ৰাজ্যৰ ৪ টা বিধান সভা সমষ্টিত সমাগত উপ নিৰ্বাচন। ৰঙাপাৰা, সোণাৰি, ৰাতাবাৰী আৰু জনিয়া সমষ্টিত হ’ব এই উপ নিৰ্বাচন।
উপ নিৰ্বাচনক লৈ বিশেষ তৎপৰ হৈ পৰিছে শাসনাধীষ্ঠ বিজেপি, বিৰোধী কংগ্ৰেছ আৰু এআইয়ুডিএফ দল।
ইতিমধ্যে, চাৰিওটা সমষ্টিৰে পৰা ৩ জনকৈ প্ৰাৰ্থীৰ নাম থকা পেনেল প্ৰস্তুত কৰি দলৰ হাইকামাণ্ডলৈ প্ৰেৰণ কৰিছে ৰাজ্যিক বিজেপিয়ে।
বুধবাৰে তিনিটা সমষ্টিৰ প্ৰাৰ্থীৰ পেনেল প্ৰস্তুত কৰিছিল যদিও জনিয়া সমষ্টিক লৈ অনিশ্চয়তাত আছিল বিজেপি, কিয়নো সেই সমষ্টিৰ পৰা ২২ গৰাকী বিজেপি নেতাই বিচাৰিল টিকট।
বুধবাৰে সন্ধিয়া বৈঠকত সিদ্ধান্ত ল’ব নোৱাৰাত উক্ত সমষ্টিটোৰ প্ৰাৰ্থীৰ পেনেল প্ৰস্তুতৰ কৰ্তৃত্ব দিছিল ৰাজ্যিক সভাপতি ৰঞ্জিত দাসক।
শেহতীয়া খবৰ অনুসৰি দাসে টিকট দাবীদাৰসকলৰ মাজৰ পৰা তিনিজন প্ৰাৰ্থী ক্ৰমে মুজিবুৰ ৰহমান খান, আব্দুল চামাদ আৰু ইছমাইল হুছেইনৰ নাম হাই কামাণ্ডলৈ প্ৰেৰণ কৰিছে।
নৰ্থ ইষ্ট নাওৰ গ্ৰাউণ্ড জিৰ’ ৰিপৰ্টত পোহৰলৈ আহিছে যে বিজেপিয়ে পঠিওৱা তিনিজন প্ৰাৰ্থীৰে তৃণমূল পৰ্য্যায়ত জন সমৰ্থন তাকৰ আৰু সংখ্যালঘু প্ৰধান সমষ্টিটোত জয়ী হোৱাৰ সম্ভাৱনা অত্যন্ত ক্ষীণ।
ইপিনে, জনিয়া সমষ্টিত বিজয়ৰ অনিশ্চিয়তাত থকা বিজেপিয়ে অন্য তিনিটা সমষ্টি ক্ৰমে ৰঙাপাৰা, সোণাৰি আৰু ৰাতাবাৰী সমষ্টিত জয়ী হ’বলৈ বিশেষ তৎপৰতা অৱলম্বন কৰিছে।
অৱশ্যে তিনিওটা সমষ্টিত ২০১৬’ৰ বিধান সভা নিৰ্বাচনত বিজেপি বিধায়ক জয়ী হৈছিল।
আনহাতে, এক বিশেষ সুত্ৰৰ পৰা লাভ কৰা খবৰ অনুসৰি ৰাতাবাৰী আৰু জনিয়া সমষ্টিত বুজা-বুজিৰ মাধ্যমেৰে নিজৰ নিজৰ প্ৰাৰ্থীক জয়ী কৰোৱাৰ বাবে উঠি পৰি লাগিছে কংগ্ৰেছ আৰু এআইয়ুডিএফ।
বৰপেটা সমষ্টিৰ পৰা কংগ্ৰেছৰ প্ৰায় ২০ জনে প্ৰাৰ্থিত্ব আগবঢ়াইছে যদিও তিনিজনৰ নামহে পেনেলত অন্তৰ্ভুক্ত হোৱাৰ সম্ভাৱনা আছে।
তাৰ ভিতৰত তিনিজন প্ৰাক্তন বিধায়ক ক্ৰমে আব্দুৰ ৰহিম খান, আব্দুৰ ৰৌফ আৰু আব্দুছ ছোভানে প্ৰাৰ্থিত্বৰ পেনেলত অন্তৰ্ভুক্ত হ’ব বুলি সুত্ৰটোৰ দাবী।
উক্ত তিনিজনৰ ভিতৰত আব্দুৰ ৰহিম খানে দলীয় টিকট লাভ কৰাৰ সম্ভাৱনা প্ৰকট হৈ পৰিছে।
ইপিনে, জনিয়া সমষ্টিৰ প্ৰাক্তন বিধায়ক ৰফিকুল ইছলামে এআইয়ুডিএফৰ পৰা টিকট লাভ কৰাৰ সম্ভাৱনা আছে। সংখ্যালঘু অধ্যুষিত সমষ্টিটোত ৰফিকুলৰ যথেষ্ট গণভিত্তি আছে।
ৰফিকুল ইছলাম যোৱা বিধানসভা নিৰ্বাচনত বৰ্তমানৰ কংগ্ৰেছী সাংসদ আব্দুল খালেকৰ হাতত পৰাজিত হৈছিল।
তদুপৰি, আব্দুল খালেকৰ আসনখন খালী হোৱাৰ পাছত সমষ্টিটোত বহুল জনপ্ৰিয়তা থকা কংগ্ৰেছৰ নেতা নাই। লগতে দেশজুৰি কংগ্ৰেছৰ বিপৰ্যয়ৰ মাজতে এই সংখ্যালঘু সমষ্টিটো বিজেপিৰ হাতলৈ এৰি দিব বিচৰা নাই কংগ্ৰেছে।
সেয়েহে এআইয়ুডিএফৰ সৈতে গোপন বুজা বুজিৰ মাধ্যমেৰে এআইয়ুডিএফক আসনখন দিয়াৰ কুচকাৱাজ চলাইছে।
এনে পৰিপ্ৰেক্ষিতত এআইয়ুডিএফৰ সৈতে কংগ্ৰেছে পৰীক্ষামূলক মিত্ৰতা কৰিব বুলি সাংসদ আব্দুল খালেকে কৰা ঘোষণাই বিশেষ মাত্ৰা প্ৰদান কৰিছে।
আনহাতে, ৰাতাবাৰী সমষ্টিতো কংগ্ৰেছৰ দখললৈ আনিবৰ বাবে কংগ্ৰেছে যুঁজ দিছে। এই সমষ্টিতোত কংগ্ৰেছী প্ৰাৰ্থীক জয়ী কৰোৱাত এআইয়ুডিএফে সহায়ৰ হাত আগবঢ়াব বুলি বিভিন্ন মহলত চৰ্চিত হৈছে।
ৰাতাবাৰী সমষ্টিত এইবাৰ কংগ্ৰেছে হিন্দু বাঙালী সম্প্ৰদায়ক অগ্ৰাধিকাৰ দিয়াৰ প্ৰচুৰ সম্ভাৱনা আছে। কিয়নো প্ৰাৰ্থিত্ব বিচাৰি আবেদন কৰাসকলৰ প্ৰায় কেইজনেই হিন্দু বাঙালী সম্প্ৰদায়ৰ।
ৰাতাবাৰী সমষ্টিত প্ৰাৰ্থিত্ব বিচাৰি কেশৱ চান্দ, প্ৰসাদ ৰজত, দৈবকী নন্দন ৰবিদাস, শ্ৰীমন্ত দাস, সুদুগ্ধ দাস, সুনিতি ৰয়, বীৰবল ৰবিদাসে প্ৰাৰ্থিত্ব বিচাৰিছে।
ইপিনে, সমষ্টিটোত এআইয়ুডিএফৰ তিনিজনে প্ৰাৰ্থিত্ব বিচাৰিছে বুলি জানিব পৰা গৈছে যদিও নামকেইটা বৰ্তমানলৈকে প্ৰকাশ কৰা নাই এআইয়ুডিএফৰ সাধাৰণ সম্পাদক আমিনুল ইছলামে।