আন্তঃৰাষ্ট্ৰীয় পৰ্যায়ত ‘এল মেনচো’ নামেৰে পৰিচিত কুখ্যাত মাদক সম্ৰাট (ড্ৰাগছ লৰ্ড) নেমেছিঅ’ ৰুবেন অচেগুৱেৰা চাৰ্ভাণ্টেছ মেক্সিকোত এক বৃহৎ সামৰিক অভিযানত নিহত হৈছে। মেক্সিকোৰ প্ৰতিৰক্ষা বিভাগে দেওবাৰে জালিস্কো প্ৰদেশত সংঘটিত হোৱা এই এনকাউণ্টাৰক সংগঠিত অপৰাধৰ বিৰুদ্ধে “বৃহৎ আঘাত” বুলি অভিহিত কৰিছে।
সামৰিক সূত্ৰৰ মতে, গুৱাডালাজাৰাৰ পৰা দুঘণ্টা দক্ষিণ-পশ্চিমে থকা টাপালপা চহৰত অচেগুৱেৰা চাৰ্ভাণ্টেছক কৰায়ত্ত কৰিবলৈ বাহিনীসমূহে বিশেষ অভিযান আৰম্ভ কৰে। সংঘৰ্ষৰ সময়ত তেওঁক গুলীয়াই আহত কৰে। পিছত বিমানযোগে চিকিৎসাৰ বাবে মেক্সিকো চহৰলৈ নিয়াৰ পথত তেওঁৰ মৃত্যু হয়।
অচেগুৱেৰা চাৰ্ভাণ্টেছৰ জালিস্কো নিউ জেনেৰেচন কাৰ্টেল (চিজেএনজি) দীৰ্ঘদিন ধৰি দেশৰ অন্যতম শক্তিশালী অপৰাধী গোট হিচাপে পৰিচিত। এই সংস্থাটোৱে আমেৰিকালৈ বৃহৎ পৰিমাণৰ ফেণ্টানিল আৰু অন্যান্য ড্ৰাগছ সৰবৰাহ কৰাৰ অভিযোগ উত্থাপন হৈছে। সেয়েহে বিশেষজ্ঞসকলে ‘এল মেনচো’ৰ মৃত্যুক মেক্সিকোৰ শেহতীয়া ইতিহাসৰ অন্যতম বৃহৎ সন্ত্ৰাসবাদ বিৰোধী ঘটনা বুলি গণ্য কৰে।
দেওবাৰৰ অভিযানত সেনাবাহিনীৰ ওপৰত তীব্ৰ গুলীচালনা হয়। থিতাতে নিহত হয় চাৰিজন লোক। দুজনক আটক কৰে সেনাই। উদ্ধাৰ হৈছে কেইবাটাও অত্যাধুনিক অস্ত্ৰ-শস্ত্ৰ, ৰকেট লঞ্চাৰ আৰু অস্ত্ৰসজ্জিত বাহন। খবৰ অনুসৰি এই সংঘৰ্ষত তিনিজন মেক্সিকান জোৱান গুৰুতৰভাৱে আহত হয়।
ইফালে মেক্সিকোত থকা আমেৰিকাৰ দূতাবাসে কয় যে মেক্সিকান বিশেষ বাহিনীৰ এই অভিযান দুয়োখন দেশৰ যৌথ চোৰাংচোৱা সহযোগিতাৰ অংশ। তেওঁলোকে লগতে কয় যে আমেৰিকান কৰ্তৃপক্ষই “সহায়ক তথ্য” প্ৰদান কৰিছে।
আনহাতে, ‘এল মেনচো’ৰ মৃত্যুত সমগ্ৰ জালিস্কোত অশান্তিৰ জোৱাৰ উঠিছে। বিভিন্ন স্থানত অপৰাধীয়ে জুই জ্বলাই পথ অৱৰোধ কৰে। ঘাইপথবোৰ জ্বলি থকা গাড়ীৰে বন্ধ কৰি দিয়া হয়—এই কৌশলৰ বাবে দীৰ্ঘদিন ধৰি ড্ৰাগছ মাফিয়া চক্ৰ জনাজাত। বিশৃংখলতা বাঢ়ি অহাৰ লগে লগে সোমবাৰে প্ৰদেশজুৰি বিদ্যালয় বন্ধ ঘোষণা কৰে প্ৰশাসনে।
প’ৰ্ট’ ভেলাৰ্টাৰ পৰ্যটন ৰিজ’ৰ্টৰ বিভিন্ন স্থানত জুইৰ সূত্ৰপাত হোৱা দেখা গৈছে। অনলাইনত ভাইৰেল হোৱা এটা ভিডিঅ’ত দেখা গৈছে যে ৰাজ্যৰ ৰাজধানীৰ বিমানবন্দৰত যাত্ৰীসকলে আতংকিত হৈ দৌৰিছে।
ইপিনে, দেওবাৰে এয়াৰ কানাডাই প’ৰ্ট’ ভালাৰ্টালৈ বিমান সেৱা বন্ধ কৰাৰ কথা ঘোষণা কৰে।
আমেৰিকাৰ বিদেশ মন্ত্ৰালয়ে জালিস্কো, তামাউলিপাছ, মিচোয়াকান, গুয়েৰেৰো আৰু নুৱেভ’ লিঅ’ন প্ৰদেশৰ আমেৰিকাৰ নাগৰিকসকলক ঘৰৰ ভিতৰতে থাকিবলৈ সকীয়াই দিয়ে।
যদিও এই অভিযানক ড্ৰাগছ কাৰ্টেলৰ বিৰুদ্ধে যুঁজত মেক্সিকান চৰকাৰৰ বাবে এক বৃহৎ সফলতা বুলি গণ্য কৰা হয়, তথাপিও জালিস্কোৰ অশান্ত পৰিস্থিতিয়ে ইংগিত দিয়ে যে কাৰ্টেলসকলৰ প্ৰতিশোধৰ বাবে পৰিস্থিতি আৰু অধিক উত্তপ্ত হ’ব পাৰে।
