শিৱসাগৰত ৪ খন বিশুদ্ধ খোৱা পানী আঁচনিৰ শুভ উদ্বোধন : “স্বচ্ছতাই সেৱা ২০১৮”ৰ শুভাৰম্ভ
সমগ্ৰ ৰাজ্যৰ লগতে আজি শিৱসাগৰতো “মিচন ১০০” অধীনত ৪ খন বিশুদ্ধ খোৱা পানী আঁচনিৰ শুভ উদ্বোধন কৰাৰ লগতে “স্বচ্ছতাই সেৱা ২০১৮” আঁচনিৰ শুভাৰম্ভ কৰা হয়। শিৱসাগৰ জনস্বাস্থ্য কাৰিকৰী বিভাগৰ অধীনৰ ৰংঘৰ চাৰি আলি পানী যোগান আঁচনিখন শনিবাৰে স্থানীয় বিধায়ক তথা বিধান সভাৰ প্ৰাক্তন অধ্যক্ষ প্ৰণৱ কুমাৰ গগৈয়ে শুভ উদ্বোধন কৰে।
৫০ লাখ টকা ব্যয় সপেক্ষে নিৰ্মাণ কৰা উক্ত আঁচনিখনে সমগ্ৰ ৰংঘৰ চাৰিআলি, হাতীখোক আদি অঞ্চলত বিশুদ্ধ খোৱা পানী যোগান ধৰিব। জনস্বাস্থ্য কাৰিকৰী বিভাগৰ কণিষ্ঠ অভিযন্তা কল্যান বৰাই আঁতধৰা শুভ উদ্বোধনী অনুষ্ঠানত উপস্থিত থাকে অতিৰিক্ত উপায়ুক্ত আল আজহাৰ আলী, জনস্বাস্থ্য কাৰিকৰী বিভাগৰ শিৱসাগৰ সংমণ্ডলৰ সহকাৰী কাৰ্য্যবাহী আভিযন্তা সঞ্জীৱ বৰদলৈৰ লগতে বহুটো গণ্য-মান্য ব্যক্তি।
ইয়াৰ উপৰিও আমগুৰি সমষ্টিৰ অন্তৰ্গত ৩ খন পানী যোগান আঁচনি “মিচন ১০০” ৰ অধীনত উন্মোচন কৰা হয়। জনস্বস্থ্য কাৰিকৰী বিভাগৰ অধীনৰ আহুগ্ৰান্ত পানীযোগান আঁচনি উন্মোচন কৰে আমগুৰি সমষ্টিৰ বিধায়ক প্ৰদীপ হাজৰিকাই। টিফুক বাগিছা পানীযোগান আঁচনি উন্মোচন কৰে অতিৰিক্ত উপায়ুক্ত অশ্বিনী কুমাৰ দলে আৰু গনক গাওঁ পানীযোগান আঁচনি উন্মোচন কৰে অতিৰিক্ত উপায়ুক্ত বিজিত দাসে।
ইপিনে শনিবাৰে শিৱসাগৰত “স্বচ্ছতাই সেৱা ২০১৮” আঁচনিৰ শুভাৰম্ভ কৰা হয়। বীৰ লাচিত বৰফুকন মহাবিদ্যালয়ত অনুষ্ঠিত হোৱা “স্বচ্ছতাই সেৱা ২০১৮” আঁচনিৰ শুভাৰম্ভ কাৰ্য্যসুচী অনুষ্ঠানটো সঞ্চালন কৰে মহাবিদ্যালয়ৰ অধ্যক্ষা দিপালী নেঁওগে। অনুষ্ঠানটোৰ তাপৰ্য্য ব্যাখা কৰে অতিৰিক্ত উপায়ুক্ত প্ৰিয়াংশু শৰ্মাই। ১৫ ছেপ্তেম্বৰৰ পৰা ২ অক্টোবৰলৈকে অনুষ্ঠিত হব লগা এই অঁচনিৰ বিষয়বস্তুৰ ওপৰত আলোকপাত কৰে স্বচ্ছ ভাৰত মিচনৰ নডেল বিষয়া ৰাজীৱ বৰপূজাৰী, ৱাচ টেকনিকেল কনচালটেণ্ট শ্বেতাংগনা ভূঞা আৰু অভিযন্তা বিভূতি চেতিয়াই।
“স্বচ্ছতাই সেৱা ২০১৮” কাৰ্য্যসূচীৰ অধীনত শিৱসাগৰ জিলাৰ বিভিন্ন বিদ্যালয়ৰ ছাত্ৰ ছাত্ৰীৰ মাজত ৰচনা, চিত্ৰাংকন প্ৰতিযোগিতাৰ লগতে চফাই অভিযান আৰু গছপুলি ৰোপণৰ দৰে বিভিন্ন কাৰ্য্যসূচী ৰূপায়ন কৰা হ’ব।