নগাঁও জিলাৰ চামগুৰি সমষ্টিৰ অন্তৰ্গত লাওখোৱাৰ নৈ পৰীয়া অঞ্চলত বুধবাৰে বিয়লি উপস্থিত হয় জলসম্পদ মন্ত্ৰী কেশৱ মহন্ত। চামগুৰিৰ লাওখোৱাৰ বৃহত্তৰ বানপীড়িত অঞ্চলত নিশা পৰ্যন্ত জলসম্পদ মন্ত্ৰী কেশৱ মহন্ত উপস্থিত হৈ বানক্ষতিগ্ৰস্ত অঞ্চলসমূহ পৰিদৰ্শন কৰাৰ লগতে বান পৰিস্থিতিও বুজ লয় মন্ত্ৰী গৰাকীয়ে।
বিগত সাত দিন ধৰি চামগুৰিৰ লাওখোৱাৰ বিভিন্ন অঞ্চলত বান পৰিস্থিতি অব্যাহত আছিল যদিও বান পৰিস্থিতি জটিল হৈ থকাৰ সময়ত লাওখোৱাৰ বানপীড়িতৰ কাষত উপস্থিত হ’বলৈ সময় নোপোৱা মন্ত্ৰী কেশৱ মহন্ত অৱশেষত লাওখোৱা অঞ্চলত বানপানী কমাৰ পাছতহে উপস্থিত হোৱাক কেন্দ্ৰ কৰি সম্প্ৰতি বন্যাৰ্তৰ মাজত তুমুল চৰ্চা চলিছে।
লাওখোৱাত উপস্থিত হৈ শান্তি বজাৰ আৰু ১নং ভুৰবন্ধাৰ বান ক্ষতিগ্ৰস্ত ৰাইজৰ দুখ-দুৰ্দশাৰ খৱৰ লৈ লাওখোৱাৰ মূল মথাউৰি সুৰক্ষিত কৰাৰ লগতে বৃহত্তৰ অঞ্চলটোৰ বান গৰাখহনীয়া সমস্যা ৰোধ কৰিবৰ বাবে সৰ্বমুঠ ৩০কোটি টকাৰ ব্যয় সাপেক্ষে তিনিখনকৈ নতুন আঁচনি ধাৰ্য কৰাৰ কথা ব্যক্ত কৰে।
বৃহত্তৰ নৈ পৰীয়া অঞ্চলটোৰ বন্যাৰ্ত পৰিয়াল সমূহৰ সুৰক্ষাৰ স্বাৰ্থত এই আঁচনি কেইখনৰ অধীনত নতুনকৈ পাৰ্কুপাইনৰ, গাইড বান্ধ, মথাউৰি আদি নিৰ্মাণ কৰি অঞ্চলটোৰ বান পৰিস্থিতিৰ সৈতে মোকাবিলা কৰিবলৈ সংশ্লিষ্ট বিভাগটোৱে প্ৰচেষ্টা হাতত ল’ব বুলি মন্তব্য কৰে মহন্তই।
ইয়াৰোপৰি বুঢ়াচাপৰি অভয়াৰণ্যসহ শোণিতপুৰ জিলাৰ দক্ষিণ পাৰত অৱস্থিত তথা সদায় প্ৰশাসন আৰু চৰকাৰৰ পৰা অৱহেলিত হৈ অহাৰ অভিযোগ উত্থাপন হোৱা ব্ৰহ্মপুত্ৰৰ বান গৰাখহনীয়াৰ ফলত নিঃচিহ্নপ্ৰায় অৱস্থা হোৱা বুঢ়াচাপৰিৰ ধনীয়া গাঁৱৰো বান গৰাখহনীয়া সমস্যা শীঘ্ৰে সমাধান কৰাৰ প্ৰতিশ্ৰুতি প্ৰদান কৰে মন্ত্ৰী গৰাকীয়ে।
বুঢ়াচাপৰি বন্যপ্ৰাণী অভয়াৰণ্যকে ধৰি নিকটৱৰ্ত্তী শোণিতপুৰ জিলাৰ দক্ষিণ পাৰৰ বান গৰাখহনীয়াৰ সমস্যা সমাধানৰ ক্ষেত্ৰত পূৰ্বৰে পৰা বন বিভাগে বিধিপথালি দি আহিছিল বুলি মন্ত্ৰী গৰাকীয়ে অভিযোগ উত্থাপন কৰাৰ লগতে আনাগত খৰালিৰ দিনত সংশ্লিষ্ট সকলো কেইটা বিভাগ একত্ৰিত হৈ পৰ্যালোচনা ক্ৰমে শীঘ্ৰে বৃহত্তৰ অঞ্চলটো সুৰক্ষিত কৰাৰ ব্যৱস্থা হাতত লোৱা হ’ব বুলি আশ্বাস প্ৰদান কৰে মন্ত্ৰী কেশৱ মহন্তই।
আনহাতে, বৃহত্তৰ লাওখোৱা অঞ্চলত বানপানী থকা পৰ্য্যন্ত চৰকাৰী নিৰ্ধাৰিত নিৰিখমতেই বানসাহাৰ্য্যৰ লগতে শিশু আৰু পশু খাদ্য বন্যাৰ্ত পৰিয়াল সমূহক প্ৰদান কৰিব বুলি সংবাদ মাধ্যমৰ আগত মন্তব্য কৰে জলসম্পদ বিভাগৰ মন্ত্ৰী গৰাকীয়ে।
