ক’ৰ’না ভাইৰাছত আক্ৰান্ত সকলৰ বাবে সাহায্য পুজি গঠনৰ বাবে ভাৰতীয় দলৰ অধিনায়ক বিৰাট কোহলী আৰু দক্ষিণ আফ্ৰিকাৰ প্ৰাক্তন তাৰকা ক্ৰিকেটাৰ এ বি ডি ভিলিয়াৰ্ছে তেওঁলোকৰ আই পি এলৰ কিছু সংখ্যক স্মৰণীয় সামগ্ৰী নিলাম কৰাৰ সিদ্ধান্ত গ্ৰহণ কৰিছে।
২০১৬ চনত আই পি এলৰ এখন খেলত গুজৰাট লায়নছৰ বিৰুদ্ধে বিৰাট কোহলী আৰু ভিলিয়াৰ্ছে ২২৯ ৰানৰ যুটি বান্ধিছিল য’ত দুয়োগৰাকী তাৰকা ক্ৰিকেটাৰে শতকীয় ইনিংছ খেলিছিল। এই খেলখনত দুয়ো ব্যৱহাৰ কৰা ক্ৰিকেটৰ সামগ্ৰী সমূহ কোভিদ-১৯ৰ বিৰুদ্ধে যুঁজাৰ বাবে সাহায্য পুজি গঠনৰ হকে দুয়ো নিলাম কৰিব।
‘‘খেলখনত মই ১২০ ৰান আৰু তুমিও শতৰান কৰিছিলা…..যিটো প্ৰতিদিনে নহয়,’’ দক্ষিণ আফ্ৰিকাৰ ক্ৰিকেটাৰ গৰাকীয়ে কয়।
‘‘অংশ লওক…..কিছু সংখ্যক মানুহে নিজৰ খাদ্য লাভ কৰিব,’’ ভিলিয়াৰ্ছে লগতে কয়।
উল্লেখযোগ্য যে, বিৰাট কোহলী আৰু ভিলিয়াৰ্ছে কোভিদ-১৯ সংক্ৰমণ ৰোধৰ ক্ষেত্ৰত সকলোৱে সহযোগিতা কৰিব লাগে বুলি মন্তব্য কৰি সামাজিক দূৰত্ব আৰু ল’কডাউনৰ নিয়ম সমূহ মানি চলাটোৱে বৰ্তমানলৈ আটাইতকৈ নিৰ্ভৰযোগ্য উপায় বুলি কয়।
ভাৰতৰ লগতে দক্ষিণ আফ্ৰিকাতো ক’ৰ’না ভাইৰাছৰ সংক্ৰমণ ক্ৰমান্বয়ে বৃদ্ধি পাইছে।
আনহাতে, ক’ৰ’না ভাইৰাছৰ সংক্ৰমণৰ বাবে ভাৰত আৰু দক্ষিণ আফ্ৰিকাৰ মাজত অনুষ্ঠিত হ’বলগীয়া এদিনীয়া শৃংখলা বাতিল কৰা হৈছিল আৰু দক্ষিণ আফ্ৰিকাৰ ক্ৰিকেটাৰ সকলে ভাৰতৰ পৰা উভতি গৈ নিজ দেশত কোৱাৰিণ্টাইনত থাকিবলগীয়া হৈছিল।
