সদ্যঘোষিত উচ্চতৰ মাধ্যমিকৰ চূড়ান্ত পৰীক্ষাৰ কলা শাখাত প্ৰথম বিভাগত সুখ্যাতিৰে উত্তীৰ্ণ হৈ বাক্সা জিলাৰ তামুলপুৰৰ এগৰাকী দিব্যাংগ ছাত্র ঋতুৰাজ দাসে অঞ্চলটোলৈ গৌৰৱ কঢ়িয়াই আনে। তামুলপুৰ মহকুমাৰ দ্বাৰকুচি নিবাসী দিলীপ দাস আৰু মনালিছা দাসৰ পুত্ৰ তথা ঋতুৰাজে ৭১.১৪% নম্বৰ লাভ কৰি ৰাজ্যৰ ভিতৰতে দৃষ্টিহীন ছাত্ৰৰ ভিতৰত সৰ্বোচ্চ নম্বৰ লাভ কৰে।
২০১৭ চনত হাইস্কুল শিক্ষান্ত পৰীক্ষাত ৭৬% নম্বৰ লাভ কৰি সুখ্যাতিৰে উত্তীৰ্ণ হৈ কটন বিশ্ববিদ্যালয়ৰ দৃষ্টিহীনসকলৰ বাবে থকা কলা শাখাত নামভৰ্তি কৰি এইবাৰ উচ্চতৰ মাধ্যমিকৰ চূড়ান্ত পৰীক্ষাত অৱতীৰ্ণ হৈছিল।
বুৰঞ্জীত ৯৩ নম্বৰ লৈ প্ৰথম বিভাগত উত্তীৰ্ণ হোৱাৰ ঋতুৰাজৰ এই সাফল্যত পিতৃ-মাতৃৰ লগতে পৰিয়াল তথা সমূহ দ্বাৰকুছিবাসী ৰাইজ উৎফুল্লিত হৈ পৰিছে। ইয়াৰ উপৰি অসম চৰকাৰৰ মন্ত্ৰী ভবেশ কলিতায়য়ো কালি নিশা ছাত্ৰ গৰাকীৰ বাসগৃহত উপস্থিত হৈ তেওঁক ফুলাম গামোচাৰে সম্বৰ্ধনা জনোৱাৰ লগতে ছাত্ৰগৰাকীৰ স্নাতক পঢ়াৰ খৰছ বহন কৰিব বুলি জানিবলৈ দিয়ে।
উল্লেখযোগ্য যে ঋতুৰাজে কটন বিশ্ববিদ্যালয়ত বুৰঞ্জীত মেজৰ লৈ স্নাতকত নামভৰ্তি কৰাৰ মন পুহি ৰাখিছে।
মন্ত্ৰী গৰাকীয়ে আগবঢ়োৱা সহায়ৰ বাবে ছাত্ৰজনৰ পৰিয়ালৰ লোকে ভবেশ কালিতাকভবেশ কালিতাক ধন্যবাদ জনোৱাৰ লগতে ফুলাম গামোচাৰে সম্বৰ্ধনা জ্ঞাপন কৰে।
ইয়াৰ উপৰি ছাত্র গৰাকীৰ ফলাফলত তামুলপুৰ মহকুমাৰ বিভিন্ন ছাত্ৰ সংগঠনেও সন্তুষ্টি প্ৰকাশ কৰি বাসগৃহত উপস্থিত হৈ ছাত্র গৰাকীক সম্বৰ্ধনা জনায়।
