কট্টৰ ইছলামিক উগ্ৰপন্থী সংগঠন কাল-কায়দাৰ কাম-কাজ চলিছে ভাৰতৰ ভিতৰত! দেশৰ ভিতৰত সন্ত্ৰাসবাদী সংগঠনটোৰ কাম কৰাৰ বাবে সদস্য নিয়োগ কৰা হৈছে পশ্চিম বংগত!
আজি বংগৰ দক্ষিণ ২৪ পৰগণা জিলাত স্পেচিয়েল টাস্ক ফ’ৰ্চে (এছ টি এফ) আল-কায়েদাৰ সৈতে জড়িত এক সন্দেহযুক্ত সন্ত্ৰাসবাদীক গ্ৰেপ্তাৰ কৰাৰ পাছত এই সন্দেহে গা কৰি উঠিছে।
বিশেষ সূত্ৰৰ পম খেদি আজি স্পেচিয়েল টাস্ক ফ’ৰ্চে অভিযান চলাই জিলাখনত সন্দেহযুক্ত সন্ত্ৰাসবাদী গৰাকীক গ্ৰেপ্তাৰ কৰে। ধৃত সদস্য গৰাকীক মনিৰুদ্দিন খান বুলি চিনাক্ত কৰা হৈছে।
মনিৰুদ্দিনে সন্ত্ৰাসবাদী সংগঠনটোত নতুন সদস্য নিযুক্তি দিয়াৰ লগতে ভুৱা ভাৰতীয় পৰিচয় পত্ৰ প্ৰস্তুত কৰা আদিত সহায় কৰিছিল বুলি অভিযোগ উত্থাপিত হৈছে।
২০ বৰ্ষীয় মনিৰুদ্দিন খানক শনিবাৰে গ্ৰেপ্তাৰ কৰা হৈছিল আৰু ইয়াৰ পাছতে মেট্ৰ’পলিটান মেজিষ্ট্ৰেট আদালতত হাজিৰ কৰোৱা হৈছিল। সন্দেহযুক্ত সন্ত্ৰাসবাদীগৰাকীক ১৪ নৱেম্বৰলৈকে আৰক্ষীৰ জিম্মালৈ প্ৰেৰণ কৰা হৈছে।
আল-কায়দাৰ দৰে বিশ্বসন্ত্ৰাসীত সংগঠনৰ সদস্যক গ্ৰেপ্তাৰ কৰাৰ পাছতে জিলাখনত তীব্ৰ চাঞ্চল্যৰ সৃষ্টি হৈছে। ইতিমধ্যে কলকাতা আৰক্ষীয়ে বিষয়টোৰ তদন্ত আৰম্ভ কৰিছে বুলি এগৰাকী শীৰ্ষ আৰক্ষী বিষয়াই সংবাদ মাধ্যমৰ আগত অৱগত কৰিছে।
