৰ বিৰুদ্ধে ব্যৱস্থা গ্ৰহণ কৰা হ’ব। ইয়াৰ উপৰিও বিদ্যালয় কৰ্তৃপক্ষৰ ক্ষতিৰ পৰিমাণ নিৰ্ণয় কৰা হৈছে। বৰদিনৰ পূৰ্বে সংঘটিত হোৱা এই ঘটনাই নলবাৰী জিলাত ধৰ্মীয় সম্প্ৰীতি আৰু সহনশীলতাৰ ওপৰত এক নতুন চৰ্চাৰ সৃষ্টি কৰিছে।
