ঘৰলৈ উভতি আহক ল’ৰা। এই দাবী এইবাৰৰ কুম্ভমেলাত বহু চৰ্চিত হোৱা আইআইটি বাবা ওৰফে অভয় সিঙৰ পৰিয়ালৰ। এইগৰাকী সন্ন্যাসী মকৰ সংক্ৰান্তিৰ বাবে অমৃত স্নান কৰিবলৈ গংগা, যমুনা, সৰস্বতী নদীৰ সংগমস্থলী ত্ৰিবেণী সংগমত উপস্থিত হৈছে। তাতে সংবাদ মাধ্যমৰ সন্মুখত তেওঁৰ জীৱনৰ বিষয়ে দুই এটা কথা কোৱা শুনা গ’ল। আৰু তাৰ পাছত ধুমুহাৰ দৰে ভাইৰেল হৈ পৰিল।
যদিও আইআইটি বাবাৰ প্ৰকৃত নাম অভয় আছিল, তথাপিও তপস্বী জীৱনত তেওঁ মাছানি গোৰক্ষ নামেৰে পৰিচিত। এই অভয়ক ঘৰলৈ ঘূৰাই আনিবলৈ হতাশ হৈ পৰিছে পৰিয়ালটো। অভয়ে আই আই টি বম্বেৰ পৰা অভিযান্ত্ৰিক ডিগ্ৰী পাছ কৰে। তাৰ পাছত ৪ বছৰ মুম্বাইত এৰোস্পেচ ইঞ্জিনিয়াৰ হিচাপে কাম কৰিছিল। কিন্তু লাহে লাহে তেওঁ উপলব্ধি কৰে যে এই জীৱনটো তেওঁৰ বাবে নহয়।
কিন্তু সেই সময়ৰ পৰা তেওঁ মঠ-মন্দিৰ জীৱনৰ ফালে ঢাল খোৱা আৰম্ভ কৰে। তেওঁৰ আটাইতকৈ ডাঙৰ হবী আছিল ভ্ৰমণ ফটোগ্ৰাফী। সেইটো কৰিবলৈ আৰম্ভ কৰিলে এটা কোৰ্চ লৈ। অভয়ে দাবী কৰে যে তাৰ পিছত জীৱনৰ প্ৰতি তেওঁৰ দৃষ্টিভংগী সলনি হৈছিল।
অভয় সিঙৰ পিতৃ কৰণ গ্ৰেৱাল হাৰিয়ানাৰ বাসিন্দা আৰু পেছাত এজন অধিবক্তা। তেওঁ ক‘লে, “ল’ৰাটো আৰম্ভণিৰে পৰাই আধ্যাত্মিক আছিল। ছমাহ আগলৈকে তেওঁৰ লগত যোগাযোগ ৰাখিছিলো। ইয়াৰ পাছত ল’ৰাজনে নিজেই পৰিয়ালটোৰ লগত যোগাযোগ বন্ধ কৰি দিলে। আগতে হৰিদ্বাৰত বুলি শুনি তালৈ লৰালৰিকৈ গৈছিলোঁ। কিন্তু আমি লগ পোৱা নাছিলোঁ। হয়তো ইচ্ছাকৃতভাৱে লগ হোৱা নাছিল।”
লগতে পুত্ৰ ঘৰলৈ উভতি অহাৰ সন্দৰ্ভত দেউতাকে লগতে কয়, “মই আৰু মোৰ সমগ্ৰ পৰিয়ালে বিচাৰো যে তেওঁ যিমান সোনকালে পাৰে ঘৰলৈ উভতি যাওক।” মাকেও তাক ঘৰলৈ উভতি যাবলৈ ক’লে। কিন্তু তেওঁৰ একমাত্ৰ উত্তৰ আছিল যে তেওঁ সন্যাস ধৰ্ম গ্ৰহণ কৰাৰ পাছত আৰু সেয়া সম্ভৱ হৈ উঠা নাই। নিজৰ জীৱন বাছি লোৱাৰ অধিকাৰ প্ৰত্যেকৰে আছে।
জনা যায় যে অভয়ে ভ্ৰমণ ফটোগ্ৰাফীৰ উপৰিও নিজাকৈ কোচিং চেণ্টাৰো খুলিছিল। তাত তেওঁ পদাৰ্থ বিজ্ঞানৰ শিক্ষা দিছিল। কিন্তু এজন মেধাৱী ছাত্ৰ হোৱাৰ পাছতো তেওঁ এই প্ৰচেষ্টাত বিশেষ সফলতা লাভ কৰিব নোৱাৰিলে। তেতিয়াই তেওঁ কাৰ্যতঃ সকলো ত্যাগ কৰি আধ্যাত্মিক হোৱাৰ কথা ভাবিছিল।
বৰ্তমান অভয়ে নিজকে শিৱৰ ভক্তি ভক্ত বুলি দাবী কৰি তপস্যাৰ জীৱন যাপন কৰি আছে। আৰু সেইবাবেই মহাকুম্ভ এতিয়া তেওঁৰ ঠিকনা হৈ পৰিছে।
