সন্ত্ৰাসবাদক মানৱতা, স্বাধীনতা আৰু সভ্যতাৰ শত্ৰু আখ্যা দিলে প্ৰধানমন্ত্ৰী মোদীয়ে।প্ৰধানমন্ত্ৰী নৰেন্দ্ৰ মোদীয়ে শুকুৰবাৰে দৃঢ়তাৰে কয় যে কেইবা দশকধৰি বিভিন্ন ধৰণৰ সন্ত্ৰাসবাদে ভাৰতক আঘাত কৰাৰ চেষ্টা কৰি আহিছে। সেই অপশক্তিবোৰক আমি প্ৰতিহত কৰিব লাগিব।
দিল্লীত অনুষ্ঠিত সন্ত্ৰাসবাদ বিৰোধী সনিমিলনত ভাষণ দি মোদীয়ে এনেদৰে কয়। সন্মিলনৰ উদ্বোধনী ভাষণ প্ৰদান কৰাৰ সময়ত মোদীয়ে কয় যে দেশখনে সাহসেৰে সন্ত্ৰাসবাদৰ বিৰুদ্ধে যুঁজ দি আছে। মোদীয়ে কয় “এই সন্মিলনখন ভাৰতত অনুষ্ঠিত হোৱাটো গুৰুত্বপূৰ্ণ কথা।
বিশ্বই সন্ত্ৰাসবাদক গুৰুত্বসহকাৰে লোৱাৰ বহু আগতে আমাৰ দেশখনে সন্ত্ৰাসৰ ভয়াৱহতাৰ সন্মুখীন হৈছে। কেইবা দশকধৰি, বিভিন্ন ৰূপত সন্ত্ৰাসবাদীয়ে ভাৰতক আঘাত কৰিবলৈ চেষ্টা কৰি আহিছে ,কিন্তু আমি সাহসেৰে সন্ত্ৰাসবাদৰ বিৰুদ্ধে যুঁজ দিছো,” । প্ৰধানমন্ত্ৰীয়ে সন্ত্ৰাসবাদক উৎখাত কৰিবলৈ আহ্বান জনাই কয় যে ” এইক্ষেত্ৰত এক বৃহত্তৰ, সক্ৰিয়, প্ৰণালীবদ্ধ সঁহাৰিৰ প্ৰয়োজন। যদি আমি আমাৰ নাগৰিকসকল সুৰক্ষিত হোৱাটো বিচাৰো, আমি আমাৰ ঘৰলৈ সন্ত্ৰাসবাদী অহালৈ অপেক্ষা কৰিব নোৱাৰো। আমি সন্ত্ৰাসবাদীসকলক অনুসৰণ কৰিব লাগিব, তেওঁলোকৰ সমৰ্থন কৰা নেটৱৰ্ক ভাঙিব লাগিব আৰু তেওঁলোকৰ বিত্তীয় যোগানত আঘাত কৰিব লাগিব।”
প্ৰধানমন্ত্ৰী মোদীয়ে লগতে কয়, “এয়া সকলোৱে জানে যে সন্ত্ৰাসবাদী সংগঠনবোৰে কেইবাটাও উৎসৰ জৰিয়তে ধন লাভ কৰে – এটা হৈছে কোনো দেশৰ সমৰ্থন। কিছুমান দেশে তেওঁলোকৰ বৈদেশিক নীতিৰ অংশ হিচাপে সন্ত্ৰাসবাদক সমৰ্থন কৰে। তেওঁলোকে সন্ত্ৰাসবাদীক ৰাজনৈতিক, আদৰ্শগত আৰু বিত্তীয় সমৰ্থন আগবঢ়ায়…” ।প্ৰধানমন্ত্ৰীয়ে লগতে কয় যে ”যিসকল লোকে সন্ত্ৰাসবাদক সমৰ্থন কৰে তেওঁলোকৰ কোনো দেশত স্থান থাকিব নালাগে” । প্ৰধানমন্ত্ৰীয়েও “সন্ত্ৰাসবাদীৰ বিত্তীয় যোগানৰ মূল উৎস”ত আঘাত কৰাৰো আহ্বান জনায়। তেওঁ কয় যে সন্ত্ৰাসবাদক মানৱতা, স্বাধীনতা আৰু সভ্যতাৰ ওপৰত আক্ৰমণ বুলি গণ্য কৰিব লাগে।
আজিৰ পৃথিৱীত সন্ত্ৰাসবাদৰ বিপদৰ বিষয়ে সোঁৱৰাই দিয়াৰ কোনো প্ৰয়োজন নাই বুলি উল্লেখ কৰি মোদীয়ে কয় যে সকলো সন্ত্ৰাসবাদী আক্ৰমণেই সমানে গৰিহণাৰযোগ্য। কেতিয়াবা, সন্ত্ৰাসবাদীৰ বিৰুদ্ধে ব্যৱস্থা গ্ৰহণ কৰাটো বন্ধ কৰিবলৈ সন্ত্ৰাসবাদৰ সমৰ্থনত পৰোক্ষ যুক্তি দিয়া হয়। এয়া মানৱতা, স্বাধীনতা আৰু সভ্যতাৰ ওপৰত আক্ৰমণ। তেনে কৰিব নাপায় বুলিও মোদীয়ে স্পষ্ট কৰি দিয়ে। উল্লেখ্য প্ৰধানমন্ত্ৰীয়ে আজি কেন্দ্ৰীয় গৃহমন্ত্ৰী অমিত শ্বাহৰ উপস্থিতিত সন্মিলনখন উদ্বোধন কৰে । বৈঠকখন নতুন দিল্লীৰ হোটেল তাজ পেলেচত অনুষ্ঠিত হৈছে। দুদিনীয়া বৈঠকত ৭০ খনতকৈও অধিক দেশৰ ৪৫০ জন প্ৰতিনিধিয়ে অংশগ্ৰহণ কৰিছে। এই সন্মিলনৰ মূল বিষয়েই হৈছে সন্ত্ৰাসবাদীলৈ ধনৰ যোগান ব্যাহত কৰা।
