দেশত বিবাহক কেন্দ্ৰ কৰি সংঘটিত বিচিত্ৰ কাণ্ড ক্ৰমশঃ বৃদ্ধি পাবলৈ ধৰিছে। বিবাহৰ অনুষ্ঠানতে দৰা আৰু কইনাৰ ঘৰৰ মাজত হঠাতে সৃষ্টি হোৱা কাজিয়াৰ পৰিপ্ৰেক্ষিত বহু বিবাহ বাতিল হোৱাৰ বাতৰি প্ৰায়ে সংবাদ মাধ্যমত প্ৰকাশ হৈ আহিছে।
তেনে এক সময়তে এইবাৰ কইনাৰ ঘৰে বিবাহৰ অভ্যৰ্থনাত খাহী মাংস নিদিয়াৰ বাবেই দৰা ঘৰে বিবাহ বাতিল কৰাৰ বাতৰি আহিছে।
সংবাদ মাধ্যমত প্ৰকাশিত খবৰ মতে, এই ঘটনাটো সংঘটিত হৈছে দক্ষিণৰ ৰাজ্য তেলেংগানাত। বাতৰিৰ মতে, যোৱা নৱেম্বৰত জগতিয়ালৰ এজন যুৱকৰ সৈতে নিজামাবাদৰ এগৰাকী যুৱতীৰ বিবাহৰ বাগদান সম্পন্ন হৈছিল। কিন্তু পিছত এই বিবাহখন আয়োজন কৰিলেও কইনা ঘৰে দৰা ঘৰক অপমান কৰাৰ অভিযোগ তুলি বিবাহ অনুষ্ঠানত চলি থকা সময়তে দৰা ঘৰে বিবাহখন বাতিল কৰে।
কইনা ঘৰে বিবাহৰ অভ্যৰ্থনা অনুষ্ঠানৰ ভোজত খাহী মাংস নিদিয়াৰ বাবেই দৰা পক্ষই বিবাহখন বাতিল কৰে। দৰাঘৰে অভিযোগ কৰা মতে, কইনা ঘৰে অভ্যাগতক ভোজত খাহী মাংস দিয়াৰ কথা দিছিল যদিও কইনা ঘৰে কথা নাৰাখি দৰা ঘৰক অপমান কৰিলে। আৰু এই অপমানৰ পোতক তুলিবলৈকে দৰাঘৰে ক্ষুব্ধ হৈ তৎক্ষণাতে বিবাহ বাতিল কৰে।
দৰাঘৰে কইনা ঘৰত উপস্থিত হোৱাৰ পাছতে অভ্যাগতক খাহী মাংস পৰিৱেশন নকৰাৰ কথা জানিব পাৰি এক হুলস্থুলীয়া পৰিৱেশৰ সৃষ্টি কৰে। কইনা ঘৰত দৰা পক্ষই সূত্ৰপাত কৰা কাজিয়াৰ পিছতে কইনা ঘৰত আৰক্ষী উপস্থিত হৈ পৰিস্থিতি নিয়ন্ত্ৰণ কৰে।
স্থানীয় আৰক্ষী থানাৰ বিষয়াই প্ৰকাশ কৰাম মতে, দৰাৰ পৰিয়ালক এই সংঘাত সমাধানৰ বাবে বুজাবলৈ চেষ্টা কৰিছিল যদিও তেওঁলোকে ইয়াক ‘অপমান’ বুলি গণ্য কৰি কথাটোক লৈ ইমানেই ক্ষুব্ধ হৈ পৰে যে কইনা ঘৰে ক্ষমা ভিক্ষা কৰাৰ পাছতো বিবাহ সম্পন্ন কৰিবলৈ সন্মত নহ’ল।
তেওঁলোকৰ অভিযোগ যে কইনাৰ পৰিয়ালে ইচ্ছাকৃতভাৱে ভোজত খাহী মাংস পৰিৱেশন নকৰাৰ কথাটো তেওঁলোকৰ পৰা লুকুৱাই ৰাখিছিল। অৱশেষত দৰাৰ পৰিয়ালে ক্ষুব্ধ হৈ বিয়াখন ভংগ কৰি ওভতি যায়।
এই কাণ্ডটো এখন অতি প্ৰশংসিত তেলেগু চিনেমাৰ কাহিনীভাগৰ সৈতে সাদৃশ্য দেখা গৈছে। যোৱা মাৰ্চ মাহত মুক্তি পোৱা ‘বালাগাম’ নামৰ চিনেমাখনত দেখা যায় যে দুয়োটা পৰিয়ালৰ মাজত খাহী মাংসক লৈ হোৱা বিবাদৰ পিছত এখন বিয়া বাতিল কৰা হৈছিল।
