‘নগাঁৱৰ সাংবাদিকতাৰ ইতিহাস বহু দীঘলীয়া। এয়া গৌৰৱ কৰিব লগা ইতিহাস। সাংবাদিকতাৰ ক্ষেত্ৰত নগাঁও পথ প্ৰদৰ্শক বুলি কব পাৰি।’ এই মন্তব্য বৰপেটা জিলাৰ উপায়ুক্ত তথা সু-লিখক থানেশ্বৰ মালাকাৰৰ।
শনিবাৰে নগাঁও শ্বহীদ ভৱনত নগাঁৱৰ পৰা প্ৰকাশিত এখন সাপ্তাহিক কাকতৰ পুনৰ উন্মোচনী অনুষ্ঠানত মুখ্য অতিথি হিচাপে অংশগ্ৰহণ কৰি উপায়ুক্ত গৰাকীয়ে এই মন্তব্য কৰে।
এই অনুষ্ঠানতে উপায়ুক্ত মালাকাৰে নগাঁৱৰ সংবাদ ক্ষেত্ৰখনৰ ইতিহাস বাখ্যা দাঙি ধৰি কয়, ‘নগাঁৱৰ সাহিত্য, সংস্কৃতি সকলোতে চহকী। সেয়ে নগাঁৱক লৈ আমি সকলোৱে গৌৰৱ অনুভৱ কৰোঁ।’ লগতে ভাষণ প্ৰসংগত তেওঁ কয় যে সংবাদ পত্ৰ ৰাইজৰ মুখপত্ৰ হোৱা উচিত। তেনে সংবাদ পত্ৰৰ জৰিয়তেহে মানুহৰ হৃদয় স্পৰ্শ কৰিব পাৰে।
বিশিষ্ট শিক্ষাবিদ যুক্তিনাথ খাউণ্ডৰ সভাপতিত্বত অনুষ্ঠিত অনুষ্ঠানত কলংপাৰ কাকতখন আনুষ্ঠানিকভাৱে উন্মোচন কৰে দৌৰবিদ হিমা দাসৰ পিতৃ ৰঞ্জিত দাসে।
অনুষ্ঠানত গৱেষক, পণ্ডিত ড০ নৰেন কলিতা, অৱসৰপ্ৰাপ্ত বিষয়া জ্যোৰ্তিময় চক্ৰৱৰ্তী আদিয়ে ভাষণ দিয়ে। তাৰোপৰি কাকতখনৰ মুখ্য সম্পাদক ড০ আবু হানিফাই আঁত ধৰা অনুষ্ঠানত আদৰণি ভাষণ প্ৰদান কৰে শিক্ষাবিদ মুকুল শইকীয়াই।
উন্মোচনী অনুষ্ঠানটোতে শিক্ষাবিদ, সাহিত্যিক জ্যোৰ্তিময় জানা, শিল্পী গোপাল প্ৰধান, ডৰিন হাজৰিকা, জ্যেষ্ঠ সাংবাদিক মানস কুমাৰ মহন্ত আদিক সম্বৰ্ধনা জনোৱা হয়।
অনুষ্ঠানৰ আৰম্ভণিতে কাকতখনৰ প্ৰতিষ্ঠাপক সম্পাদক প্ৰয়াত বলেন বৰাৰ প্ৰতিছবিত মাল্য প্ৰদান কৰে তেওঁৰ পত্নী তথা কাকতখনৰ প্ৰকাশিকা জ্যোতি বৰাই।
অনুষ্ঠানৰ লগত সংগতি ৰাখি বৰগীতো পৰিৱেশন কৰা হয়। আনহাতে কাকতখন প্ৰকাশৰ ক্ষেত্ৰত সহযোগিতা আগবঢ়োৱাৰ বাবে সকলোকে কৃতজ্ঞতা প্ৰকাশ কৰে সমাজকৰ্মী ললিত দত্তই।
উলেখ্য যে ১৯৯৯ চনৰ ১৮ আগষ্টৰ পৰা প্ৰতি বুধবাৰে প্ৰকাশ পাই অহা কলংপাৰ কাকতখন বিগত বৰ্ষৰ ৯ অক্টোবৰত সম্পাদক বলেন বৰাৰ আকস্মিক বিয়োগৰ ফলত কাকতখনৰ প্ৰকাশ বন্ধ হৈ আছিল।
ইফালে নগাঁৱৰ সপোন, নগাঁৱৰ দাপোন কলংপাৰ কাকতখন পুনৰ প্ৰকাশৰ বাবে এচাম শুভাংক্ষী নগঞাই চেষ্টা অব্যাহত ৰাখিছিল। আৰু এই চেষ্টাৰ অংশ হিচাপে গঠন হয় কলংপাৰ ন্যাস। এই ন্যাসৰ উদ্যোগতেই শনিবাৰৰ পৰা পুনৰ প্ৰকাশৰ ব্যৱস্থা কৰা হৈছে। আৰু এতিয়াৰে পৰা কাকতখন পূৰ্বৰ দৰে প্ৰতি বুধবাৰে প্ৰকাশ পাব।
