যিটো সময়ত ভাৰতৰ অৰ্থনীতিৰ বিকাশৰ ধাৰা বিশ্বৰ অগ্ৰনী দেশ সমূহৰ সমপৰ্যায়ৰ বুলি চৰকাৰে দাবী কৰি আহিছে সেই সময়তে দেশৰ এগৰাকী আগশাৰীৰ উদ্যোগপতি মুকেশ আম্বানীয়ে চৰকাৰৰ দাবীক অসাৰ প্ৰতিপন্ন কৰি কৈছে যে ভাৰতে চীন-আমেৰিকাৰ সৈতে ২০৪৭ চনতহে ফেৰ মাৰিবলৈ সক্ষম হ’ব।
ভাৰতৰ অৰ্থনৈতিক উদাৰীকৰণৰ ৩০ বৰ্ষপূৰ্তিৰ দিনাই বিশিষ্ট উদ্যোগপতি গৰাকীয়ে কয় যে ভাৰতৰ অৰ্থনীতিৰ পিৰামিডটোৰ একেবাৰে তলৰ পৰাই ভাৰতীয় আৰ্হিত সংস্কাৰ সাধন হ’ব লাগিব। ৰিলায়েন্স ইণ্ডাষ্ট্ৰীজৰ স্বত্বাধিকাৰ গৰাকীয়ে ভাৰতৰ অৰ্থনৈতিক উদাৰীকৰণৰ ৩০ বছৰ উপলক্ষে লিখা এটা স্তম্ভত এই বুলি কৈছে যে সৱল অৰ্থনৈতিক সংস্কাৰৰ পন্থা গ্ৰহণ কৰাৰ বাবেহে ভাৰতৰ মুঠ ঘৰুৱা উৎপাদন ১৯৯১ চনত পূৰ্বতকৈ ১০ গুণ বৃদ্ধি পাই ২৬৬ বিলিয়ন মাৰ্কিন ডলাৰ হৈছিল।
১৯৯১ চনত ভাৰতৰ নাটনিৰ অৰ্থনীতিয়ে ২০২১ চনত পৰ্যাপ্ত অৰ্থনীতিৰ ৰূপ গ্ৰহণ কৰিছে যদিও এতিয়াও ভালেখিনি কৰণীয় আছে বুলি তেওঁ উল্লেখ কৰিছে।ভাৰতীয় অৰ্থনীতিয়ে ২০৫১ চনৰ ভিতৰত সমৃদ্ধিৰ অৰ্থনীতি হ’ব লাগিব বুলিও তেওঁ কয়।
অনুজ্ঞাপত্ৰৰ ক্ষেত্ৰত থকা জঞ্জাল, পূজিৰ বিনিয়োগ আদিৰ ক্ষেত্ৰত থকা বাবোৰ আঁতৰি যোৱাৰ বাবে অৰ্থনীতিয়ে নৰূপ লাভ কৰা বুলিও তেওঁ উল্লেখ কৰিছে।
বিগত চাৰিটা দশক ধৰি অৰ্থনীতিত আধিপত্য বিস্তাৰ কৰি থকা ৰাজহুৱা খণ্ডৰ সলনি ব্যক্তিগত খণ্ডক গুৰুত্ব দিয়াত অৰ্থনীতিয়ে বিশেষ গতি লাভ কৰা বুলিও আম্বানীয়ে তেওঁৰ লেখাটোত উল্লেখ কৰিছে।এনেবোৰ সংস্কাৰে দেশৰ অৰ্থনীতিক বিশ্বৰ পঞ্চম অৰ্থনীতিত পৰিণত কৰা বুলিও তেওঁ কয়।
একেদৰে অৰ্থনৈতিক সংস্কাৰৰ বাবেই দেশৰ জনসংখ্যা পূৰ্বৰ ৮৮ কোটিৰ পৰা বৃদ্ধি পাই ১৩৮ কোটি হোৱা সত্বেও হ্ৰাস পোৱা বুলি আম্বানীয়ে উল্লেখ কৰিছে।
আম্বানীয়ে পৰম প্ৰত্যাশাৰে কয় যে ২০৪৭ চনত ভাৰতীয় যেতিয়া স্বাধীনতাৰ শতবাৰ্ষিকী পালন কৰিব তেতিয়া হয়তো ভাৰতে চীন-আমেৰিকাৰ সৈতে ফেৰ মাৰি বিশ্বৰ তৃতীয় অৰ্থনীতি হ’ব পাৰিব।
ব্যক্তিগত সম্পদ বৃদ্ধিয়েই প্ৰকৃত বৃদ্ধি নহয় বুলি মন্তব্য কৰি আম্বানীয়ে কয় যে সকলোৰে বাবে শিক্ষা. সকলোৰে বাবে স্বাস্থ্য,সকলোৰে বাবে কৰ্মসংস্থাপন, পৰিবেশৰ সুৰক্ষা,ক্ৰীড়া-সংস্কৃতিৰ উন্নয়ন আদিয়েহে দেশৰ প্ৰকৃত উন্নয়নৰ ছবি খন স্পষ্ট কৰিব বুলি আম্বানীয়ে তাৎপৰ্যপূৰ্ণ মন্তব্য কৰিছে।ঔদ্যোগিক খণ্ডৰ উন্নয়নৰ জৰিয়তে দেশৰ ঘৰুৱা বজাৰ বৃদ্ধিৰ বিষয়তো তেওঁ গুৰুত্ব দিয়ে।
