বাৰিষাৰ প্ৰাকক্ষণত বিধ্বস্ত পথৰ বাবে যাতায়তৰ ক্ষেত্ৰত যমৰ যাতনা ভোগা ৰাইজ নামিল এইবাৰ পথ নিৰ্মাণত। গাওঁখনৰ পুৰুষ মহিলাই নহয় আনকি শিশু সকলো নামি পৰিল এই পথ নিৰ্মাণত।
এই ঘটনা মাৰ্ঘেৰিটা বিধানসভা সমষ্টিৰ অন্তৰ্গত বুঢ়ীদিহিং মৌজাৰ।
১২৪নং মাৰ্ঘেৰিটা বিধানসভা সমষ্টিৰ অন্তৰ্গত বুঢ়ীদিহিং মৌজাৰ ৩নং তৰাণি অঞ্চলৰ চিকৰাজান কঠালগুৰিৰ প্ৰায় ৫ কিঃমিঃ উপপথটোৰ জৰাজীৰ্ণ অৱস্থাই স্থানীয় ৰাইজক জ্বলাকলা খুৱাইছে।
মাৰ্ঘেৰিটাৰ বিধায়ক ভাস্কৰ শৰ্মা, স্থানীয় পঞ্চায়ত প্ৰতিনিধি তথা চৰকাৰী গাঁওবুঢ়াক এই পথচোৱা নিৰ্মাণৰ অৰ্থে বিভিন্ন সময়ত দাবী জনাই অহাৰ পাছতো কোনোধৰণৰ ব্যৱস্থা গ্ৰহণ নকৰাত স্থানীয় মহিলাসকলে এক গোট হৈ উক্ত পথেৰে চলাচল কৰা কেঁচা চাহ পাত কঢ়িওৱা গাড়ীসমূহৰ পৰা চান্দা সংগ্ৰহ কৰি স্থানীয় মহিলা আৰু ৰাইজে পথচোৱা নিৰ্মাণৰ বাবে হাতে কামে লাগিছে।
আনহাতে, এই পথচোৱা স্থানীয় ৰাইজে নিজে নিৰ্মাণৰ বাবে লোৱা প্ৰচেষ্টাক চৰকাৰী গাঁওবুঢ়া সূৰুজ মৰাণে বাধা প্ৰদান কৰি অহাৰো অভিযোগ উত্থাপন হৈছে।
গাঁওবুঢ়াজনে আনকি চাহ পাতৰ গাড়ীৰে পথ নিৰ্মাণ কৰিবলৈ আগবাঢ়ি অহা লোকক খুন্দিয়াই মৰাৰো ভাবুকিও প্ৰদান কৰাত ৰাইজ ক্ষুণ্ণ হৈ পৰিছে।
ৰাইজে যদিও বা এই পথচোৱা নিৰ্মাণ কৰিবলৈ লৈছে এইয়া সামগ্ৰিকভাৱে উন্নতমানৰ নহ’ব। গতিকে, স্থানীয় বিধায়ক ভাস্কৰ শৰ্মাক এইক্ষেত্ৰত বিহিত ব্যৱস্থা গ্ৰহণ কৰি পথচোৱা পকীকৰণৰ কৰিবলৈ দাবী উত্থাপন কৰিছে গাওঁবাসীয়ে।
