ভাৰতৰ নিৰ্বাচন আয়োগে প্ৰদান কৰা নিৰ্দেশ অনুসৰি এইবাৰৰ নিৰ্বাচনত আশী বছৰৰ ওপৰৰ ভোটাৰ, বিশেষ ভাৱে সক্ষম ভোটাৰ আৰু ক’ভিড ৰোগত আক্ৰান্ত হোৱা ভোটাৰসকলক ঘৰতেই পোষ্টেল বেলট যোগেদি ভোটদান কৰাৰ এক ব্যৱস্থা গ্ৰহণ কৰিছে।
নিৰ্বাচন আয়োগৰ এই নিদেৰ্শনা পালন কৰি শিৱসাগৰ নিৰ্বাচন জিলাৰ অন্তৰ্গত ১০৩ আমগুৰি, ১০৭ থাওৰা আৰু ১০৮ শিৱসাগৰ বিধানসভা সমষ্টিৰ এই শ্ৰেণীৰ ভোটাৰক ইতিমধ্যে ফৰ্ম ১২(ঘ) প্ৰদান কৰা হৈছে।
ইতিমধ্যে এই আবেদনকাৰী ভোটাৰসকলৰ সকলো তথ্য পৰীক্ষণৰ অন্তত শিৱসাগৰ নিৰ্বাচনী জিলাত কাইলৈৰ পৰা অৰ্থাৎ ১৭ মাৰ্চৰ পৰা ভোট সংগ্ৰহ প্ৰক্ৰিয়া আৰম্ভ কৰাৰ দিহা কৰা হৈছে।
শিৱসাগৰ নিৰ্বাচনী জিলাৰ তিনিটা সমষ্টিত থকা ৫৭টা ছেক্টৰত পাঁচজনীয়া একোটাকৈ দলে এই ভোট সংগ্ৰহ অভিযানত ব্ৰতী হ’ব। ১০৩-আমগুৰি বিধানসভা সমষ্টিৰ বাবে ১৯টা, ১০৭-থাওৰা বিধানসভা সমষ্টিৰ বাবে ১৮টা আৰু ১০৮-শিৱসাগৰ বিধানসভা সমষ্টিৰ বাবে ২০টাকৈ দল ইতিমধ্যে সাজু কৰা হৈছে। প্ৰতিটো দলত ২জনকৈ পলিং বিষয়া, ১জন ভিডিঅ’গ্ৰাফাৰ, ১জন মাইক্ৰ’ অৱজাৰভাৰ আৰু ১জন নিৰাপত্তাৰক্ষী থাকিব।
১২(ঘ) নং ফৰ্মযোগে আবেদন জনোৱা উক্ত শ্ৰেণীৰ যোগ্য বুলি বিবেচিত হোৱা ব্যক্তিসকলৰ ঘৰে ঘৰে গৈ এই দলটোৱে ভোটাৰজনক বেলট পেপাৰ প্ৰদান কৰিব।
এই বেলট পেপাৰত আবেদনকাৰী ব্যক্তিজনে গোপনে ভোটদান কৰি দলটোৱে লগত লৈ যোৱা কেনভাছ বেগত বেলট পেপাৰ ভৰাই দিব। এনদৰে প’লিং দলটোৱে সংগ্ৰহ কৰা কেনভাছ বেগ দলটোৱে সমষ্টি অনুযায়ী সহকাৰী ৰিটাৰ্ণিং বিষয়াৰ হাতত জমা দিব।
সহকাৰী ৰিটাৰ্ণিং বিষয়াই সিদিনাই এই কেনভাছ বেগসমূহ ষ্ট্ৰং ৰুমত ৰখাৰ ব্যৱস্থা কৰিব আৰু ভোট গণনাৰ দিনা এই কেনভাছ বেগত থকা ভোটসমূহ গণনাৰ বাবে ভোটগণনা কেন্দ্ৰলৈ প্ৰেৰণ কৰা হ’ব।
যিসকল ভোটাৰে এনেদৰে ভোটদানৰ আবেদন জনাই যোগ্য বুলি বিবেচিত হৈছে তেওঁলোকে ঘৰত উপস্থিত নথকাৰ বাবে ভোটদান কৰিব নোৱাৰিলে কিন্তু ভোটগ্ৰহণ কেন্দ্ৰত ভোটদান কৰিব নোৱাৰিব, কিয়নো ভোটাৰ তালিকাত তেওঁলোকৰ নামৰ কাষত এইবাৰৰ বাবে এবছেন্টি ভোটাৰ হিচাবে ৰঙা চিয়াঁহীৰে PB চিহ্নিত কৰা হৈছে।
শিৱসাগৰ নিৰ্বাচনী জিলাত ১২(ঘ) ফর্মৰ জৰিয়তে ঘৰতে ভোটদান কৰিব বিচৰা বিশেষভাৱে সক্ষম ভোটাৰৰ সংখ্যা ৫০৫ গৰাকী। ইয়াৰে ১০৩ আমগুৰি বিধানসভা সমষ্টিত ১৯২ গৰাকী, ১০৭ থাওৰা বিধানসভা সমষ্টিত ১০৯ গৰাকী আৰু ১০৮ শিৱসাগৰ বিধানসভা সমষ্টিত ২০৪ গৰাকী।
একেদৰে আশীৰ উৰ্ধৰ ভোটাৰৰ মুঠ সংখ্যা ১৮৪৪ গৰাকী। ইয়াৰে ইয়াৰে ১০৩ আমগুৰি বিধানসভা সমষ্টিত ৫৭২ গৰাকী, ১০৭ থাওৰা বিধানসভা সমষ্টিত ৫৬২ গৰাকী আৰু ১০৮ শিৱসাগৰ বিধানসভা সমষ্টিত ৭১০ গৰাকী।
শিৱসাগৰ নির্বাচনী জিলাত কোনো ক’ভিড ৰোগীয়ে ১২(ঘ) প্ৰপত্ৰ যোগে আবেদন জনোৱা নাই।
উল্লেখযোগ্য যে, বহুসংখ্যক ভোটাৰে এই এবছেন্টি ভোটাৰৰ বাবে আবেদন জনাইছিল যদিও শুদ্ধ তথ্যৰ অভাৱত বহু আবেদনকাৰীৰ আবেদন নাকচ হয়।
অবশ্যে, এইসকল ভোটাৰে ভোটগ্ৰহণৰ দিনা ভোটগ্ৰহণ কেন্দ্ৰত উপস্থিত হৈ ভোটদান কৰিব পাৰিব। কাইলৈৰ পৰা এই কাৰ্যসূচী আৰম্ভ হ’ব আৰু তিনি চাৰি দিনৰ ভিতৰত এই প্ৰক্ৰিয়াৰ অন্ত পৰিব বুলি আশা কৰা হৈছে।
