১০ বছৰ পূৰ্বে ভাৰতীয় ক্ৰিকেট জগত এক বিৰল ঐতিহাসিক ক্ষণৰ সাক্ষী হৈছিল।
১৯৮৩ চনৰ পাছত দ্বিতীয়বাৰৰ বাবে টীম ইণ্ডিয়াই আইচিচি বিশ্বকাপ জয় কৰি ভাৰতীয় ক্ৰিকেটানুৰাগীৰ এটি বহুদিনীয়া আকাংক্ষা পূৰণ কৰিছিল।
বিশ্বকাপৰ ফাইনেলখন অনুষ্ঠিত হৈছিল ২০১১ চনৰ ২ এপ্ৰিলত মুম্বাইৰ ৱাংখেড়ে ষ্টেডিয়ামত।
বিপক্ষ আছিল শ্ৰীলংকা।
মহেন্দ্ৰ সিং ধোনীয়ে কোবোৱা এটা বিশাল ছয়ৰ জৰিয়তে ভাৰতে বিজয়লক্ষ্যত উপনীত হৈছিল।
বিজকাপ বিজয়ৰ দহ বছৰ পূৰ্তি উপলক্ষে টুইটাৰ আৰু ইনষ্টাগ্ৰামত টীম ইণ্ডিয়াৰ বিশ্বকাপবিজয়ী খেলুৱৈসকলে আজি কৰা প’ষ্টসমূহে চৰ্চা লাভ কৰিছে।
যুৱৰাজ সিং, হৰভজন সিং, বিৰেন্দৰ সেহৱাগ- কোনো এইক্ষেত্ৰত পাছ পৰি থকা নাই।
যুৱৰাজ সিঙে ইনষ্টাগ্ৰামত এটা ভিডিঅ’ শ্বেয়াৰ কৰি লিখিছে যে ২০১১ চনৰ ২ এপ্ৰিল তাৰিখটোত এটা ইতিহাস ৰচনা কৰা হৈছিল।
ভিডিঅ’টোত বিশ্বকাপখনৰ কেইবাটাও মুহূৰ্ত তেওঁ সংলগ্ন কৰিছে।
View this post on Instagram
বিশ্বকাপ বিজয়ত অন্যতম অৰিহণা যোগাই ‘মেন অৱ দ্যা চিৰিজ’ সন্মান লাভ কৰা তাৰকা অলৰাউণ্ডাৰজনে ইনষ্টাগ্ৰাম প’ষ্টটোত লিখে যে দেশৰ গৌৰৱপূৰ্ণ এই অনুভৱটো প্ৰকাশ কৰিবলৈ তেওঁ কোনো শব্দ বিচাৰি পোৱা নাই।
টীম ইণ্ডিয়াৰ তদানীন্তন প্ৰশিক্ষক গেৰী কাৰ্ষ্টেনক সোঁৱৰণ কৰি যুৱৰাজ সিঙে কয় যে কাৰ্ষ্টেনে তেওলোকৰ মাজত ঐক্য আনিছিল আৰু বিশ্ববিজয়ী হোৱাৰ বাবে আত্মবিশ্বাসী কৰি তুলিছিল।
বিশ্বকাপ বিজয়ী দলটোৰ অন্যতম মেৰুদণ্ডস্বৰূপ শচীন টেণ্ডুলকাৰকো সোঁৱৰণ কৰি যুৱৰাজে কয় যে টেণ্ডুলকাৰে দশক ধৰি কঢ়িয়াই লৈ ফুৰা সপোনটো পূৰণ কৰিবলৈ তেওঁলোক উন্মুখ হৈ আছিল।
তদুপৰি ভিডিঅ’টোত তেওঁ মহেন্দ্ৰ সিং ধনী, বিৰেন্দৰ সেহৱাগ, শচীন টেণ্ডুলকাৰ, জাহিৰ খানে বিশ্বকাপবিজয়ত যোগোৱা অনবদ্য অৰিহণাকো সোঁৱৰণ কৰে।
যুৱৰাজ সিঙৰ উপৰিও টীম ইণ্ডিয়াৰ প্ৰাক্তন মাৰমুখী অপেনাৰ বিৰেন্দৰ সেহৱাগেও টুইটাৰযোগে নিজৰ মনোভাৱ প্ৰকাশ কৰিছে।
April 2: 10 years ago , the moment of a lifetime. #TeamIndia 🇮🇳 pic.twitter.com/mhicAPqDL2
— Virender Sehwag (@virendersehwag) April 2, 2021
সেহৱাগে টুইটাৰত লিখিছে যে ১০ বছৰ পূৰ্বৰ ২ এপ্ৰিল তাৰিখটো জীৱনজোৰা এটা স্মৰণীয় মুহূৰ্ত।
আনহাতে, বিশ্বকাপখনৰ ফাইনেলত ৯৭ ৰাণৰ দূৰ্দান্ত এটা ইনিংছ খেলা টীম ইণ্ডিয়াৰ প্ৰাক্তন অপেনাৰ গৌতম গম্ভীৰেও সাংবাদিকক কয় যে এই সময় হৈছে ভাৰতীয় ক্ৰিকেটে আগুৱাই যোৱাৰ সময়।
”হয়তো, এই সময় হৈছে পৰৱৰ্তী বিশ্বকাপ বিজয় কৰাৰ।”- গম্ভীৰে এইদৰে কয়।
তেওঁ কয় যে যোৱা দহ বছৰত ২০১৫ আৰু ২০১৯ চনত ভাৰতে বিশ্বকাপ জয় কৰা হ’লে দেশখন ‘ক্ৰিকেট চুপাৰপাৱাৰ’ হৈ পৰিলেহেঁতেন।
তেওঁ কয় যে বিশ্বকাপবিজয়ী ক্ৰিকেটাৰসকলে আচৰিত ধৰণৰ একো কাম কৰা নাছিল, বিশ্বকাপৰ দলত স্থান লাভ কৰি কেৱল নিজৰ দায়িত্ব পালন কৰিছিল।
”পাছলৈ বেছিকৈ ঘূৰি চালে, আমি আগলৈ আগবাঢ়িব কেতিয়াও নোৱাৰো।”- গম্ভীৰে এইদৰে কয়।
