৬টা জনগোষ্ঠীক স্থায়ী বাসিন্দাৰ প্ৰমাণপত্ৰ দিবলৈ লোৱা অৰুণাচল প্ৰদেশ চৰকাৰৰ সিদ্ধান্তৰ বিৰোধিতা কৰা প্ৰতিবাদকাৰীৰ ওপৰত আৰক্ষী-অৰ্ধসামৰিক বাহিনীয়ে গুলীচালনা কৰা ঘটনাৰ প্ৰতিবাদত সদৌ চাংলাং জিলা ছাত্ৰ সন্থাই আজি আহ্বান জনোৱা ১২ ঘণ্টিয়া চাংলাং জিলা বন্ধত বিক্ষিপ্ত হিংসাত্মক ঘটনা সংঘটিত হয়।
পুৱা ৫ বজাৰ পৰা আহ্বান জনোৱা বন্ধৰ সময়ছোৱাত প্ৰতিবাদকাৰী সকলে ৰাজপথতলৈ ওলাই আহি পথৰ ওপৰত টায়াৰ জলোৱাৰ লগতে বন্ধ সমৰ্থকে চাংলাং সদৰ নগৰত তিনিখন মটৰ চাইকেলত অগ্নিসংযোগ কৰি ভস্মীভূত কৰে।
আনহাতে শতাধিক প্ৰতিবাদীকাৰীয়ে চাংলাঙৰ ৫২ নং দক্ষিণ সমষ্টিৰ বিধায়ক ফোচাম খিমহুনৰ ব্যক্তিগত বাসগৃহলৈ ইটা-শিল দলিয়াই আক্ৰমণ চলায়। ইয়াৰ উপৰি জিলাখনৰ মিয়াওটো বন্ধ সমৰ্থকে স্থানীয় বিধায়ক তথা মন্ত্ৰী কমলাং মোচাঙৰ বাসগৃহৰ সন্মুখত ক’লা পতাকা প্ৰদৰ্শন কৰাৰ লগতে ৰাজপথ টায়াৰ জ্বলাই প্ৰতিবাদ সাব্যস্ত কৰে।
জিলাখনৰ খাৰচাং, জয়ৰামপুৰ, নামপুং আদি অঞ্চলটো বন্ধৰ সৰ্বাত্মক প্ৰভাৱ পৰে৷ অৱশ্য বন্ধৰ সময়ত এই অঞ্চল সমূহৰ পৰা কোনো বিক্ষিপ্ত ঘটনাৰ বাতৰি পোৱা নাই। ইপিনে সন্ধিয়া জিলাখনৰ বিভিন্ন প্ৰান্তত সদৌ চাংলাং জিলা ছাত্ৰ সন্থাৰ উদ্যোগত মমবাতি লৈ এক মৌন প্ৰতিবাদী সমদল উলিওৱা হয়।