গৰ্গ চেটাৰ্জীৰ বিৰুদ্ধে গ্ৰেপ্তাৰী পৰৱানা জাৰি
কামৰূপ মহানগৰ জিলাৰ মহকুমা ন্যায়িক দণ্ডাধীশে স্বৰ্গদেউ চাউলুং চ্যুকাফাক চীনা আক্ৰমণকাৰী আখ্যা দিয়া গৰ্গ চেটাৰ্জীৰ বিৰুদ্ধে গ্ৰেপ্তাৰী পৰৱানা জাৰি কৰিছে।
চেটাৰ্জীক গ্ৰেপ্তাৰ কৰি ৩ জুলাই বা তাৰ আগতে আদালতত হাজিৰ কৰিবলৈ ক’লকাতাৰ চেতলা আৰক্ষী থানাৰ ভাৰপ্ৰাপ্ত বিষয়াজনক নিৰ্দেশ দিয়া হৈছে।
কামৰূপ মহানগৰ জিলাৰ মহকুমা ন্যায়িক দণ্ডাধীশে কলকাতাৰ গৰ্গ চেটাৰ্জী নামৰ লোকজনৰ বিৰুদ্ধে গ্ৰেপ্তাৰী পৰোৱাণা জাৰী কৰাৰ লগতে কলকাতাৰ চেটলা থানাক লোকজনক গ্ৰেপ্তাৰ কৰি ৩জুলাই বা তাৰ আগেয়ে আদালতত হাজিৰ কৰোৱাবলৈ নিৰ্দেশ দিছে@CMOfficeAssam @assampolice
— AIR News Guwahati (@airnews_ghy) June 24, 2020
যোৱা ১৯ জুনত অসমৰ মুখ্য মন্ত্ৰী সৰ্বানন্দ সোণোৱালে বিতৰ্কিত মন্তব্য কৰা ব্যক্তিজনক গ্ৰেপ্তাৰৰ বাবে গুৱাহাটীৰ আৰক্ষী আয়ুক্তক নিৰ্দেশ দিছিল।
অসম আৰক্ষীৰ দল এটা এই সন্দৰ্ভত ক’লকাতালৈ ৰাওনা হৈছিল যদিও পশ্চিম বংগ আৰক্ষীৰ সহযোগ নোপোৱা বাবে দলটো বিমুখ হৈ ঘূৰিব লগা হৈছিল।
বিতৰ্কিত গৰ্গ চেটাৰ্জীৰ বিৰুদ্ধে অসমত কেইবাখনো এজাহাৰো দাখিল কৰা হৈছে।
১৭ জুনৰ দিনা নিশা প্ৰায় ৯:১৪ ত টুইটাৰযোগে গর্গই চ্যুকাফাক চীনা আক্ৰমণকাৰী আখ্যা দিয়াৰ লগতে তাচ্ছিল্যসূচক মন্তব্য কৰে।
‘ভাৰতত এখন ৰাজ্য আছে য’ত অসম বিজেপিয়ে ‘ৰাজ্য দিৱস’ৰ দিনটোত চীনা আক্ৰমণকাৰীক শ্ৰদ্ধা জনায়। যিজনে ভাৰতক চীনা সৈন্য লগত লৈ অতি নৃশংসভাৱে আক্ৰমণ কৰিছিল। এইজন আক্ৰমণকাৰীক নায়ক সজাই ভাৰত বিৰোধী সশস্ত্ৰ সংগঠন আলফাই।‘ অসম সম্পৰ্কে সম্যক জ্ঞান নথকা তথাকথিত বুদ্ধিজীৱীগৰাকীয়ে প্ৰথম টুইটত এই দৰে লিখে।
অৱশ্যে, কিছু সময় পাছত তেওঁ এই পোষ্টটো ডিলিট কৰি তাতে ক্ষান্ত নাথাকি পুনৰ মুখ্য মন্ত্ৰী সৰ্বানন্দ সোণোৱালক উদ্দেশ্যি এটা টুইট লিখে।
অসমক শত্ৰুজ্ঞান কৰা বিতৰ্কিত বুদ্ধিজীৱীগৰাকীয়ে দ্বিতীয় টুইটত লিখি কয়, ‘কি কাৰণত সৰ্বানন্দ সোণোৱালে নিয়মীয়াকৈ চীনা আক্ৰমণকাৰী আৰু তেওঁৰ সৈন্যবাহিনীৰ জন্মদিৱস উদযাপন কৰে? ঠিক সেইদৰে কিয় নিষিদ্ধ ঘোষিত সংগঠন আলফাই চীনা আক্ৰমণকাৰীসকলৰ দিৱস উদযাপন কৰে? কিয় বিজেপি চৰকাৰে ভাৰত চৰকাৰৰ ধন চীনা আক্ৰমণকাৰীৰ মূৰ্তি নিৰ্মাণ কৰাৰ নামত খৰচ কৰে?’