প্ৰথমবাৰৰ বাবে মহাকাশবিজ্ঞানী সকলে এটা তৰাৰ বাসপযোগী মণ্ডলৰ অন্তৰ্গত কক্ষপথত প্ৰদক্ষিণ কৰা এটা গ্ৰহৰ বায়ুমণ্ডলত পানীৰ উপস্থিতি আৱিষ্কাৰ কৰিছে।
Nature Astronomy নামৰ এখন বৈজ্ঞানিক পত্ৰিকাত এই তথ্য প্ৰকাশ পাইছে।
পত্ৰিকাখনত প্ৰকাশ পোৱা তথ্য মতে K2-18b নামৰ উক্ত গ্ৰহটো ‘বহিৰ্জাগতিক প্ৰাণীৰ সন্ধানত এটা বিশ্বাসযোগ্য প্ৰাৰ্থী’ হ’ব পাৰে।
K2-18b গ্ৰহটোৰ বায়ুমণ্ডলত জীৱকুলে উৎপন্ন কৰিব পৰা গেছ আছে নে নাই তাক অহা ১০ বছৰৰ ভিতৰত নতুন মহাকাশ দূৰবীক্ষণ যন্ত্ৰৰ সহায়ত জানিব পৰা যাব পাৰে, পত্ৰিকাখনত প্ৰকাশ।
পত্ৰকিখনৰ মতে, মুখ্য বিজ্ঞানী, য়ুনিভাৰ্ছিটি কলেজ লণ্ডন (University College London, UCL)ৰ প্ৰফেছাৰ জিয়ভানা টিনেটিয়ে (Prof Giovanna Tinetti) উক্ত আৱিষ্কাৰক ‘মাইণ্ড ব্ল’ৱিং’ বুলি অভিহিত কৰিছে।
‘এইয়া প্ৰথমবাৰৰ বাবে আমি এটা তৰাৰ চাৰিওকাষৰ বাসপযোগী মণ্ডলত থকা এটা গ্ৰহত পানীৰ সন্ধান পাইছো য’ত তাপমাত্ৰা জীৱৰ উপস্থিতিৰ বাবে অনুকূল’ বিবিচি নিউজৰ এটা বাতৰিত তেওঁক এইবুলি উদ্ধৃত কৰা হয়।
বাসপযোগী মণ্ডল (habitable zone) হৈছে এটা তৰাৰ চাৰিওকাষে থকা অঞ্চল য’ত তাপমাত্ৰা এটা গ্ৰহৰ পৃষ্ঠত পানী জলীয় অৱস্থাত থকাৰ বাবে পৰ্য্যাপ্তভাৱে অনুকূল হয়।
K2-18b গ্ৰহটো পৃথিৱীৰ পৰা ১১১ আলোক বৰ্ষ অৰ্থাৎ প্ৰায় ৬৫০ নিযুত নিযুত মাইল দূৰত্বত অৱস্থিত।
এইয়া অনুসন্ধানৰ উদ্দেশ্যে কিবা প্ৰেৰণ কৰিবৰ বাবে বহুত বেছি দূৰ ব্যৱধান।
সেয়ে একমাত্ৰ বিকল্প হৈছে ২০২০ দশকত মুকলি কৰিবলগীয়া পৰৱৰ্তী প্ৰজন্মৰ মহাকাশ দূৰবীক্ষণ যন্ত্ৰৰ বাবে অপেক্ষা কৰা আৰু গ্ৰহটোৰ বায়ুমণ্ডলত থকা গেছৰ সন্ধান কৰা যিটো কেৱল জীৱকুলহে উৎপন্ন কৰিব পাৰে, বিবিচিৰ বাতৰিটোত UCLৰ ড০ ইনগো ৱাল্ডমান (Ingo Waldmann)ক উদ্ধৃত কৰি কোৱা কয়।
