ক্ৰিকেট জগতৰ আটাইতকৈ বিপজ্জনক অ’পেনাৰৰ তালিকাত আছে প্ৰাক্তন ভাৰতীয় ক্ৰিকেটাৰ বীৰেন্দ্ৰ ছেহৱাগ। ক্ৰিকেট কেৰিয়াৰত তেওঁ দেশক বহু যুঁজত জয়ী কৰিছে। এই ভাৰতীয় কিংবদন্তিজনে বাৰে বাৰে বেট হাতত লৈ নিজকে প্ৰমাণ কৰি আহিছে। এইবাৰ সেই বীৰেন্দ্ৰক দেখা গ’ল সম্পূৰ্ণ বেলেগ চৰিত্ৰত।
শেহতীয়াকৈ ভাৰতীয় তাৰকাগৰাকীয়ে তেওঁৰ ছ’চিয়েল মিডিয়া হেণ্ডেলৰ পৰা যমৰাজৰ সাজ-পোছাক পৰিধান কৰি কেইখনমান ছবি শ্বেয়াৰ কৰিছে। এইটো দেখি অনুৰাগীসকল সম্পূৰ্ণৰূপে স্তম্ভিত হৈ পৰে। কিন্তু কিয় হঠাৎ যমৰাজৰ বেশত আবিৰ্ভাৱ হ’ল বীৰেন্দ্ৰ?
তেওঁৰ ছ’চিয়েল মিডিয়া হেণ্ডেলৰ পৰা যমৰাজৰ সাজ-পোছাক পৰিহিত এখন ছবি শ্বেয়াৰ কৰাৰ পিছত বহুতে প্ৰশ্ন কৰিছে যে বীৰেন্দ্ৰ ছেহৱাগ হঠাতে কিয় এনে অৱতাৰত? বহুতে ধাৰণা কৰে যে ভাৰতীয় তাৰকাগৰাকীয়ে যাত্ৰা বা থিয়েটাৰ দলত যোগদান কৰিছে।
কিন্তু সেইবোৰ একো নহয়। বৰঞ্চ এইবাৰ টিম ইণ্ডিয়াৰ প্ৰাক্তন সদস্যগৰাকীয়ে আৰু ডাঙৰ চমক দিবলৈ ওলাইছে। দৰাচলতে ৰিয়েলিটি শ্ব’ ৰাইজ এণ্ড ফ’ল ছিজন ২ য়ে বজাৰ কঁপাবলৈ আহি আছে। আৰু এই শ্বোৰ সঞ্চালকৰ ৰূপত দেখা যাব ছেহৱাগক।
কোৱা বাহুল্য যে ক্ৰিকেট খেলপথাৰ ত্যাগ কৰি এতিয়া মনোৰঞ্জন জগতত ভৰি দিবলৈ ওলাইছে ছেহৱাগে। আছনীৰ গ্ৰোভাৰে আমাজন এমএক্স প্লেয়াৰছ ৰাইজ এণ্ড ফ’লৰ প্ৰথম ছিজনৰ সঞ্চালনা কৰিছিল।
এতিয়া সেই ৰিয়েলিটি শ্ব’ৰ আগন্তুক দ্বিতীয় ছিজন সঞ্চালনাৰ দায়িত্ব দিয়া হৈছে টিম ইণ্ডিয়াৰ প্ৰাক্তন সদস্যক। আৰু সেই শ্ব’টোৰ প্ৰচাৰত যোগদান কৰাৰ সময়তে ছেহৱাগে যমৰাজৰ অভিনৱ ৰূপত ধৰা দিছে।
কিছুদিন পূৰ্বে মুক্তি পাইছিল ছেহৱাগৰ নতুন শ্বোৰ টিজাৰ। সেই প্ৰমো ভিডিঅ’টোত ভাৰতীয় তাৰকাগৰাকীক কেতিয়াবা ছাৰ আইজাক নিউটনৰ ৰূপত, কেতিয়াবা সাধাৰণ স্কুলৰ শিক্ষক হিচাপে, কেতিয়াবা ডাক্তৰ বা কাৰাটেৰ প্ৰশিক্ষক হিচাপে দেখা গৈছে।
ভিডিঅ’টোৰ শেষৰ ফালে যমৰাজৰ চৰিত্ৰত অৱতীৰ্ণ হয় নজফগড়ৰ নবাবে। সেই সাজ-পোছাকেৰে ছচিয়েল মিডিয়াত এটি আভাস জনসাধাৰণৰ মাজলৈ লৈ আহিছে ভাৰতীয় তাৰকাগৰাকীয়ে।
মন কৰিবলগীয়া যে ৰাইজ এণ্ড ফ’লৰ মূল ধাৰণাটোৱেই সম্পূৰ্ণ বিপৰীত জগতক লৈ নিৰ্মিত। এফালে বিলাসী অতিথিশালা, আনফালে বেছমেণ্ট। জানিব পৰা মতে, নতুন ছিজনত ১৫ গৰাকী তাৰকা প্ৰতিযোগীয়ে অংশগ্ৰহণ কৰিব। যাক মূলতঃ দুটা দলত ভাগ কৰি দিয়া হ’ব। এটা দল থাকিব শাসক বা ৰুলাৰ্ছ হিচাপে, আনটো দল থাকিব ৱৰ্কাৰ্ছ বা কৰ্মী হিচাপে।
প্ৰতি মুহূৰ্ততে পৰিৱৰ্তিত হোৱা এই কৌশলগত ৰিয়েলিটি শ্ব’ত সঞ্চালকৰ ভূমিকাৰ সৈতে ছেহৱাগে কিমান ভালদৰে খাপ খাব পাৰে সেয়া হ’ব লক্ষ্যণীয়। উল্লেখ্য যে ৰাইজ এণ্ড ফ’ল হৈছে মূলতঃ ব্ৰিটিছ প্ৰযোজনা কোম্পানী লেম্বাৰ্টে প্ৰস্তুত কৰা জনপ্ৰিয় শ্ব’। এইবাৰ সেইটোকে বানিজয় এছিয়াই দেশীয় সংস্কৰণত প্ৰস্তুত কৰিছে।
