শেহতীয়া এক সমীক্ষাত প্ৰকাশ পোৱা তথ্য অনুসৰি, কৃত্রিম মেধা বা AI-ৰ জৰিয়তে অৰ্থহীন আৰু বিসংগতিপূৰ্ণ ভিডিঅ’ তৈয়াৰ কৰি এগৰাকী ভাৰতীয় ইউটিউবাৰে বছৰি কোটি কোটি টকা উপাৰ্জন কৰিছে। এই ধৰণৰ সমলক বিশেষজ্ঞসকলে ‘এ আই শ্লপ’ বা ‘ব্ৰেইন ৰট’ (Brain Rot) বুলি অভিহিত কৰিছে, যাৰ আক্ষৰিক অৰ্থ হ’ল মস্তিষ্কৰ অৱক্ষয়।
আচলতে অতিৰিক্ত মাত্ৰাত অযুক্তিকৰ আৰু অতি চুটি ডিজিটেল সমল বা মিম আদি নিৰন্তৰ চাই থকাৰ ফলত মানুহৰ গভীৰ চিন্তা কৰাৰ ক্ষমতা আৰু মনোযোগ কমি যোৱা প্ৰক্ৰিয়াটোকে ‘ব্ৰেইন ৰট’ বুলি কোৱা হয়। যদিও ই কোনো স্বীকৃত ৰোগ নহয়, তথাপিও ইয়াৰ কু-প্ৰভাৱক লৈ বৰ্তমান গৱেষকসকল যথেষ্ট চিন্তিত হৈ পৰিছে।
ভিডিঅ’ এডিটিং প্লেটফৰ্ম ‘কাপউইং’-এ চলোৱা এক শেহতীয়া জৰীপত বিশ্বৰ শীৰ্ষ ১৫,০০০ ইউটিউব চেনেল পৰীক্ষা কৰা হৈছিল আৰু তাৰ ভিতৰত ২৭৮ টা চেনেল সম্পূৰ্ণৰূপে AI-ৰ সহায়ত চলি থকা বুলি ধৰা পৰিছে। এই চেনেলসমূহৰ ভিতৰত ভাৰতীয় যুৱক সুৰজিতৰ ‘বন্দৰ অপনা দোস্ত’ নামৰ চেনেলটোৱে বিশ্বজুৰি সৰ্বাধিক চৰ্চা লাভ কৰিছে। অসমৰ সুৰজিতে ২০২০ চনতে এই চেনেলটো আৰম্ভ কৰিছিল যদিও শেহতীয়াকৈহে ই অভূতপূৰ্ব জনপ্ৰিয়তা লাভ কৰিবলৈ সক্ষম হৈছে। বান্দৰৰ কাল্পনিক আৰু হাস্যকৰ কাহিনীৰ ওপৰত ভিত্তি কৰি নিৰ্মিত এই অতিবাস্তৱবাদী ভিডিঅ’সমূহ কোনো গভীৰ গৱেষণা বা অধিক পৰিশ্ৰম নোহোৱাকৈ কেৱল কৃত্রিম মেধা ব্যৱহাৰ কৰি প্ৰস্তুত কৰা হয়।
পৰিসংখ্যা অনুসৰি, প্ৰায় ২৮ লাখ ছাবস্ক্ৰাইবাৰ থকা এই চেনেলটোৰ ভিডিঅ’সমূহ ২০০ কোটিতকৈও অধিক বাৰ চোৱা হৈছে। এই বিপুল দৰ্শকৰ সংখ্যাৰ বলতেই চেনেলটোৱে বছৰি প্ৰায় ৩৫ কোটি টকা বা ৪২.৫ লাখ ডলাৰ উপাৰ্জন কৰিবলৈ সক্ষম হৈছে। প্ৰযুক্তি গৱেষক ৰোহিনী লক্ষণে এই সন্দৰ্ভত মত প্ৰকাশ কৰিছে যে কেৱল মাত্ৰ মানুহৰ দৃষ্টি আকৰ্ষণ কৰিব পৰা অতিৰঞ্জিত আৰু অযুক্তিকৰ কাহিনীৰ বাবেই এনেধৰণৰ সমলে দ্ৰুতগতিত সফলতা লাভ কৰিছে।
এই সমগ্ৰ বিষয়টোৱে বৰ্তমানৰ ডিজিটেল সৃষ্টিকৰ্তা বা কন্টেন্ট ক্ৰিয়েটৰসকলৰ মাজত এক উদ্বেগৰ সৃষ্টি কৰিছে। বিশেষজ্ঞসকলৰ মতে, কষ্টসাধ্য আৰু সৃষ্টিশীল কামৰ পৰিৱৰ্তে যদি কেৱল মেচিনৰ দ্বাৰা নিৰ্মিত অৰ্থহীন বিষয়বস্তুৱে অধিক জনপ্ৰিয়তা লাভ কৰে, তেন্তে ই ভৱিষ্যতে প্ৰকৃত সৃজনশীলতাক স্তব্ধ কৰি পেলাব পাৰে। সামাজিক মাধ্যমতো এই সন্দৰ্ভত ব্যাপক চৰ্চা আৰু সমালোচনা চলিছে, কিয়নো এনেধৰণৰ কন্টেন্টে দৰ্শকৰ মানসিক স্বাস্থ্যৰ ওপৰত নেতিবাচক প্ৰভাৱ পেলোৱাৰ পূৰ্ণ সম্ভাৱনা থাকে।
