সোমবাৰে উচ্চতম ন্যায়ালয়ে ২০১৬–১৭ চনলৈকে দূৰসংযোগ বিভাগে উত্থাপন কৰা অতিৰিক্ত সমন্বিত মুঠ ৰাজহ (এজিআৰ) দাবী বাতিল কৰাৰ বাবে ভোডাফোন আইডিয়া লিমিটেডে কৰা অনুৰোধ পৰীক্ষা কৰিবলৈ কেন্দ্ৰক অনুমতি প্ৰদান কৰিছে। আদালতে লক্ষ্য কৰে যে বিষয়টো চৰকাৰৰ অধিকাৰ ক্ষেত্ৰত পৰে।
মুখ্য ন্যায়াধীশ বি আৰ গাভাই আৰু ন্যায়াধীশ কে বিনোদ চন্দ্ৰনৰ বিচাৰপীঠে দূৰসংযোগ বিভাগৰ শেহতীয়া অতিৰিক্ত সমন্বিত মুঠ ৰাজহৰ দাবীক প্ৰত্যাহ্বান জনাই ভোডাফোন আইডিয়াই কৰা আবেদনৰ শুনানি গ্ৰহণ কৰে। কোম্পানীটোৱে যুক্তি দৰ্শাইছিল যে ২০১৬–১৭ চনৰ বাবে ৫,৬০৬ কোটি টকাৰ এই অতিৰিক্ত দাবীসমূহ অবৈধ, কিয়নো ইয়াৰ এজিআৰ দায়বদ্ধতা ইতিমধ্যে উচ্চতম ন্যায়ালয়ৰ ২০১৯ চনৰ ৰায়দানৰ দ্বাৰা চূড়ান্ত কৰা হৈছে।
শুনানিৰ সময়ত কেন্দ্ৰক প্ৰতিনিধিত্ব কৰি ছলিচিটৰ জেনেৰেল তুষাৰ মেহতাই আদালতক জনাইছে যে ভোডাফোন আইডিয়াত চৰকাৰৰ ৪৯% অংশীদাৰিত্ব আছে, আৰু প্ৰায় ২০ কোটি গ্ৰাহকে ইয়াৰ সেৱাৰ ওপৰত নিৰ্ভৰশীল। তেওঁ কয় যে গ্ৰাহকৰ স্বাৰ্থ সুৰক্ষিত কৰাৰ বাবে কোম্পানীটোৰ উদ্বেগ পুনৰীক্ষণ কৰিবলৈ কেন্দ্ৰই ইচ্ছুক।
বিচাৰপীঠে পৰ্যবেক্ষণ কৰে যে ভোডাফোন আইডিয়াত চৰকাৰৰ পৰ্যাপ্ত পৰিমাণৰ ইকুইটি আৰু লাখ লাখ গ্ৰাহকৰ ওপৰত ইয়াৰ প্ৰভাৱৰ বাবে এই বিষয়টোৰ পুনৰ বিবেচনাৰ ক্ষেত্ৰত ন্যায্যতা প্ৰদান কৰিছে। আবেদনখন নিষ্পত্তি কৰি মুখ্য ন্যায়াধীশ গাভাইয়ে কয় যে, ‘আমি কেন্দ্ৰীয় চৰকাৰে বিষয়টোৰ পুনৰ মূল্যায়ন আৰু উপযুক্ত পদক্ষেপ লোৱাৰ ক্ষেত্ৰত কোনো সমস্যা নাই।
ভোডাফোন আইডিয়াৰ হৈ উপস্থিত থকা জ্যেষ্ঠ অধিবক্তা মুকুল ৰোহাটগীয়ে যুক্তি আগবঢ়ায় যে ২০১৯ চনৰ ৰায়দানত ইতিমধ্যে এজিআৰৰ বাবদ ধন নিষ্পত্তি হোৱাৰ বাবে ড’টৰ অতিৰিক্ত দাবী যুক্তিসংত নহয়।
উল্লেখ্য যে টেলিকম অপাৰেটৰসকলে চৰকাৰক দিয়া অনুজ্ঞাপত্ৰৰ মাচুল আৰু স্পেকট্ৰম চাৰ্জৰ হিচাপত ব্যৱহাৰ কৰা আয় হৈছে এজিআৰ। এজিআৰৰ হিচাপত নন-টেলিকম ৰাজহ অন্তৰ্ভুক্ত কৰাৰ বাবে হোৱা বিবাদৰ ফলত ভোডাফোন আইডিয়া আৰু ভাৰতী এয়াৰটেলৰ দৰে কোম্পানীসমূহৰ বাবে যথেষ্ট দায়বদ্ধতা আহি পৰিছে।
