নিৰ্বাচনৰ পূৰ্বে নগদ ধন বিতৰণ – নিৰ্বাচনী ৰাজনীতিৰ এই নতুন ধাৰাক লৈ বিতৰ্কত এইবাৰ মুখ খুলিছে বিজেপিৰ জ্যেষ্ঠ নেতা মুৰলী মনোহৰ যোশীয়ে। তেওঁৰ মতে নির্বাচনৰ পূর্বে যিদৰে ধন বিলোৱা হৈছে, মানুহে নিজৰ ভোট কিনি লোৱা বুলি ভাবিবলৈ আৰম্ভ কৰিছে৷
দলৰ প্ৰাক্তন সভাপতি যোশী দীৰ্ঘদিন ধৰি বাজপেয়ী মন্ত্ৰীসভাৰ সদস্য আছিল। বৰ্তমান ৯১ বছৰীয়া যোশী বিজেপিৰ আন এজন জ্যেষ্ঠ নেতা লাল কৃষ্ণ আদৱানীৰ দৰে ৰাজনীতিত সক্ৰিয় নহয়। যদিও শাৰীৰিকভাৱে আদৱানীতকৈ বহু সুস্থ, উত্তৰ প্ৰদেশৰ এইগৰাকী নেতাই দলীয় ৰাজনীতিৰ পৰা আঁতৰি আহিছে।
বহুদিনৰ মূৰত সাম্প্ৰতিক ৰাজনীতিৰ আটাইতকৈ চৰ্চিত বিষয়টোক লৈ দিল্লীৰ এক অনুষ্ঠানত তেওঁ মুখ খুলিছে। প্ৰাক্তন নিৰ্বাচন আয়ুক্ত জিভিজি কৃষ্ণমূৰ্তিৰ ৯১ সংখ্যক জন্ম জয়ন্তী উপলক্ষে অনুষ্ঠিত এখন সভাত যোশীয়ে দেশৰ নিৰ্বাচনী ৰাজনীতিৰ পৰিৱৰ্তন সন্দৰ্ভত বহু কথা কয়।
বিহাৰত এন ডি এৰ বৃহৎ বিজয়ৰ পাছত ভোট ক্ৰয়ৰ লগতে ভোট চুৰিৰ অভিযোগ উত্থাপন কৰি বিৰোধীয়ে শাসকীয় মিত্ৰজোঁটক আক্ৰমণ কৰিবলৈ আৰম্ভ কৰিছে। নিৰ্বাচনৰ কেইমাহমান পূৰ্বে মুখ্যমন্ত্ৰী নীতিশ কুমাৰে মহিলাৰ বেংক একাউণ্টলৈ ১০ হাজাৰকৈ টকা দিছিল। সেই আঁচনিখনে এই নির্বাচনত শাসকীয় মিত্রজোঁটৰ বাবে যাদুকৰী কাম কৰা বুলি ধাৰণা কৰা হৈছে৷
বিজেপিৰ নিৰ্বাচনী ইস্তাহাৰত নগদ সুবিধা প্ৰদানৰ কথাও কোৱা হৈছে। প্ৰচাৰৰ সময়ত দলটোৰ মুখখন আছিল খোদ প্ৰধানমন্ত্ৰী নৰেন্দ্ৰ মোডী, যিয়ে কেইবছৰমান পূৰ্বেও নগদ ধন বিতৰণৰ বিৰুদ্ধে সৰৱ হৈ পৰিছিল আৰু কেৱল সেয়াই নহয়, কেন্দ্ৰীয় চৰকাৰে এনে সুবিধা প্ৰদান বন্ধ কৰিবলৈ উচ্চতম ন্যায়ালয়লৈ গৈছিল।
আনহাতে, প্ৰধানমন্ত্ৰীয়ে ৰাজহুৱা সভাত নগদ ধন বিতৰণ কাৰ্যসূচীক বাৰে বাৰে সমালোচনা কৰে। অৱশ্যে তেওঁ নিজৰ দলটোক সেই বাটত খোজ দিয়াত বাধা দিয়া নাই। স্বাভাৱিকতে যোশীৰ বক্তব্যৰ লক্ষ্য স্বয়ং প্ৰধানমন্ত্ৰী নেকি সেই বিষয়েও আলোচনা আৰম্ভ হৈছে।
নিৰ্বাচনৰ প্ৰাকক্ষণত এই নগদ ধন বিতৰণ কাৰ্যসূচী সন্দৰ্ভত যোশীয়ে কয় যে ইয়াৰ দ্বাৰা প্ৰকৃত জনকল্যাণ প্ৰদান কৰা হোৱা নাই। সংবিধানত উল্লেখ কৰা সমতাও বিপন্ন হৈ পৰিছে। বিজেপিৰ জ্যেষ্ঠ নেতাগৰাকীয়ে কয় যে ভাৰতত উন্নয়ন আৰু সুবিধাৰ ক্ষেত্ৰত আঞ্চলিক বিভাজন আছে। সকলো ৰাজ্যৰ অৰ্থনৈতিক অৱস্থা সমান নহয়। কৰ্ণাটকৰ এজন বাসিন্দাই ভোটৰ বিনিময়ত যি সুবিধা লাভ কৰে সেয়া মৰুৰাজ্য বা উত্তৰ-পূৰ্বাঞ্চলৰ এজন ব্যক্তিয়ে নাপায়। যদিও সকলোৰে ভোটৰ মূল্য সমান।
যোশীয়ে কয় যে সংবিধানৰ ওপৰত বিশ্বাস ৰাখি ন্যায় প্ৰতিষ্ঠা কৰিবলৈ হ’লে ৰাজ্যসমূহ আৰু অধিক বিভাজন কৰিব লাগিব। জনসংখ্যাৰ অনুপাত আৰু লোকসভা আৰু বিধানসভাৰ সংখ্যা সমান কৰি ৰাখি যদি নতুন ৰাজ্যৰ সৃষ্টি হয়, তেন্তে দেশত উন্নয়ন আৰু সুবিধাৰ ক্ষেত্ৰত সমতা অনা সম্ভৱ।
