সমগ্ৰ ৰাজ্যতে তীব্ৰ চাঞ্চল্যৰ সৃষ্টি কৰা শিৱসাগৰৰ শিল্পী দম্পতী ৰজনী খাৰঘৰীয়া আৰু ৰুবী খাৰঘৰীয়াৰ আত্মহননৰ ঘটনাৰ অভিযুক্ত বোৱাৰী গীতাশ্ৰী খাৰঘৰীয়াক শনিবাৰে শিৱসাগৰ আদালতে জে’ল হাজোতলৈ প্ৰেৰণ কৰে।
উল্লেখযোগ্য যে ৭৫ দিন ধৰি পলাতক অৱস্থাত থকা গীতাশ্ৰীয়ে যোৱা ১৩ ছেপ্টেম্বৰত শিৱসাগৰৰ মুখ্য ন্যায়িক দণ্ডাধীশৰ আদালতত আত্মসমৰ্পণ কৰিছিল।
ইফালে গীতাশ্ৰীয়ে আত্মসমৰ্পণ কৰাৰ পিছতেই তদন্তকাৰী আৰক্ষীয়ে আদালতত জনোৱা আবেদনৰ ওপৰত ভিত্তি কৰি আদালতে অভিযুক্তক দুদিনৰ বাবে আৰক্ষীৰ জিম্মালৈ প্ৰেৰণ কৰিছিল।
আৰু সেই অনুসৰি আৰক্ষীৰ জিম্মাত সময়সীমা উকলি যোৱাত তদন্তকাৰী আৰক্ষীয়ে গীতাশ্ৰীক আদালতত হাজিৰ কৰোৱাত আদালতে জে’ল হাজোতলৈ প্ৰেৰণ কৰে।
মন কৰিবলগীয়া যে গীতাশ্ৰীয়ে আৰক্ষীৰ জিম্মাত থকাৰ সময়ছোৱাত ৰজনী খাৰঘৰীয়াই আত্মহত্যাৰ কৰাৰ পূৰ্বে পত্ৰত উল্লেখ কৰি যোৱা প্ৰতিটো অভিযোগকেই নস্যাৎ কৰিছে বুলি আৰক্ষী সূত্ৰৰ পৰা জানিব পৰা গৈছে।
উল্লেখযোগ্য যে পুত্ৰ-বোৱাৰী দেৱাশিস খাৰঘৰীয়া আৰু গীতাশ্ৰী দুৱৰা খাৰঘৰীয়াৰ অৱহেলাৰ বাবেই শিৱসাগৰৰ সাংস্কৃতিক কৰ্মী তথা এসময়ৰ প্ৰতিষ্ঠিত ব্যৱসায়ী ৰজনী খাৰঘৰীয়া আৰু তেওঁৰ পত্নী ৰুবী খাৰঘৰীয়াই মৃত্যুক আঁকোৱালি ল’ব লগীয়া হৈছিল।
দেৱাশিসৰ ৰুগ্ন মাতৃয়ে এটা ইনছুলিনৰ বাবে টকা নোহোৱা অৱস্থাত যোৱা ৩০ জুনত ভাৰাঘৰতে অস্বাভাৱিক মৃত্যুক সাৱটি লোৱাৰ লগতে দেউতাকেও একেদিনাই ভাৰাঘৰৰ কোঠাতে আত্মহত্যা কৰিছিল।
