২০২২ চনত কাটাৰত অনুষ্ঠিত হ’বলগা ফুটবল বিশ্বকাপৰ বাবে প্ৰব্ৰজিত নিৰ্মাণ শ্ৰমিকসকলৰ অধিকাৰক লৈ ফুটবল বিশ্বত ব্যাপক সজাগতা লাভ কৰা দেখা গৈছে।
বৃহস্পতিবাৰে জাৰ্মানী ফুটবল দলৰ সদস্যসকলে শ্ৰমিকসকলৰ অধিকাৰৰ দাবীক সমৰ্থন কৰি ভাষ্য প্ৰদান কৰিছে।
দলটোৰ প্ৰশিক্ষক জাচিম লউৱে কয় যে তেওঁৰ দলে মানৱ অধিকাৰৰ বাবে মাত মাতে আৰু এয়া অত্যন্ত প্ৰয়োজনীয়।
বৃহস্পতিবাৰে জাৰ্মানীৰ ডুইছবাৰ্গত বিশ্বকাপৰ গ্ৰুপ জেৰ এখন কুৱালিফায়িং মেচত আইচলেণ্ডৰ বিৰুদ্ধে অৱতীৰ্ণ হৈ জাৰ্মানীৰ খেলুৱৈসকলে এটা বিশেষ চাৰ্ট পৰিধান কৰে।
চাৰ্টটোত লিখা আছিল- ‘হিউমেন ৰাইটছ’।
আনহাতে, বুধবাৰে নৰৱে’ ফুটবল দলটোৱেও একেধৰণৰ এটা বাৰ্তা দিছে।
জিব্ৰাল্টৰৰ বিৰুদ্ধে খেলা এখন ফুটবল মেচত নৰৱে’ৰ দলটোৱে এটা টি-চাৰ্ট পৰিধান কৰে, য’ত লিখা আছিল- ‘হিউমেন ৰাইটছ, অন এণ্ড অফ দা পিটচ’ (মানৱ অধিকাৰ, খেলপথাৰৰ বাহিৰতো ভিতৰতো।
ফুটবল বিশ্বত এই সজাগতাৰ মূলতে হ’ল ব্ৰিটিছ বাতৰি কাকত দ্যা গাৰ্ডিয়ানত প্ৰকাশিত এটা বাতৰি।
বাতৰিটোত কাকতখনে প্ৰকাশ কৰিছিল যে ১০ বছৰ পূৰ্বে যেতিয়া কাটাৰে ২০২২ বৰ্ষৰ বিশ্বকাপ অনুষ্ঠিত কৰিবলৈ অনুজ্ঞা লাভ কৰিছিল, তাৰ পাছতে দেশখনে ফুটবল ষ্টেডিয়ামসমূহ নিৰ্মাণ কৰিবলৈ ধৰে।
বাতৰি কাকতখনে কোৱামতে, যোৱা ১০ বছৰত ফুটবল ষ্টেডিয়ামসমূহত কৰ্মৰত কমেও ৬,৫০০ জন প্ৰব্ৰজিত শ্ৰমিকে মৃত্যুবৰণ কৰিছে।
আনহাতে, বৃহস্পতিবাৰে কাটাৰৰ বিশ্বকাপ আয়োজক সমিতিৰ এজন মুখপাত্ৰই স্পষ্টিকৰণ দিয়ে যে তেওঁলোকে শ্ৰমিকসকলৰ স্বাস্থ্য আৰু সুৰক্ষাৰ বাবে সজাগ।
মুখপাত্ৰজনে জনোৱামতে ২০১৪ চনৰ পৰা নিৰ্মাণকাৰ্য আৰম্ভ হোৱাৰ পৰা এতিয়ালৈকে ৩জন শ্ৰমিকে কৰ্মৰত অৱস্থাত মৃত্যুবৰণ কৰিছে, আনহাতে ৩৫জন শ্ৰমিকৰ কৰ্মবিৰত অৱস্থাত মৃত্যু হৈছে।
ফুটবল বিশ্বক পৰিচালনা কৰা ফিফাই কয় যে শ্ৰমিকৰ অধিকাৰৰ দাবীত মাত মতা নৰৱেৰ খেলুৱৈসকলৰ বিৰুদ্ধে কোনোধৰণৰ ব্যৱ্স্থা লোৱা নহ’ব।
”ফিফাই বাকস্বাধিনতা আৰু ফুটবলৰ শক্তিক এটা শুভশক্তি হিচাপে বিশ্বাস কৰে।”- ফিফাই কয়।
